தீபாவளிக்கு புது கார் வாங்கும் பிளானா? ரூ.10 லட்சத்துக்குள்ள சன்ரூஃப் உடன் கிடைக்கும் 10 கார்கள்!

இந்தியாவில் பண்டிகைக்காலம் தொடங்க உள்ள நிலையில் தீபாவளி பண்டிகையை முன்னிட்டு புதிய கார் வாங்க பலரும் திட்டமிட்டு வருகின்றனர். ஒரு காலத்தில் ஆடம்பர கார்களில் மட்டுமே காணப்பட்ட 'சன்ரூஃப்' அம்சம், வாடிக்கையாளர்களின் அதிகப்படியான தேவையின் காரணமாக தற்போது பட்ஜெட் கார்களிலும் பரவலாக வழங்கப்படுகிறது.

நடப்பு தீபாவளி பண்டிகைக்கு பட்ஜெட்டைத் தாண்டாமல் சன்ரூஃப் வசதியுடன் கூடிய புதிய காரை வாங்க விரும்புவோருக்கு ரூ. 10 லட்சத்திற்குள் பல சிறந்த தேர்வுகள் சந்தையில் உள்ளன. அந்த வகையில் இந்தியாவில் ரூ. 10 லட்சத்திற்கும் குறைவான விலையில் சன்ரூஃப் அம்சத்தை வழங்கும் 10 மலிவான கார்களின் பட்டியலையும் அவற்றின் வேரியண்ட்கள் மற்றும் எக்ஸ்-ஷோரூம் விலைகளையும் கீழே விரிவாகக் காணலாம்.

ஹூண்டாய் i20

*அனைத்தும் எக்ஸ்-ஷோரூம் விலைகள்

இந்திய சந்தையில் சன்ரூஃப் வசதியுடன் கிடைக்கும் மிகக் குறைந்த விலை கார் என்ற பெருமையை ஹூண்டாய் i20 பெறுகிறது. இதிலுள்ள மேக்னா வேரியண்ட்டில் இருந்தே சன்ரூஃப் வசதி வழங்கப்படுகிறது. இதன் எக்ஸ்-ஷோரூம் விலை ரூ. 7.04 லட்சத்தில் தொடங்குகிறது. ஆரம்ப நிலை வேரியண்ட்களிலேயே சன்ரூஃப் கிடைப்பது முதல்முறை கார் வாங்குவோரை வெகுவாகக் கவர்ந்துள்ளது. அத்துடன் ஹூண்டாய் நிறுவனத்தின் நம்பகத்தன்மை மற்றும் சிறந்த விற்பனைக்குப் பிந்தைய சேவை ஆகியவை இதன் விற்பனைக்கு கூடுதல் பலமாக அமைகின்றன.

டாடா அல்ட்ராஸ்

*அனைத்தும் எக்ஸ்-ஷோரூம் விலைகள்

i20 மாடலுக்கு நேரடி போட்டியாகக் களமிறங்கும் டாடா அல்ட்ராஸ், இந்த வரிசையில் அடுத்த இடத்தைப் பிடிக்கிறது. இருப்பினும் இதில் ஆரம்பகட்ட வேரியண்ட்களில் சன்ரூஃப் வழங்கப்படவில்லை. நடுத்தர வேரியண்ட்டான பியூர் (எஸ்) மாடலிலிருந்து தான் சன்ரூஃப் வசதி தொடங்குகிறது. ரூ. 7.45 லட்சம் எக்ஸ்-ஷோரூம் விலையில் கிடைக்கும் இந்த வேரியண்ட்டில் பல்வேறு பயனுள்ள சொகுசு அம்சங்களும் இடம்பெற்றுள்ளன. மேலும் அல்ட்ராஸ் கார் பெட்ரோல், டீசல் மற்றும் CNG ஆகிய மூன்று வகையான இன்ஜின் தேர்வுகளிலும் கிடைக்கிறது.

