காரில் 'சீட் வென்டிலேஷன்' வசதி வேணுமா? பட்ஜெட் விலையில் கிடைக்கும்10 கார்கள் இவைதான்!
இந்தப் பட்டியலில் உள்ள மிகவும் விலை உயர்ந்த கார் கூட ரூ. 13 லட்சத்திற்கும் குறைவான விலையிலேயே இருக்கைகளைக் குளிர்விக்கும் வசதியை வழங்குகிறது என்பது குறிப்பிடத்தக்கது.
- ஒரு கருத்தை எழுதுக
ஒவ்வொரு ஆண்டும் ஃபேஸ்லிப்ட் மற்றும் புதிய பதிப்புகள் மூலமாக நமது சந்தையில் உள்ள கார்கள் மென்மேலும் சிறந்ததாக மாறி வருகின்றன. இந்த மாற்றங்களின் பெரும் பகுதி நவீன வடிவமைப்புகளுக்கு வழங்கப்பட்டாலும், சில ஆண்டுகளுக்கு முன்பு வரை மிகவும் விலை உயர்ந்த கார்களில் மட்டுமே கிடைத்து வந்த பல வசதிகள், தற்போது சாமானிய மக்களுக்கான கார்களிலும் அறிமுகப்படுத்தப்படுவதைப் பார்க்க முடிகிறது.
அப்படிப்பட்ட ஒரு அம்சம்தான் இருக்கைகளைக் குளிர்விக்கும் வசதி. சிறிய ரக கார்களில் தொடங்கி தற்போது பெரும்பாலான புதிய கார்களில் இந்த வசதி வழங்கப்பட்டு வருகிறது. காரின் உட்புற அனுபவத்தை மேம்படுத்துவதுடன் நீண்ட தூரப் பயணங்களின் போது உங்கள் பின்பகுதியையும் முதுகையும் குளிர்ச்சியாக வைத்திருந்து சௌகரியத்தை உறுதி செய்வதால் காரின் முக்கிய அம்சங்களின் பட்டியலில் இதுவும் ஒன்றாக மாறியுள்ளது.
விரைவில் ஒரு புதிய காரை வாங்கத் திட்டமிட்டிருக்கிறீர்கள், அதில் இருக்கைகளைக் குளிர்விக்கும் வசதி மிகவும் முக்கியம் என்று நீங்கள் நினைத்தால் இந்த வசதியுடன் வரும் 10 மிகவும் மலிவான கார்களின் பட்டியலை இங்கே பார்க்கலாம்.
டாடா ஏரிஸ்
பதிப்பு: அக்கம்பிளிஸ்டு, அக்கம்பிளிஸ்டு CNG
விலை: ரூ. 8.19 லட்சம் முதல் ரூ. 9.74 லட்சம் வரை
நமது பட்டியலில் உள்ள முதல் கார் இதிலேயே மிகவும் புதிய காராகும். தற்போது விற்பனையில் இருந்து விடைபெறும் டாடா டிகோருக்கு மாற்றாக வந்துள்ள டாடா ஏரிஸ் இந்தியாவில் இருக்கைகளைக் குளிர்விக்கும் வசதியை வழங்கும் மிகவும் மலிவான கார் ஆகும்.
இந்த சிறிய ரக காரின் உயர்ந்த பதிப்பான அக்கம்பிளிஸ்டு பதிப்பில் மட்டுமே இந்த வசதி கிடைக்கிறது. அனைத்து டாடா கார்களைப் போலவே ஒவ்வொரு இருக்கையின் பக்கவாட்டிலும் இந்த வசதியை செயல்படுத்துவதற்கான தனிப்பட்ட பட்டன்கள் கொடுக்கப்பட்டுள்ளன. இதில் மூன்று நிலைகளில் குளிர்ச்சியைப் பெற முடியும். மேலும் இது மிகவும் குறைந்த சத்தத்துடனே இயங்குகிறது.
ரெனால்ட் கைகர்
பதிப்பு: எமோஷன்
விலை: ரூ. 8.50 லட்சம் முதல் ரூ. 10.40 லட்சம் வரை
வெப்பத்தை எதிர்க்கும் இருக்கைகளைக் கொண்ட இதன் இரட்டை மாடலான நிஸான் மேக்னைட் போலல்லாமல் ரெனால்ட் கைகர் காரின் உயர்ந்த பதிப்பான எமோஷன் பதிப்பில் முன்பக்க இருக்கைகளைக் குளிர்விக்கும் வசதி சரியாக வழங்கப்பட்டுள்ளது.
