நேம் பேட்ஜ் மட்டும் வேற... கார் ஒன்னா? 2026 பலேனோ Vs கிளான்ஸா: மறைக்கப்பட்ட உண்மைகள் இதோ!

மாருதி சுஸூகி பலேனோ மற்றும் டொயோட்டா கிளான்ஸா ஆகிய இரண்டுமே ஒரே மேடையில் உருவான கார்கள்தான் என்றாலும், இரண்டிற்கும் இடையே கவனிக்கத்தக்க பல வித்தியாசங்கள் உள்ளன. இந்த ஆண்டில் பலேனோ மாடல் முதலில் ஃபேஸ்லிஃப்ட் அப்டேட்டைப் பெற்றது. அதனைத் தொடர்ந்து கிளான்ஸாவும் புதுப்பிக்கப்பட்டது. ஒரே மாதிரியான பவர்டிரெயின், வசதிகள் மற்றும் பாதுகாப்பு அம்சங்களை இந்த கார்கள் பகிர்ந்து கொண்டாலும், டொயோட்டா மாடலில் இருந்து மாருதி கார் எந்தெந்த விஷயங்களில் வேறுபடுகிறது என்பதை இங்கே விரிவாகப் பார்ப்போம்.

விலை

மேலே உள்ள அட்டவணையைப் பார்த்தாலே ஒரு விஷயம் தெளிவாகப் புரியும். ஆரம்ப நிலை வேரியண்ட்டில் கிளான்ஸாவை விட பலேனோ கிட்டத்தட்ட ஒரு லட்சம் ரூபாய் வரை குறைவான விலையிலேயே கிடைக்கிறது. இரண்டு கார்களிலுமே ஒரே மெக்கானிக்கல் பாகங்கள் மற்றும் வசதிகள் இருக்கும் நிலையில், பட்ஜெட்டுக்கு ஏற்ற அதிகபட்ச பலனை எதிர்பார்க்கும் வாடிக்கையாளர்களுக்கு பலேனோ மிகச் சிறந்த தேர்வாக அமைகிறது.

வெளிப்புற வடிவமைப்பு

பலேனோவின் முன்பக்கத்தில் மாருதி சுஸூகி லோகோவுடன் கூடிய எடுப்பான குரோம் கிரில் கொடுக்கப்பட்டுள்ளது. ஆனால் கிளான்ஸாவோ லெக்ஸஸ் கார்களை நினைவூட்டும் தோற்றத்தைப் பெற்றுள்ளது. இதில் பெரிய V-வடிவ கிரில், பானெட்டில் டொயோட்டா பேட்ஜ் மற்றும் ரீடிசைன் செய்யப்பட்ட பம்பரில் செவ்வக வடிவ LED ஃபாக் லேம்ப்கள் இடம்பெற்றுள்ளன. அதேநேரம் புரொஜெக்டர் LED ஹெட்லேம்ப்கள் மற்றும் பிரத்யேக டேடைம் ரன்னிங் லைட்ஸ் வசதியை இரண்டு கார்களுமே தக்கவைத்துள்ளன.

இந்த ஃபேஸ்லிஃப்ட் அப்டேட்டில் பலேனோ சற்று கம்பீரமான முகப்புத் தோற்றத்தைப் பெறுகிறது. கிளான்ஸாவின் ஸ்டைலிங் கூடுதல் பிரீமியம் லுக்கைத் தருகிறது. மேலும் கிளான்ஸாவில் முன்பக்க பம்பர் லிப் கூடுதலாக வழங்கப்பட்டு, அதற்குத் தனித்துவமான அடையாளத்தை உருவாக்குகிறது.

பக்கவாட்டுத் தோற்றத்தில் இரண்டு கார்களுக்குமான ஒற்றுமைகள் மிகத் தெளிவாகத் தெரிகின்றன. 2,520 மிமீ வீல்பேஸ் மற்றும் 16-இன்ச் டூயல்-டோன் அலாய் வீல்கள் என இரண்டு ஹேட்ச்பேக்குகளும் ஒரே அளவீடுகளைக் கொண்டுள்ளன. பலேனோவின் டோர் ஹேண்டில்கள், விண்டோ பார்டர்கள் மற்றும் முன்பக்க ஃபெண்டரில் குரோம் ஃபினிஷிங் கொடுக்கப்பட்டுள்ளது. இந்த அம்சங்கள் கிளான்ஸாவிலும் இருந்தாலும், ஸ்போர்ட்டியான க்ளாஸ் பிளாக் சைடு ஸ்கர்ட் வசதியை கூடுதலாக வழங்கி கிளான்ஸா ஒரு படி முன்னிலையில் நிற்கிறது.