டாடா பன்ச்

*அனைத்தும் எக்ஸ்-ஷோரூம் விலைகள்

இந்தியாவில் அதிகம் விற்பனையாகும் கார்களின் பட்டியலில் தொடர்ந்து இடம் பிடிக்கும் டாடா பன்ச் மைக்ரோ-எஸ்யூவி அடுத்த இடத்தில் உள்ளது. இதன் பியூர் பிளஸ் (S) பெட்ரோல் மேனுவல் வேரியண்ட்டில் (ரூ. 7.51 லட்சம்) இருந்து சன்ரூஃப் வசதி வழங்கப்படுகிறது. ஹேட்ச்பேக் காரின் பயன்பாட்டையும் எஸ்யூவி காரின் தோற்றத்தையும் ரூ. 10 லட்சத்திற்குள் எதிர்பார்ப்பவர்களுக்கு டாடா பன்ச் ஒரு சிறந்த தேர்வாகும்.

கியா சோனெட்

*அனைத்தும் எக்ஸ்-ஷோரூம் விலைகள்

மிகக் குறைந்த விலையில் சன்ரூஃப் வசதியுடன் கிடைக்கும் காம்பேக்ட் எஸ்யூவி கியா சோனெட் ஆகும். இதன் HTE (O) வேரியண்ட்டிலேயே (ரூ. 7.87 லட்சம்) சன்ரூஃப் வழங்கப்படுகிறது. பிரிமியம் தரத்திலான உள்கட்டமைப்பு, சௌகரியமான பயணம் மற்றும் நவீன அம்சங்களால் சோனெட் வாடிக்கையாளர்களை வெகுவாகக் கவர்ந்து வருகிறது. இதில் பெட்ரோல் மற்றும் டீசல் எஞ்சின் ஆப்ஷன்கள் உள்ளன.

ஹூண்டாய் எக்ஸ்டர்

*அனைத்தும் எக்ஸ்-ஷோரூம் விலைகள்

அளவில் சிறியதாக இருந்தாலும் அம்சங்களில் அசத்தும் காராக ஹூண்டாய் எக்ஸ்டர் உள்ளது. இதன் நடுநிலை வேரியண்ட்டான HX 4+ (AMT டிரான்ஸ்மிஷன்) மாடலில் இருந்து சன்ரூஃப் வசதி தொடங்குகிறது. இதன் விலை ரூ. 8.13 லட்சமாகும். எக்ஸ்டர் மாடலானது பெட்ரோல் மற்றும் CNG ஆகிய இரு விருப்பங்களிலும் விற்பனைக்குக் கிடைக்கிறது.

ஸ்கோடா கைலாக்

*அனைத்தும் எக்ஸ்-ஷோரூம் விலைகள்

இப்பட்டியலில் இடம்பெற்றுள்ள ஒரே ஜெர்மன் தயாரிப்பு ஸ்கோடா கைலாக் மட்டுமே. இதன் 'கிளாசிக் பிளஸ்' மேனுவல் வேரியண்ட்டில் (ரூ. 8.29 லட்சம்) இருந்து சன்ரூஃப் வசதி வழங்கப்படுகிறது. குறைந்த பட்ஜெட்டில் ஓட்டுவதற்கு ஜாலியான நவீன அம்சங்கள் கொண்ட காரைத் தேடுபவர்களுக்கு இது ஏற்ற தேர்வு.

டாடா நெக்ஸான்

*அனைத்தும் எக்ஸ்-ஷோரூம் விலைகள்

ரூ. 10 லட்சத்திற்குள் சன்ரூஃப் வழங்கும் டாடாவின் மூன்றாவது கார் நெக்ஸான். இதன் 'ஸ்மார்ட் பிளஸ் (S)' வேரியண்ட்டில் (ரூ. 8.51 லட்சம்) இருந்து சன்ரூஃப் கிடைக்கிறது. உயர் வேரியண்ட்களில் பானரோமிக் சன்ரூஃப் வசதியும் உண்டு. பெட்ரோல், டீசல், மேனுவல் மற்றும் ஆட்டோமேட்டிக் என அனைத்து வகையான தேர்வுகளிலும் இது கிடைக்கிறது.