இதன் இயக்கம் என்று பார்த்தால் மையப்பகுதி குளிரூட்டி துளைகளுக்கு கீழே இருபுறமும் முன்பக்க இருக்கைகளைக் குளிர்விப்பதற்கான தனித்தனி பட்டன்கள் கொடுக்கப்பட்டுள்ளன. இதுவும் மூன்று வித்தியாசமான குளிர்ச்சி நிலைகளை வழங்குகிறது. ஆனால் இயங்கும்போது லேசாகச் சத்தம் கேட்கக்கூடும்.
மாருதி பலேனோ
பதிப்பு: ஆல்ஃபா, ஆல்ஃபா (O)
விலை: ரூ. 9.10 லட்சம் முதல் ரூ. 9.99 லட்சம் வரை
நமது பட்டியலில் அடுத்ததாக இருப்பது சமீபத்தில் மாற்றியமைக்கப்பட்ட மாருதி பலேனோ ஆகும். இந்த புதிய மாற்றங்களில் வடிவமைப்பில் செய்யப்பட்ட மாற்றங்கள் மிகக் குறைவாகவே உள்ளன. ஆனால் இப்போது சில கூடுதல் வசதிகள் சேர்க்கப்பட்டுள்ளன. அதில் ஒன்றுதான் முன்பக்க இருக்கைகளைக் குளிர்விக்கும் வசதி. இந்த காரின் மிக உயர்ந்த பதிப்பிற்கு முந்தைய பதிப்பில் இருந்தே இந்த வசதி இடம்பெற்றுள்ளது.
புதிய பலேனோவில் முன்பக்க இருக்கைகளைக் குளிர்விப்பதற்கான பட்டன்கள் குளிரூட்டி கட்டுப்பாட்டு பலகைக்கு கீழே சார்ஜிங் போர்டுகளுக்கு நடுவே வைக்கப்பட்டுள்ளன. இதில் மூன்று குளிர்ச்சி நிலைகள் உள்ளன. இது மிக விரைவாகச் சத்தம் எழுப்பினாலும். சில வினாடிகளிலேயே உங்களது பின்புறத்தில் குளிர்ச்சியை ஏற்படுத்தத் தொடங்கிவிடும்.
மாருதி பிரெஸ்ஸா
பதிப்பு: ZXi +
விலை: ரூ. 11.26 லட்சம் முதல் ரூ. 13.71 லட்சம் வரை
பலேனோவில் இந்த வசதி வருவதற்கு முன்பே, பிரெஸ்ஸா காரின் புதிய பதிப்பு அறிமுகம் செய்யப்பட்டபோதே முன்பக்க இருக்கைகளைக் குளிர்விக்கும் வசதியுடன் வந்தது. பலேனோவைப் போலல்லாமல் பிரெஸ்ஸா தனது ஹையர் வேரியண்டில் பதிப்பில் மட்டுமே இதை வழங்குகிறது. இது பலேனோவைப் போலவே இயங்குகிறது.
இதில் அதே மூன்று நிலையிலான குளிர்ச்சி அதே போன்ற பட்டன் வடிவமைப்பு மற்றும் பயன்படுத்தும்போது அதே அளவிலான சத்தத்தையே பெற முடிகிறது. இருப்பினும் பிரெஸ்ஸாவில் இந்த வசதியை இயக்குவதற்கான பட்டன்கள் கப் ஹோல்டர்களுக்குச் சற்று முன்னால் அமைக்கப்பட்டிருக்கும்.
சிட்ரோன் பசால்ட் X
பதிப்பு: மேக்ஸ்
விலை: ரூ. 11.34 லட்சம் முதல் ரூ. 14.11 லட்சம் வரை
நமது சந்தையில் உள்ள சில கூபே வகை கார்களில் சிட்ரோன் பசால்ட் X ஒன்றாகும். இது கடந்த ஆண்டு "X" என்ற பெயருடன் புதுப்பிக்கப்பட்டது. இதில் சில புதிய வசதிகள் சேர்க்கப்பட்டு பசால்ட் X காரை மேலும் மதிப்புமிக்கதாக மாற்றியது. அந்த புதுப்பிப்பில் சேர்க்கப்பட்ட அம்சங்களில் ஒன்றுதான் முன்பக்க இருக்கைகளைக் குளிர்விக்கும் வசதி.
வடிவமைப்பைப் பொறுத்தவரையில் சிட்ரோன் நிறுவனம் டாடாவின் அம்சங்களில் இருந்து பாடம் கற்றுக் கொண்டுள்ளது. ஏனெனில் இருக்கைகளைக் குளிர்விப்பதற்கான பட்டன் பார்ப்பதற்கு அதுபோல இருப்பது மட்டுமின்றி ஒவ்வொரு இருக்கையின் பக்கவாட்டிலும் அமைக்கப்பட்டிருக்கிறது. செயல்பாட்டைப் பொறுத்தவரை விசிறி இயங்கும் சத்தம் கேட்கிறது. ஆனால் மிதமான சத்தத்தில் பாடல்களை வாசித்தால் அந்தச் சத்தம் மறைந்துவிடும்.