பின்பக்க வடிவமைப்பில் இரண்டுமே கிட்டத்தட்ட ஒன்றுபோலவே இருக்கின்றன. C-வடிவ LED டெயில்-லேம்ப்கள், இருபுற விளக்குகளையும் இணைக்கும் குரோம் ஸ்ட்ரிப், ரூஃப்-மவுண்டட் ஸ்பாய்லர், ஒரே மாதிரியான பம்பர் டிசைன் மற்றும் ரியர் வைப்பர்-வாஷர் ஆகிய அம்சங்கள் இரண்டிலுமே பொதுவாக இடம்பெற்றுள்ளன.

கலர் ஆப்ஷன்கள்

பலேனோ மற்றும் கிளான்ஸா ஆகிய இரண்டு கார்களுமே 7 மோனோடோன் வண்ண ஆப்ஷன்களில் கிடைக்கின்றன.

இரண்டு ஹேட்ச்பேக்குகளிலுமே கிடைக்கும் வண்ணங்கள் ஒன்றுதான். பெயர்கள் மட்டுமே நிறுவனங்களுக்கு ஏற்ப மாறுபடுகின்றன.

உட்புற வடிவமைப்பு

பலேனோவின் கேபினில் சில்வர் ஹைலைட்களுடன் கூடிய பிளாக் மற்றும் ப்ளூ தீம் வழங்கப்பட்டுள்ளது. இது டேஷ்போர்டுக்கு ஸ்போர்ட்டியான தோற்றத்தைக் கூட்டுகிறது. கிளான்ஸாவிலோ க்ளாஸ்-பிளாக் ஹைலைட்களுடன் கூடிய பிளாக் மற்றும் பெய்ஜ் தீம் பயன்படுத்தப்பட்டுள்ளது. இது காருக்குள் அதிக இடவசதி இருப்பது போன்ற பிரம்மாண்ட உணர்வை உருவாக்குகிறது. இந்த வண்ண மாற்றங்களைத் தவிர்த்துவிட்டுப் பார்த்தால், டேஷ்போர்டு டிசைன் மற்றும் ஒட்டுமொத்த லே-அவுட் இரண்டு கார்களிலுமே ஒன்றாகவே வடிவமைக்கப்பட்டுள்ளது.

இரண்டு கார்களிலுமே ஃப்ளோட்டிங் டச்ஸ்கிரீன் இன்ஃபோடெயின்மென்ட் சிஸ்டம், அனலாக் இன்ஸ்ட்ரூமென்ட் கிளஸ்டர் மற்றும் வயர்லெஸ் போன் சார்ஜர், வென்டிலேட்டட் ஃப்ரண்ட் சீட்கள் அமைப்பதற்கு ஏற்ப மாற்றியமைக்கப்பட்ட லோயர் சென்டர் கன்சோல் ஆகியவை உள்ளன. ஏர் கண்டிஷனிங்கிற்கான பிசிக்கல் கண்ட்ரோல்களும், ஸ்டீயரிங்-மவுண்டட் பட்டன்களும் இரண்டிலும் தொடர்ந்து வழங்கப்படுகின்றன.

கேபின் இடவசதி மற்றும் பயண சவுகரியத்தில் இரண்டுக்கும் பெரிய இடைவெளி எதுவும் இல்லை. இருப்பினும் ஸ்போர்ட்டியான கேபின் சூழலை விரும்புபவர்களுக்கு பலேனோவின் டார்க் தீம் கூடுதல் ஈர்ப்பைத் தரலாம்.

இருப்பினும், இரண்டு கார்களிலுமே சிங்கிள்-பேன் சன்ரூஃப் வசதி இல்லாதது ஒரு பெரிய குறையாகவே தொடர்கிறது.

