குறைந்த பட்ஜெட்... அள்ளும் மைலேஜ்! இந்த தீபாவளிக்கு வாங்க சிறந்த 5 CNG கார்கள் இதோ!

குறைந்த செலவில் அதிக தூரம் பயணிக்க முடிவதால், கமர்ஷியல் மற்றும் வாடகை கார் சேவைகளின் முதுகெலும்பாக CNG கார்கள் விளங்குவதை நாம் அனைவரும் அறிவோம். பொதுவாக CNG என்றால் பெர்ஃபாமன்ஸ் குறைவாகவே இருக்கும் என்ற ஒரு எண்ணம் இருந்தது. ஆனால் கிட்டத்தட்ட டர்போ-பெட்ரோல் என்ஜினுக்கு நிகரான ஆற்றலைத் தரும் புதிய மஹிந்திரா எக்ஸ்யூவி 3XO ZNG காரின் வருகையும் மைலேஜுடன் ஆட்டோமேட்டிக் கியர்பாக்ஸ் வசதியையும் சேர்த்து வழங்கும் டாடா மற்றும் மாருதி நிறுவனங்களின் மாடல்களும் இந்த நிலையை முழுமையாக மாற்றியுள்ளன. அதே நேரத்தில் சொந்த பயன்பாட்டிற்கு சிக்கனமான காரை எதிர்பார்க்கும் பல நடுத்தர குடும்பங்களின் முதல் தேர்வாக இப்போதும் CNG கார்களே முன்னணியில் உள்ளன.

நடப்பு தீபாவளி பண்டிகையை முன்னிட்டு உங்கள் வீட்டிற்கு ஒரு புதிய CNG காரை ஓட்டி வர திட்டமிட்டிருந்தால், சந்தையில் மிகக் குறைந்த விலையில் கிடைக்கக்கூடிய டாப் ஐந்து சிறந்த CNG கார்களின் பட்டியல் இதோ:

மாருதி சுஸூகி S-பிரஸ்ஸோ

வேரியண்ட்கள்: LXi (O) மற்றும் VXi (O)

CNG வேரியண்ட் விலை: Rs 4.64 லட்சம் முதல் ரூ. 5.14 லட்சம் (எக்ஸ்-ஷோரூம்)

ஃபிட்மெண்ட் வகை: ஃபேக்டரி-ஃபிட்

இந்தியாவில் நான்கு சக்கர வாகனம் வாங்க நினைப்பவர்களுக்கு மிகக் குறைந்த பட்ஜெட் தேர்வாக அமைவது மாருதி எஸ்-பிரஸ்ஸோ. அதிலும் CNG ஆப்ஷனை எதிர்பார்க்கிறீர்கள் என்றால் சந்தையிலேயே மிக மலிவான விலை கொண்ட காராகவும் இதுவே இருக்கிறது. தனது மிட்-ஸ்பெக் வேரியண்ட்களில் இந்த CNG வசதியை மாருதி வழங்குகிறது. இதில் உள்ள 1 லிட்டர் நேச்சுரலி அஸ்பிரேட்டட் பெட்ரோல் என்ஜின், ஃபேக்டரி-ஃபிட் CNG அமைப்போடு இணைந்து CNG மோடில் 57 PS பவரையும், 82 Nm டார்க்கையும் வெளிப்படுத்துகிறது.

இந்த புள்ளிவிவரங்கள் சொல்வது ஒன்றே ஒன்றுதான். இந்த கார் அதிவேக பெர்ஃபாமன்ஸுக்கானது அல்ல, மாறாக மிகக் குறைந்த செலவில் மைலேஜ் தருவதற்காகவே உருவாக்கப்பட்டது. இதன் CNG பதிப்பு ஒரு கிலோவுக்கு 32.73 கி.மீ மைலேஜ் தருவதாக நிறுவனம் கூறுகிறது. அதேபோல பெட்ரோல் மோடிலும் லிட்டருக்கு அதிகபட்சமாக 25.30 கி.மீ வரை சிறப்பான மைலேஜ் கிடைக்கிறது. இதில் ஆட்டோமேட்டிக் கியர்பாக்ஸ் வசதி கிடையாது.

மேலும் சிங்கிள் சிலிண்டர் டேங்க் என்பதால் பூட் ஸ்பேஸ் பெரிய அளவில் கிடைக்காது. இருப்பினும் மிட்-ஸ்பெக் வேரியண்ட்டாக இருப்பதால் தேவையான அனைத்து அடிப்படை அம்சங்கள் மற்றும் பாதுகாப்பு வசதிகளுடன் வருகிறது. கம்பீரமான உயரமும் எஸ்யூவி போன்ற தோற்றமும் கொண்ட இந்த கார், அன்றாட தினசரி பயன்பாட்டிற்கு எந்த குறையும் வைக்காது.