கியா சோனெட்
பதிப்பு: HTX, GTX +, X-Line
விலை: ரூ. 11.75 லட்சம் முதல் ரூ. 13.80 லட்சம் வரை
கியா சோனெட் நீண்ட காலமாக பெரிய மாற்றங்கள் எதையும் பெறவில்லை. ஆனால் அது முன்பக்க இருக்கைகளைக் குளிர்விக்கும் வசதியை வழங்கி வருகிறது. மேலும் மேலே குறிப்பிடப்பட்ட பிற கார்களைப் போலல்லாமல் இந்த காரின் நடுத்தர பதிப்பில் இருந்தே இந்த வசதியைப் பெற முடியும்.
செயல்பாட்டைப் பொறுத்தவரையில் குளிரூட்டி கட்டுப்பாட்டு பலகைக்கு கீழே 360-டிகிரி கேமரா மற்றும் க்ரூஸ் பட்டன்களுக்கு பக்கத்தில் இதற்கான பட்டன்கள் கொடுக்கப்பட்டுள்ளன. காரை ஓட்டும்போது சாலையிலிருந்து பார்வையை திருப்பாமல் இந்த பட்டன்களை எளிதாகப் பயன்படுத்த முடியும். மேலும் இந்த வசதி அதிக சத்தத்தையும் ஏற்படுத்துவதில்லை.
ஸ்கோடா கைலாக்
பதிப்பு: பிரெஸ்டீஜ், பிரெஸ்டீஜ் +
விலை: ரூ. 11.75 லட்சம் முதல் ரூ. 12.99 லட்சம் வரை
பிரெஸ்ஸா மற்றும் சோனெட்டுக்கு பிறகு சிறிய ரக கார் பிரிவில் முன்பக்க இருக்கைகளைக் குளிர்விக்கும் வசதியை வழங்கும் அடுத்த கார் ஸ்கோடா கைலாக் ஆகும். ஆனால் குளிர்ச்சியூட்டும் வசதியுடன் சேர்த்து கைலாக் இரு முன்பக்க இருக்கைகளுக்கும் எலக்ட்ரிக் முறையில் மாற்றி அமைக்கும் வசதியையும் வழங்குகிறது.
பிற ஸ்கோடா கார்களைப் போலவே கைலாக்கிலும் தொடுதிரை குளிரூட்டி கட்டுப்பாட்டு பலகை உள்ளது. இது கார் இயங்கிக் கொண்டிருக்கும்போது பயன்படுத்த சற்று கடினமாக இருக்கலாம். அதிர்ஷ்டவசமாக இருக்கைகளைக் குளிர்விப்பதற்கான கட்டுப்பாடுகள் தொடுதிரை அல்லாத சாதாரண பட்டன்களாக குளிரூட்டி கட்டுப்பாட்டு பலகைக்குச் சற்று மேலே கொடுக்கப்பட்டுள்ளன. இங்கே குளிர்ச்சி தொடங்குவதற்கு சில வினாடிகள் ஆகும். ஆனால் சத்தம் மிகக் குறைவாகவே இருக்கும்.
ஹூண்டாய் வென்யூ
பதிப்பு: HX 8, HX 8 நைட், HX 10, HX 10 நைட்
விலை: ரூ. 11.95 லட்சம் முதல் ரூ. 15.83 லட்சம் வரை
சிறிய ரக கார் பிரிவில் முன்பக்க இருக்கைகளைக் குளிர்விக்கும் வசதியை வழங்கும் அடுத்த கார் ஹூண்டாய் வென்யூ. இதில் உயர்ந்த இரண்டு பதிப்புகள் மற்றும் சிறப்பு நைட் பதிப்புகளில் இந்த வசதி கொண்ட இருக்கைகள் கிடைக்கும்.
புதிய வென்யூவில் பெரும்பாலான வசதிகளுக்குப் பெரிய பட்டன்கள் வழங்கப்பட்டுள்ளதால் கியர் அமைப்பின் இருபுறமும் அமைந்துள்ள இருக்கைக் குளிர்விப்பு கட்டுப்பாடுகளை எளிதாக அணுக முடியும். மூன்று வித்தியாசமான நிலைகள் மூலம் உங்களுக்கு எவ்வளவு குளிர்ச்சி தேவை என்பதைத் தேர்ந்தெடுக்கலாம். மேலும் இந்த அம்சம் கிட்டத்தட்டச் சத்தமில்லாமல் இயங்குகிறது.