மாருதி டிசையர்

*அனைத்தும் எக்ஸ்-ஷோரூம் விலைகள்

இந்தியாவில் சன்ரூஃப் வசதியுடன் கிடைக்கும் ஒரே காம்பேக்ட் செடான் கார் மாருதி டிசையர் மட்டுமே. இதன் டாப்-எண்ட் வேரியண்ட்டான ZXi Plus (ரூ. 8.96 லட்சம்) எலக்ட்ரிக்கலி அட்ஜஸ்டபிள் சன்ரூஃப் வசதியைக் கொண்டுள்ளது. சிறந்த மைலேஜ், நம்பகமான எஞ்சின் மற்றும் குடும்பங்களுக்கு ஏற்ற சௌகரியம் இதன் பிளஸ் பாயிண்ட்களாகும்.

ஹூண்டாய் வென்யூ

*அனைத்தும் எக்ஸ்-ஷோரூம் விலைகள்

சமீபத்தில் புதிய தலைமுறை மாற்றங்களுடன் வெளியான ஹூண்டாய் வென்யூ தனது HX 5 பெட்ரோல் மேனுவல் வேரியண்ட்டில் (ரூ. 9.55 லட்சம்) இருந்து சன்ரூஃப் வசதியை வழங்குகிறது. நீண்டகாலமாக காம்பேக்ட் எஸ்யூவி பிரிவில் முன்னணி தேர்வாக இருந்துவரும் இக்கார், பலதரப்பட்ட எஞ்சின் மற்றும் டிரான்ஸ்மிஷன் தேர்வுகளுடன் கிடைக்கிறது.

மாருதி பிரெஸ்ஸா

*அனைத்தும் எக்ஸ்-ஷோரூம் விலைகள்

இப்பட்டியலை நிறைவு செய்யும் மாருதி பிரெஸ்ஸா காரில், புதிய 1.0 லிட்டர் டர்போ பெட்ரோல் எஞ்சின் அறிமுகம் செய்யப்பட்டுள்ளது. ரூ. 9.94 லட்சம் விலையுடைய ZXi 1.0 டர்போ மேனுவல் வேரியண்ட்டில் சன்ரூஃப் வசதி உள்ளது. விசாலமான கேபின் மற்றும் மாருதியின் மீதான மக்களின் நம்பிக்கை காரணமாக இதன் விற்பனை தொடர்ந்து உச்சத்தில் உள்ளது.

கார்தேக்கோ சொல்வது...

ரூ. 10 லட்சத்திற்குள் சன்ரூஃப் கொண்ட காரை வாங்க விரும்பினால் ஹேட்ச்பேக், செடான், எஸ்யூவி என அனைத்து பிரிவுகளிலும் தாராளமான வாய்ப்புகள் உள்ளன.

பிரிமியம் ஹேட்ச்பேக் வேட்டைக்கு ஹூண்டாய் i20 மற்றும் டாடா ஆல்ட்ராஸ் சிறந்தவை. பட்ஜெட் பயன்பாட்டிற்கு டாடா பன்ச், ஹூண்டாய் எக்ஸ்டர் மற்றும் மாருதி டிசையர் ஏற்றவை. அதேபோல கம்பீரமான எஸ்யூவி தோற்றத்திற்கு கியா சோனெட், ஸ்கோடா கைலாக், டாடா நெக்ஸான், ஹூண்டாய் வென்யூ மற்றும் மாருதி பிரெஸ்ஸா ஆகிய மாடல்கள் மிகச் சிறந்த தேர்வாக இருக்கும்.

உங்கள் தேவைக்கும் பட்ஜெட்டிற்கும் ஏற்றவாறு இந்த விருப்பங்களில் இருந்து எந்த காரை இந்த தீபாவளிக்கு வீட்டிற்கு கொண்டு வரப் போகிறீர்கள் என்பதை கமெண்ட்டில் சொல்லுங்கள்!