மாருதி சுஸூகி ஆல்டோ K10

வேரியண்ட்கள்: LXi (O) மற்றும் VXi (O)

CNG வேரியண்ட் விலை: Rs 4.84 லட்சம் முதல் ரூ. 5.34 லட்சம் (எக்ஸ்-ஷோரூம்)

ஃபிட்மெண்ட் வகை: ஃபேக்டரி ஃபிட் 

மாருதி நிறுவனத்தின் மிகச் சிறிய மாடல்களில் ஒன்றாக ஆல்டோ K10 இருந்தாலும் நெரிசல் மிகுந்த நகரப் போக்குவரத்துகளில் புகுந்து புறப்படுவதில் இதற்கு நிகர் இதுவேதான். ஒரு சிறிய காராக இருந்தாலும், அதன் திறனும் பலமும் பல மடங்கு பெரியது.

எஸ்-பிரஸ்ஸோவை விட ரூ. 20,000 மட்டுமே கூடுதல் விலையில் ஆல்டோ K10 CNG மாடல் கிடைக்கிறது. இதிலும் மிட்-ஸ்பெக் வேரியண்ட்களிலேயே CNG ஆப்ஷன் தரப்பட்டுள்ளது. என்ஜின் மற்றும் ஆற்றல் அளவுகள் இரண்டு மாடல்களிலுமே ஒன்றுதான்; CNG மோடில் 57 PS பவர் மற்றும் 82.1 Nm டார்க் வெளிப்படுகிறது. ஆனால் மைலேஜில் ஆல்டோ ஒரு படி மேலே நிற்கிறது. இதன் CNG பதிப்பு ஒரு கிலோவுக்கு 33.40 கி.மீ மைலேஜும், பெட்ரோல் AMT பதிப்பு லிட்டருக்கு 24.90 கி.மீ மைலேஜும் தருகிறது.

இதில் ஆட்டோமேட்டிக் ஆப்ஷனோ அல்லது டாடாவின் நவீன இரட்டை சிலிண்டர் வடிவமைப்போ இல்லை என்பதால் பூட் ஸ்பேஸ் குறைவுதான். ஆனால் இந்த விலைக்கு தேவையான அனைத்து அடிப்படை வசதிகளையும் பூர்த்தி செய்வதோடு, ஆறு ஏர்பேக்குகள் மற்றும் எலக்ட்ரானிக் பாதுகாப்பு வசதிகளை ஸ்டாண்டர்டாக வழங்கி அசத்துகிறது.

ரெனால்ட் க்விட்

வேரியண்ட்கள்: Evolution மற்றும் Climber

CNG வேரியண்ட் விலை: Rs 5.23 லட்சம் முதல் ரூ. 5.85 லட்சம் (எக்ஸ்-ஷோரூம்)

ஃபிட்மெண்ட் வகை: அங்கீகரிக்கப்பட்ட டீலர்ஷிப் ரெட்ரோஃபிட்

இந்தியாவில் ரெனால்ட் விற்பனை செய்யும் மிகச் சிறிய கார் க்விட். நகரப் பயன்பாட்டிற்கு ஏற்ற சிறிய காராகவும் இருக்க வேண்டும், அதே சமயம் எஸ்யூவி போன்ற கவர்ச்சிகரமான லுக் மற்றும் சௌகரியமான பயண அனுபவமும் வேண்டும் என்பவர்களுக்கு இது ஒரு மிகச் சிறந்த தேர்வாகும்.

இதன் பயன்பாட்டை மேலும் எளிதாக்கும் வகையில் தற்போது சில அங்கீகரிக்கப்பட்ட டீலர்ஷிப்களில் ரெட்ரோஃபிட் முறையில் CNG கிட் பொருத்திக் கொள்ளும் வசதியை ரெனால்ட் கொண்டுவந்துள்ளது. இதன் 1 லிட்டர், மூன்று சிலிண்டர் நேச்சுரலி அஸ்பிரேட்டட் பெட்ரோல் என்ஜின் 69 PS பவர் மற்றும் 92.5 Nm டார்க்கை வழங்கும் நிலையில், CNG மோடில் ஆற்றல் அளவு சற்றே குறைவாக இருக்கும். இதற்கான அதிகாரப்பூர்வ புள்ளிவிவரங்களை ரெனால்ட் இன்னும் வெளியிடவில்லை.