டாடா அல்ட்ராஸ் மற்றும் ஹூண்டாய் i20 போன்ற போட்டி கார்களில் சன்ரூஃப் வழங்கப்பட்டு வரும் சூழலில், இந்த புதிய ஃபேஸ்லிஃப்ட் மாடல்களிலும் அது சேர்க்கப்பட்டிருந்தால் அவற்றின் பிரீமியம் அந்தஸ்து மேலும் கூடியிருக்கும்.

வசதிகள் மற்றும் பாதுகாப்பு

ஃபேஸ்லிஃப்ட் அப்டேட்டின் மூலம் பலேனோவில் வென்டிலேட்டட் ஃப்ரண்ட் சீட்கள், வயர்லெஸ் போன் சார்ஜர் மற்றும் 6-ஸ்பீக்கர் கிளாரியன் சவுண்ட் சிஸ்டம் உள்ளிட்ட பல புதிய வசதிகள் அறிமுகப்படுத்தப்பட்டுள்ளன. இவையனைத்தும் டொயோட்டா கிளான்ஸாவிலும் இடம் பெற்றுள்ளன. அதேபோல வயர்லெஸ் ஆண்ட்ராய்டு ஆட்டோ மற்றும் ஆப்பிள் கார்பிளே சப்போர்ட் கொண்ட 9-இன்ச் டச்ஸ்கிரீன் இன்ஃபோடெயின்மென்ட், மல்டி-இன்பர்மேஷன் டிஸ்ப்ளே கொண்ட அனலாக் இன்ஸ்ட்ரூமென்ட் கிளஸ்டர், ஆட்டோமேட்டிக் கிளைமேட் கண்ட்ரோல், புஷ்-பட்டன் ஸ்டார்ட் உடன் கூடிய கீலெஸ் என்ட்ரி, ஹெட்ஸ்-அப் டிஸ்ப்ளே, குரூஸ் கண்ட்ரோல், எலக்ட்ரிக்கலி அட்ஜஸ்டபிள் மற்றும் ஃபோல்டபிள் ORVMs, கனெக்டட் கார் டெக்னாலஜி ஆகிய அனைத்துமே இரு கார்களுக்கும் பொதுவான அம்சங்களாகும்.

பாதுகாப்பு வசதிகளைப் பொறுத்தவரையிலும் இரண்டு ஹேட்ச்பேக்குகளும் சரிசம பலத்துடனேயே களம் காண்கின்றன.

அடாப்டிவ் குரூஸ் கண்ட்ரோல், லேன்-கீப் அசிஸ்ட், லேன் டிப்பார்ச்சர் வார்னிங், ஃபார்வர்ட் கொலிஷன் வார்னிங் மற்றும் ஆட்டோமேட்டிக் எமர்ஜென்சி பிரேக்கிங் போன்ற லெவல்-2 ADAS அம்சங்கள் இதில் இடம்பெற்றுள்ளன. இவை தவிர 360-டிகிரி கேமரா, ஆறு ஏர்பேக்குகள், EBD உடன்கூடிய ABS, HHC, TPMS, ஆட்டோ-டிம்மிங் IRVM மற்றும் ISOFIX சைல்டு-சீட் மவுண்ட்கள் போன்ற அனைத்து முக்கிய பாதுகாப்பு அமைப்புகளுமே இரு மாடல்களிலுமே முழுமையாகக் கிடைக்கின்றன.

இவற்றின் பவர்டிரெயின் விவரங்களை விரிவாகப் பார்ப்போம்:

இரண்டு ஹேட்ச்பேக்குகளிலுமே மாருதி சுஸூகியின் Z-சீரிஸ் 1.2-லிட்டர், மூன்று சிலிண்டர் பெட்ரோல் இன்ஜினே பயன்படுத்தப்பட்டுள்ளது. இதே இன்ஜின்தான் ஸ்விஃப்ட் மற்றும் டிசையர் மாடல்களிலும் செயல்படுகிறது. இந்த ஃபேஸ்லிஃப்ட் மாடல்களில் பெட்ரோல் மற்றும் CNG ஆப்ஷன்களோடு, மேனுவல் மற்றும் AMT கியர்பாக்ஸ் தேர்வுகளும் தொடர்ந்து கிடைக்கின்றன.

