Maruti Brezza 1.5-లీటర్ డ్రైవ్ అనుభవం: సిటీ కమ్యూటర్‌గా బెస్ట్‌నా? హైవే క్రూజర్‌గా ఎలా ఉంది?

Brezza మనకు పరిచయమై చాలా కాలమైంది. అందుకే ఈ కారు గురించి మనలో చాలామందికి ఇప్పటికే ఒక స్థిరమైన అభిప్రాయం ఉంది. నమ్మకమైనది, రోజువారీ వినియోగానికి సులభమైనది, పెద్దగా ఉత్సాహాన్ని కలిగించనిది.. ఈ కారు గురించి ఇన్నేళ్లుగా ఉన్న అభిప్రాయం ఇదే. ఇటీవల ఫేస్‌లిఫ్ట్ వచ్చినప్పటికీ ఈ ఫార్ములాలో పెద్దగా మార్పు లేదు. కొత్త టర్బో-పెట్రోల్ ఇంజిన్‌ను కూడా లైనప్‌లో చేర్చినప్పటికీ, చాలా మంది కొనుగోలుదారులు ఇప్పటికీ ఈ కారులో మొదటి నుంచి అందిస్తున్న 1.5-లీటర్ న్యాచురల్లీ ఆస్పిరేటెడ్ పెట్రోల్ ఇంజిన్‌నే ఎంచుకుంటారు. దీనితో పెట్రోల్‌తో పాటు CNG ఆప్షన్ కూడా అందుబాటులో ఉంది. కాబట్టి అసలు ప్రశ్న బ్రెజ్జా మంచిదా? కాదా? అనేది కాదు. మీరు డ్రైవ్ చేసే విధానానికి ఈ ప్రత్యేకమైన ఇంజిన్ సరిపోతుందా? అనేదే. దీనిని తెలుసుకునేందుకు మేము సిటీ ట్రాఫిక్‌తో పాటు హైవేపై కూడా ఈ కారును నడిపి చూశాం.

ఇప్పటికీ అదే పాత 1.5.. అయినా మంచిదే

ఆటోమేటిక్ బ్రెజ్జాను ఎంచుకుంటే ఈ ఇంజిన్‌నే పొందుతారు. దీనికి మరో మార్గం లేదు. ఇది 4-సిలిండర్ యూనిట్. ఈ కారణంగానే చాలా మంది ప్రత్యర్థి కార్లలో ఉపయోగిస్తున్న 3-సిలిండర్ ఇంజిన్లతో పోలిస్తే కనీసం స్మూత్‌నెస్ విషయంలో ఇది ఒక అడుగు ముందుంటుంది. పవర్ ఒక్కసారిగా రాదు; RPM పెరిగే కొద్దీ క్రమంగా పెరుగుతుంది. యాక్సిలరేటర్‌పై కాలు పెడితే ఎలాంటి ఆశ్చర్యం ఉండదు. స్పందన నెమ్మదిగా, అంచనా వేయగలిగే విధంగా ఉంటుంది. అదే దీని ఉద్దేశం కూడా. ఈ ఇంజిన్‌ను వేగం కోసం కాకుండా సులభంగా నడపడం కోసం రూపొందించారు. ఆ విషయంలో ఇది ఎక్కువగా విజయవంతమవుతుంది.

సిటీలో

నిజం చెప్పాలంటే 1.5 పెట్రోల్ ఇంజిన్‌కు ఇది అత్యంత సరైన ప్రదేశం. ట్రాఫిక్‌లో నెమ్మదిగా వెళ్లడం, ఆగడం, మళ్లీ వెళ్లడం.. ఇలా ఎంత చేసినా ఇంజిన్‌కు పెద్దగా ఇబ్బంది ఉండదు. ఎలాంటి లాగ్ ఉండదు. చిన్న గ్యాప్‌లోకి వెళ్లేందుకు కొద్దిగా పవర్ అవసరమైనప్పుడు కూడా ఎలాంటి ఆలస్యం కనిపించదు. దగ్గర్లోని దుకాణానికి వెళ్లినా, గంటపాటు ట్రాఫిక్‌లో చిక్కుకున్నా ఈ ఇంజిన్ తన పని తాను చేసుకుంటూ పోతుంది. ముఖ్యంగా డ్రైవర్ ఎక్కువగా ఆలోచించాల్సిన అవసరం ఉండదు.