இதிலும் ஆட்டோமேட்டிக் ஆப்ஷனோ அல்லது டுயல் சிலிண்டர் அமைப்போ கிடையாது. இருப்பினும், முந்தைய மாருதி கார்களை விட இதில் உள்ள பிளஸ் பாயிண்ட் என்னவென்றால், க்விட் மாடலின் இரண்டு வேரியண்ட்களிலுமே CNG வசதி கிடைக்கிறது. எனவே டாப் வேரியண்ட்டை தேர்வு செய்தால் டச்ஸ்கிரீன் இன்ஃபோடெயின்மென்ட், சவுண்ட் சிஸ்டம் என அனைத்து மாடர்ன் வசதிகளுடன் கூடிய ஒரு முழுமையான CNG காரை நீங்கள் சொந்தமாக்கிக் கொள்ளலாம்.

டாடா டியாகோ

வேரியண்ட்கள்: Smart, Pure, Pure Plus, Pure Plus A, Creative 

CNG வேரியண்ட் விலை: Rs 5.87 லட்சம் முதல் ரூ. 8.62 லட்சம் (எக்ஸ்-ஷோரூம்)

ஃபிட்மெண்ட் வகை: ஃபேக்டரிஃபிட்

டாடாவின் என்ட்ரி-லெவல் ஹேட்ச்பேக் மாடலான டியாகோ, இந்தப் பட்டியலில் உள்ள மற்ற மூன்று கார்களிலிருந்தும் முற்றிலும் மாறுபட்டது. CNG மூலம் கிடைக்கும் எரிபொருள் சேமிப்பை தருவதோடு மட்டுமல்லாமல், வழக்கமாக CNG கார்களில் ஏற்படும் பூட் ஸ்பேஸ் பற்றாக்குறை மற்றும் வசதிக் குறைபாடுகள் இதில் இல்லாதவாறு வடிவமைக்கப்பட்டுள்ளது.

இதில் 1.2 லிட்டர், மூன்று சிலிண்டர் நேச்சுரலி அஸ்பிரேட்டட் பெட்ரோல் என்ஜின் பொருத்தப்பட்டுள்ளது. மேலும், இந்தப் பட்டியலில் CNG ஆப்ஷனுடன் மேனுவல் மட்டுமின்றி ஆட்டோமேட்டிக் AMT கியர்பாக்ஸ் வசதியையும் வழங்கும் ஒரே கார் டியாகோ மட்டுமே. CNG மோடில் இது அதிகபட்சமாக 75.5 PS பவரையும் 96.5 Nm டார்க்கையும் வெளிப்படுத்துகிறது.

இந்தப் பட்டியலில் டுயல் சிலிண்டர் அமைப்பைக் கொண்டுள்ள ஒரே மாடலும் இதுதான். சிலிண்டர்கள் பூட் ஸ்பேஸின் கீழ்ப்பகுதியில் வைக்கப்படுவதால், உங்கள் லக்கேஜ் ட்ரோலிகள் மற்றும் லேப்டாப் பேக்குகளை தாராளமாக வைக்கும் அளவிற்கு இடம் கிடைக்கிறது. டாப்-எண்ட் Creative Plus வேரியண்ட்டை தவிர மற்ற அனைத்து வேரியண்ட்களிலுமே CNG தேர்வு கிடைக்கிறது.

எனவே சில பிரீமியம் வசதிகளைத் தவிர்த்துவிட்டுப் பார்த்தால், தேவையான அனைத்து தொழில்நுட்பங்கள் மற்றும் தலைசிறந்த பாதுகாப்பு கட்டமைப்போடு ஒரு பக்காவான பேக்கேஜாக டியாகோ அமைகிறது.

டாடா டியாகோவின் வேரியண்ட்கள், விரிவான சிறப்பம்சங்கள், உங்கள் ஊருக்கான ஆன்-ரோடு விலை மற்றும் EMI விவரங்களை முழுமையாகத் தெரிந்து கொள்ள எங்களின் பிரத்யேக பையிங் கைடு கட்டுரையைத் தவறாமல் படியுங்கள்.