Here is a closer look at their powertrain specifications:

MT - Manual Transmission, AMT - Automated Manual Tranmsission

இன்ஜின் மற்றும் கியர்பாக்ஸ் தேர்வுகள் முற்றிலும் ஒன்றாகவே இருப்பதால், இரண்டில் ஒன்றை வாங்குவதற்கு செயல்திறனோ அல்லது மைலேஜோ பெரிய காரணமாக இருக்கப் போவதில்லை. மாறாக விலை, வெளித்தோற்றம் மற்றும் சர்வீஸ் அனுபவம் ஆகியவற்றின் அடிப்படையிலேயே தேர்வு செய்ய வேண்டியிருக்கும்.

கார்தேக்கோவின் கருத்து...

மாருதி சுஸூகி பலேனோ மற்றும் டொயோட்டா கிளான்ஸா ஆகிய இரண்டுமே ஒன்றுக்கொன்று நெருங்கிய தொடர்புடைய மாடல்கள்தான் என்றாலும், விலையைப் பொறுத்தவரை பலேனோவே முன்னணியில் இருக்கிறது. கிளான்ஸாவில் இருக்கும் அதே வசதிகள், பாதுகாப்பு உபகரணங்கள் மற்றும் பவர்டிரெயின் ஆப்ஷன்களை வழங்கும் அதே வேளையில், பேஸ் வேரியண்ட்டில் சுமார் 89,000 ரூபாயும், டாப் வேரியண்ட்டில் 99,000 ரூபாயும் குறைவாகவே பலேனோ கிடைக்கிறது.

பணத்தை மிச்சப்படுத்துவதே உங்கள் முதன்மைத் தேர்வு என்றால், பலேனோவை நோக்கிச் செல்வதே மிகச் சிறந்த முடிவு. கிளான்ஸாவில் கிடைக்கும் அதே பேக்கேஜ் பலேனோவில் மிகக் குறைந்த விலையில் உங்களுக்குக் கிடைத்துவிடும். டொயோட்டா பிராண்ட் மீது தனி விருப்பம் கொண்டவர்களுக்கும் அதன் சர்வீஸ் நெட்வொர்க் மீது கூடுதல் நம்பிக்கை வைத்திருப்பவர்களுக்கும் மட்டுமே கிளான்ஸா பொருத்தமான தேர்வாக இருக்கும். எங்களைப் பொறுத்தவரை மிச்சமாகும் பணத்தைக் கருத்தில் கொண்டு பலேனோவையே தேர்ந்தெடுக்கப் பரிந்துரைப்போம்.

கவனிக்க வேண்டிய பிற மாற்றுத் தேர்வுகள்

ஹூண்டாய் i20: எண்ணற்ற நவீன வசதிகள் நிறைந்த கேபின் மற்றும் ஸ்மூத்தான பெட்ரோல் இன்ஜினை விரும்பும் வாடிக்கையாளர்களுக்கான பிரீமியம் ஹேட்ச்பேக். பலேனோ மற்றும் கிளான்ஸாவில் மூன்று சிலிண்டர் இன்ஜின் மட்டுமே உள்ள நிலையில், இதில் நான்கு சிலிண்டர் பெட்ரோல் இன்ஜின் வழங்கப்படுவது ஒரு தனித்துவமான பிளஸ் பாயிண்ட் ஆகும்.

டாடா அல்ட்ராஸ்: வலுவான பாதுகாப்புத் தரம் மற்றும் தனித்துவமான வெளிப்புற வடிவமைப்பை எதிர்பார்க்கும் வாடிக்கையாளர்களுக்கு இதுவொரு சிறந்த மாற்று. மேலும், டீசல் இன்ஜினை மட்டுமே தேடும் நபர்களுக்கு ஏற்ற வகையில், டீசல் ஆப்ஷனைத் தொடர்ந்து வழங்கும் ஒரே ஹேட்ச்பேக் காராக அல்ட்ராஸ் மட்டுமே தற்போதைக்குத் திகழ்கிறது.