రన్నింగ్ ఖర్చులు మీకు ముఖ్యమైన అంశం అయితే CNG వెర్షన్‌ను పరిశీలించవచ్చు. పట్టణంలో నడిపేటప్పుడు నిజం చెప్పాలంటే పెద్దగా తేడా అనిపించదు. ఎలాంటి ఇబ్బంది లేకుండా సిటీ వేగాన్ని అందుకుంటుంది. అయితే ఓవర్‌టేకింగ్ సమయంలో కొంత ఇబ్బంది ఉంటుంది. పెట్రోల్ వెర్షన్‌తో పోలిస్తే ఓవర్‌టేక్ చేయడానికి కొంచెం ముందుగానే ప్లాన్ చేసుకోవాలి, అలాగే యాక్సిలరేటర్‌ను మరింత గట్టిగా నొక్కాలి. ఇది పెద్ద సమస్య కాకపోయినా, తెలుసుకోవాల్సిన విషయం.

హైవేపై

ఓపెన్ రోడ్డుపైకి తీసుకెళ్లినప్పుడు దీని స్వభావంలో కొంత మార్పు కనిపిస్తుంది. ట్రిపుల్ డిజిట్ వేగాన్ని అందుకున్న తర్వాత ఇది నిజంగా ప్రశాంతంగా మారి ఒక రిథమ్‌లో స్థిరంగా క్రూజ్ చేస్తుంది. లాంగ్ డ్రైవ్‌లో మనకు కావాల్సింది కూడా ఇదే. అయితే ఆ వేగాన్ని చేరుకోవడానికి కొంత ఎక్కువ సమయం పడుతుంది. యాక్సిలరేషన్ వేగంగా కాకుండా క్రమంగా పెరుగుతుంది. కాబట్టి వేగంగా వస్తున్న వాహనాన్ని ఓవర్‌టేక్ చేయాలంటే అప్పటికప్పుడు స్పందించడం కంటే ఒక అడుగు ముందుగానే ఆలోచించాలి. చాలా సందర్భాల్లో ఓవర్‌టేక్ చేయడానికి ముందు ఉపయోగకరమైన RPM రేంజ్‌లోకి వెళ్లేందుకు ఒక గేర్ డౌన్ చేయాల్సి ఉంటుంది. ఇది వేగం కోసం కాకుండా ప్రశాంతమైన డ్రైవింగ్ కోసం ట్యూన్ చేసిన ఇంజిన్. సాధారణంగా కుటుంబాలు హైవేపై చేసే ప్రయాణాలకు ఈ ట్రేడ్-ఆఫ్ సరైనదిగానే అనిపిస్తుంది.

CNG వేరియంట్‌లో హైవేపై ఈ పరిమితులు మరింత స్పష్టంగా కనిపిస్తాయి. పెట్రోల్‌తో పోలిస్తే 100 kmph వేగాన్ని చేరుకోవడానికి ఎక్కువ సమయం పడుతుంది. ఓవర్‌టేక్ చేయడానికి ఎక్కువ దూరం, క్లియర్‌గా ఉన్న రోడ్ అవసరం అవుతుంది. సుమారు 80 kmph దాటిన తర్వాత ఇంజిన్‌పై ఒత్తిడి స్పష్టంగా అనిపించడం మొదలవుతుంది. లోడ్ ఉన్నప్పుడు ఇంజిన్ శబ్దం కూడా పెరుగుతుంది. దీంతో లాంగ్ డ్రైవ్‌లో సాధారణంగా ప్రశాంతంగా ఉండే క్యాబిన్‌కు కొంత అంతరాయం కలుగుతుంది.

ఫేస్‌లిఫ్ట్‌లో కొత్తగా ఏముంది?

డిజైన్ పరంగా చూస్తే అప్‌డేటెడ్ బ్రెజ్జా కొంచెం మరింత ప్రీమియంగా కనిపిస్తుంది. ముందు భాగంలో కొత్త గ్రిల్, రీడిజైన్ చేసిన బంపర్, ఇంటిగ్రేటెడ్ DRLsతో కూడిన షార్ప్ LED హెడ్‌ల్యాంప్స్ వచ్చాయి. సైడ్ ప్రొఫైల్‌లో పెద్దగా మార్పు లేదు. బాక్సీ డిజైన్‌తో ఇది ఇప్పటికీ బ్రెజ్జాగానే కనిపిస్తుంది. అయితే 16-అంగుళాల అల్లాయ్ వీల్స్‌కు కొత్త డిజైన్ వచ్చింది. వెనుక భాగంలో టెయిల్‌గేట్ అంతటా సన్నని LED టెయిల్ ల్యాంప్స్ ఉన్నాయి. వాటి పక్కనే బోల్డ్ లెటరింగ్‌లో “Brezza” అని రాశారు. అయితే అసలు పెద్ద మార్పు బానెట్ కింద ఉంది. ఫ్రాంక్స్ నుంచి తీసుకొచ్చిన కొత్త 1.0-లీటర్ టర్బో-పెట్రోల్ ఇంజిన్ లైనప్‌లో చేరింది. ఈ ఇంజిన్ ఉన్న కార్లను ప్రత్యేకంగా గుర్తించేందుకు ‘Turbo’ బ్యాడ్జ్‌ను కూడా అందించారు.