மாருதி சுஸூகி வேகன் R

வேரியண்ட்கள்: LXi மற்றும் VXi 

CNG வேரியண்ட் விலை: Rs 5.94 லட்சம் முதல் ரூ. 6.49 லட்சம் (எக்ஸ்-ஷோரூம்)

ஃபிட்மெண்ட் வகை: ஃபேக்டரிஃபிட்

தொடக்க விலையாக ரூ. 5.94 லட்சம் நிர்ணயிக்கப்பட்டுள்ள மாருதி வேகன் ஆர், இந்த தீபாவளிக்கு வாங்கக்கூடிய டாப் ஐந்து குறைந்த விலை CNG கார்களின் பட்டியலில் இறுதி இடத்தைப் பிடிக்கிறது.

வேகன் R மாடலின் ஆரம்ப நிலை இரண்டு வேரியண்ட்களில் மட்டுமே CNG கிடைக்கிறது. எஸ்-பிரஸ்ஸோ மற்றும் ஆல்டோ K10 கார்களில் இருக்கும் அதே 1 லிட்டர் நேச்சுரலி அஸ்பிரேட்டட் பெட்ரோல் என்ஜின்தான் இதிலும் பயன்படுத்தப்பட்டுள்ளது. அதேபோல ஆற்றல் அளவுகளும் மாறாமல் 57 PS பவர் மற்றும் 82.1 Nm டார்க்காகவே உள்ளது. இதன் மைலேஜ் ஒரு கிலோவுக்கு 33.47 கி.மீ என சான்றளிக்கப்பட்டுள்ளது. இது மேனுவல் கியர்பாக்ஸ் தேர்வில் மட்டுமே விற்பனைக்குக் கிடைக்கிறது. மாருதி வேகன் R CNG அதிகப்படியான ஆடம்பர வசதிகளையோ பிரீமியம் அனுபவத்தையோ தராவிட்டாலும் இந்தப் பட்டியலில் உள்ள கார்களிலேயே மிக அதிக இடவசதி கொண்ட காராக தனித்து நிற்கிறது.

கார்தேக்கோவின் கருத்து...

டாடா டியாகோவின் டாப் வேரியண்ட்களைத் தவிர்த்துவிட்டுப் பார்த்தால் இந்தியாவில் குறைந்த பட்ஜெட்டில் கிடைக்கும் CNG கார்கள் ஆடம்பரத்தை விட சிக்கனத்திற்கும் பயன்பாட்டிற்குமே முக்கியத்துவம் தருகின்றன. ஆனால் தொடர்ந்து உயர்ந்து வரும் பெட்ரோல், டீசல் விலைகள் மற்றும் பண்டிகை கால டிராஃபிக் நெரிசல்களுக்கு மத்தியில், CNG காரை ஓட்டுவது உங்கள் பாக்கெட்டிற்கு மட்டுமல்லாமல் சுற்றுப்புறச் சூழலுக்கும் மிகவும் நல்லது. இதன் குறைந்த பராமரிப்பு மற்றும் எரிபொருள் செலவால் மிச்சமாகும் பணத்தைக் கொண்டு இந்த பண்டிகைக் காலத்தில் உங்கள் குடும்பத்தினருக்கும் நண்பர்களுக்கும் கூடுதல் இனிப்புகளையும் பரிசுகளையும் வாங்கிக் குவிக்கலாம்!

இந்தப் பட்டியலில் இருந்து ஒரு காரைப் பரிந்துரைக்க வேண்டும் என்றால், பூட் ஸ்பேஸ் குறையாத டுயல் சிலிண்டர் அமைப்பு மற்றும் ஆட்டோமேட்டிக் கியர்பாக்ஸ் வசதிக்காக டாடா டியாகோவை நாங்கள் தேர்வு செய்வோம். மிகக் குறைந்த பட்ஜெட்டில் அதிக இடவசதி மட்டுமே உங்கள் முதன்மைத் தேவை என்றால் வேகன் ஆர் சரியான முடிவு. இவை தவிர சாதாரண நகரப் பயன்பாட்டிற்கு மட்டும் ஒரு கார் போதும் என்பவர்களுக்கு மாருதி எஸ்-பிரஸ்ஸோ, ஆல்டோ K10 மற்றும் ரெனால்ட் க்விட் ஆகியவை மிகச் சிறந்த ஆப்ஷன்களாக இருக்கும்.

உங்கள் ஊரில் இந்த கார்களுக்கு கிடைக்கும் தற்போதைய தள்ளுபடி சலுகைகள் மற்றும் ஆன்-ரோடு விலைகளைத் தெரிந்து கொள்ள எங்கள் தளத்தின் பிரத்யேக மாடல் பக்கங்களை உடனே பார்வையிடுங்கள்!