டாடா நெக்ஸான்
பதிப்பு: ஃபியர்லெஸ் + PS
விலை: ரூ. 12.42 லட்சம் முதல் ரூ. 14.52 லட்சம் வரை
டாடா நெக்ஸான் சில காலமாகவே இருக்கைகளைக் குளிர்விக்கும் வசதியை வழங்கி வருகிறது. இது உயர்ந்த பதிப்பிற்கு மட்டுமே வரம்பிடப்பட்டுள்ளது. இந்த பதிப்பின் ரெட் டார்க் டார்க் மற்றும் கேமோ உட்பதிப்புகளிலும் இந்த வசதியைப் பெறலாம்.
மற்ற அனைத்து டாடா கார்களைப் போலவே இந்த அம்சத்தை இயக்குவதற்கான பட்டன்கள் இருக்கையின் பக்கவாட்டில் அமைக்கப்பட்டுள்ளன. மேலும் இங்கும் இந்த அம்சம் எதிர்பார்த்தபடியே இயங்குகிறது.
சிட்ரோன் ஏர்கிராஸ் X
பதிப்பு: மேக்ஸ்
விலை: ரூ. 11.62 லட்சம் முதல் ரூ. 14.72 லட்சம் வரை
பசால்ட்டைப் போலவே ஏர்கிராஸ் மாடலும் புதிய "X" என்ற பெயரைப் பெற்றது. இது முன்பக்க இருக்கைகளைக் குளிர்விக்கும் வசதி போன்ற புதிய அம்சங்களை உள்ளே கொண்டு வந்தது. சிட்ரோன் ஏர்கிராஸ் X காரின் உயர்ந்த பதிப்பில் இந்த வசதி கிடைக்கிறது. இதன் விலை நிர்ணயம் காரணமாக இது நமது பட்டியலில் இடம்பிடித்துள்ளது.
இந்தப் பட்டியலில் உள்ள மற்ற அனைத்து கார்களைப் போலவே மூன்று குளிர்ச்சி நிலைகளுடன் கூடிய இருக்கைக் குளிர்விப்பு பட்டன் இருக்கையின் பக்கவாட்டில் கொடுக்கப்பட்டுள்ளது. பயன்படுத்தும் போது ஃபேன் லேசான சத்தத்தை எழுப்புகின்றன. ஆனால் அது உங்களை எரிச்சலூட்டும் அளவுக்கு அதிகமாக இருக்காது.
கார்தேக்கோவின் பார்வை...
கோடைகாலத்தில் வெப்பநிலை எளிதாக 40 டிகிரி செல்சியஸைத் தாண்டும் நமது காலநிலைக்கு சில நிமிடங்களில் நம்மைக் குளிர்விக்கக்கூடிய ஒரு கார் இருப்பது ஒரு வரப்பிரசாதமாக உணர்விக்கும். அனைத்து கார்களிலுமே சிறந்த வேலையைச் செய்யக்கூடிய ஏசி வழங்கப்பட்டிருந்தாலும் இருக்கைகளைக் குளிர்விக்கும் வசதி இருப்பது கூடுதல் சிறப்பு. ஏனெனில் இது உங்களது முதுகு வேர்ப்பதைத் தடுப்பதுடன் நீங்கள் நன்றாகத் தளர்வடையவும் உதவுகிறது.
ரூ. 10 லட்சத்திற்குள் இந்த வசதியை வழங்கும் சிறந்த பட்ஜெட் கார்களாக டாடா ஏரிஸ் ரெனால்ட் கைகர் மற்றும் மாருதி பலேனோ ஆகியவை உள்ளன. உங்களுக்குப் பெரிய கார் வேண்டுமென்றால் டாடா நெக்ஸான், ஹூண்டாய் வென்யூ, கியா சோனெட், மாருதி பிரெஸ்ஸா மற்றும் ஸ்கோடா கைலாக் போன்ற இருக்கைகளைக் குளிர்விக்கும் சொகுசை வழங்கும் சிறிய ரக கார் பிரிவை நீங்கள் பரிசீலிக்கலாம்.
நீங்கள் சிட்ரோன் பசால்ட் X காரையும் தேர்ந்தெடுக்கலாம். ஏனெனில் இது உங்களுக்கு ஒரு தனித்துவமான தோற்றத்தைத் தருகிறது. அதே வேளையில் சிட்ரோன் ஏர்கிராஸ் X விசாலமான 7 இருக்கைகள் கொண்ட காராக இருந்துகொண்டே இந்த வசதியை அளிக்கிறது. இந்தப் பிரிவில் பணத்திற்கு ஏற்ற சிறந்த தேர்வுகளாகவும் இந்த இரண்டு கார்கள் உள்ளன.
வரவிருக்கும் பண்டிகைக் காலத்தில் நீங்கள் ஒரு காரை வாங்கத் திட்டமிடுகிறீர்கள் என்றால் உங்களது பட்டியலில் இவற்றில் எந்த கார் இருக்கும்? கீழே உள்ள கமெண்ட் பகுதியில் எங்களுக்குத் தெரியப்படுத்துங்கள்