ఇంటీరియర్‌లో మార్పులు మరింత స్పష్టంగా కనిపిస్తాయి. వైర్‌లెస్ ఆండ్రాయిడ్ ఆటో, ఆపిల్ కార్ ప్లేతో కూడిన పెద్ద 10.1-అంగుళాల టచ్‌స్క్రీన్ ఇప్పుడు ఉంది. ఎలక్ట్రిక్ సన్‌రూఫ్, ముందు వెంటిలేటెడ్ సీట్లు, వైర్‌లెస్ ఛార్జింగ్, కీలెస్ ఎంట్రీ, ఆటోమేటిక్ క్లైమేట్ కంట్రోల్ వంటి ఫీచర్లు కూడా స్టాండర్డ్‌గా లభిస్తాయి. ఆరు ఎయిర్‌బ్యాగ్‌లతో పాటు సేఫ్టీ విషయంలో కూడా పెద్దగా తగ్గించలేదు. 360-డిగ్రీ కెమెరా, ముందు మరియు వెనుక పార్కింగ్ సెన్సర్లు, ISOFIX చైల్డ్ సీట్ మౌంట్స్, రియర్ క్రాస్-ట్రాఫిక్ అలర్ట్, బ్లైండ్-స్పాట్ మానిటరింగ్ వంటి ఫీచర్లు కూడా ఉన్నాయి. CNG మోడళ్లలో ట్యాంక్‌ను బాడీ కింద అమర్చారు. దీంతో గతంతో పోలిస్తే బూట్ స్పేస్ చాలా తక్కువగా కోల్పోతారు.

స్పెసిఫికేషన్లు

MT - మ్యాన్యువల్ ట్రాన్స్‌మిషన్ / AT - టార్క్ కన్వర్టర్ (ఆటోమేటిక్)

ధర, ప్రత్యర్థులు

బ్రెజ్జా ధరలు రూ.7.40 లక్షల నుంచి రూ.13.55 లక్షల వరకు (ఎక్స్-షోరూమ్) ఉన్నాయి. ఈ ధరల పరిధిలో పోటీ కూడా తక్కువేమీ కాదు. Mahindra XUV 3XO, Tata Nexon, Hyundai Venue, Kia Sonet, త్వరలో రానున్న Skoda Kylaq వంటి మోడళ్లు ఇదే కొనుగోలుదారులను ఆకర్షించేందుకు పోటీ పడుతున్నాయి. తక్కువ ధరల విభాగంలో Renault Kiger, Nissan Magnite కూడా పోటీలో ఉన్నాయి. కొంచెం భిన్నమైన మోడల్‌ను కోరుకునే వారికి Maruti Fronx, Toyota Taisor వంటి క్రాసోవర్ తరహా ప్రత్యామ్నాయాలు కూడా ఉన్నాయి.

కార్దెకో చెబుతోంది...

మీకు సౌకర్యవంతమైన, ఎలాంటి ఇబ్బందులు లేని రోజువారీ డ్రైవర్ కావాలంటే, ఆటోమేటిక్ గేర్‌బాక్స్‌తో కూడిన 1.5-లీటర్ పెట్రోల్ వెర్షన్‌ను కొనుగోలు చేయడం ఉత్తమం. ఇది సిటీ డ్రైవింగ్‌ను చక్కగా నిర్వహిస్తుంది. అప్పుడప్పుడు హైవేపై ప్రయాణించినా ఇబ్బంది పెట్టదు. మీరు ప్రతిరోజూ ఎక్కువ కిలోమీటర్లు ప్రయాణిస్తారా? అయితే CNG వేరియంట్ ఇంధన ఖర్చులో నిజమైన ఆదాను అందిస్తుంది. హైవేపై ఉండే కొన్ని పరిమితులు ఈ వేరియంట్‌కు సరైనవే. అయితే మీకు డ్రైవింగ్ అంటే నిజంగా ఇష్టం, మరింత వేగవంతమైన స్పందన కావాలనుకుంటే 1.5-లీటర్‌ను పక్కన పెట్టి కొత్త 1.0-లీటర్ టర్బో-పెట్రోల్‌ను ఎంచుకోవడం మంచిది.