அப்டேட் நல்லாருக்கு ஆனா இந்த 5 விஷயங்கள் இல்லையே ! - மஹிந்திரா தார் OG-யில் எதெல்லாம் மிஸ் ஆகிருக்கு ?

மஹிந்திரா நிறுவனம் தனது 'தார் 3-டோர்' மாடலை மீண்டும் ஒருமுறை அப்டேட் செய்து தற்போது அதற்கு 'OG' என்ற பெயரையும் சேர்த்துள்ளது. இந்த சமீபத்திய அப்டேட்டில் பல வெளிப்புற மாற்றங்கள் மற்றும் வசதிகள் வழங்கப்பட்டிருந்தாலும் இன்னும் சில முக்கியமான அம்சங்கள் விடுபட்டுள்ளன. புதிய 'தார் OG' மாடலில் கண்டிப்பாக இடம் பெற்றிருக்க வேண்டிய 5 முக்கிய வசதிகள் இதோ:

சாஃப்ட் டாப் ஆப்ஷன்

இரண்டாம் தலைமுறை தார் மாடல் 2020 -ல் அறிமுகப்படுத்தப்பட்டபோது சாஃப்ட்-டாப் (துணி போன்ற மேல்கூரை) மற்றும் ஹார்டு-டாப் (நிலையான மேல்கூரை) ஆகிய இரண்டு அமைப்புகளிலுமே விற்பனைக்கு வந்தது. இருப்பினும் மஹிந்திரா நிறுவனம் ஏப்ரல் 2025 ல் சாஃப்ட்-டாப் பதிப்பின் உற்பத்தியை நிறுத்தியது. தற்போது வந்துள்ள புதிய 'தார் OG' மாடலிலும் இந்த ஆப்ஷன் தவிர்க்கப்பட்டுள்ளது.

'தார்' வாகனத்தின் லைஃப்ஸ்டைல் சார்ந்த பயன்பாட்டைக் கருத்தில் கொள்ளும்போது, ஒரு சாஃப்ட்-டாப் பதிப்பு வழங்கப்பட்டிருந்தால் அது இந்த மாடலிற்கு மேலும் கூடுதல் ஈர்ப்பைக் கொடுத்திருக்கும்.

360-டிகிரி கேமரா

புதிய 'தார் OG' மாடலின் உயர் ரக 'ZXT' வேரியண்ட்டில் மட்டும் பின்புற பார்க்கிங் கேமரா வழங்கப்பட்டுள்ளது. இருப்பினும் இதன் பெரிய மாடலான 'தார் ராக்ஸ்' -ல் இருப்பது போன்ற 360-டிகிரி கேமரா அமைப்பு இதில் இன்னும் இடம்பெறவில்லை. பாதுகாப்பு மற்றும் பயன்பாட்டிற்கு மிகவும் உதவிகரமாக இருக்கும் இந்த வசதியை இந்த சமீபத்திய அப்டேட்டில் மஹிந்திரா நிறுவனம் 'தார் OG'-யில் கட்டாயம் வழங்கியிருக்க வேண்டும் என்று நாங்கள் நம்புகிறோம்.

இது குறுகலான இடங்களில் வாகனத்தை இயக்கிப் பார்க் செய்ய உதவுவது மட்டுமின்றி கரடுமுரடான ஆஃப்-ரோடு பாதைகளில் பயணிக்கும்போதும் டிரைவருக்கு மிகவும் பயனுள்ளதாக அமைந்திருக்கும்.

வென்டிலேட்டட் சீட்கள் 

புதிய மஹிந்திரா 'தார் OG' மாடலில் விடுபட்டுள்ள மற்றொரு முக்கிய அம்சம் 'வென்டிலேட்டட் சீட்கள்' (இருக்கைகளைச் குளிர்விக்கும் வசதி). 'தார் ராக்ஸ்' மாடலில் உள்ள இந்த வசதியை குறைந்தபட்சம் தார் OG-யின் டாப்-எண்ட் வேரியண்ட்டிலாவது மஹிந்திரா அளித்திருக்கலாம். இந்தியாவின் வெப்பமான காலநிலையைக் கருத்தில் கொண்டு பார்க்கும்போது குறிப்பாக உயர் ரக வேரியண்ட்களில் வென்டிலேட்டட் சீட்கள் வழங்கப்பட்டிருந்தால் அது வாடிக்கையாளர்களுக்கு மிகச் சிறந்த வரவேற்பைப் பெற்றிருக்கும்.

ஆட்டோமேட்டிக் கிளைமேட் கன்ட்ரோல் 

2020 -ல் இரண்டாம் தலைமுறை தார் அறிமுகமானபோது ஊடகங்கள் மற்றும் பொதுமக்களின் கவனத்தை ஈர்த்த அம்சங்களில் ஒன்று இதன் எலக்ட்ரானிக் முறையில் இயங்கும் ஏசி (AC). அறிமுகப்படுத்தப்பட்டதில் இருந்தே இரண்டாம் தலைமுறை தார் மாடலில் இதே அமைப்புதான் வழங்கப்பட்டு வருகிறது; தற்போதைய அப்டேட்டிலும் அது மாற்றப்படாமல் அப்படியே தொடர்கிறது.

மஹிந்திரா நிறுவனம் இந்த வாய்ப்பைப் பயன்படுத்தி 'தார் OG' மாடலில் ஆட்டோமேட்டிக் கிளைமேட் கன்ட்ரோல் வசதியை அறிமுகப்படுத்தியிருக்க வேண்டும். குறைந்தபட்சம் மிட்-ஸ்பெக் அல்லது உயர் ரக வேரியண்ட்களிலாவது இதை வழங்கியிருக்கலாம். மஹிந்திராவின் பிற SUV மாடல்களில் 'டூயல்-ஜோன் ஏசி' வசதியே இருக்கும்போது அப்டேட் செய்யப்பட்ட தாரில் ஆட்டோமேட்டிக் ஏசி வசதியை எதிர்பார்ப்பது தவறான ஒன்றல்ல.

வயர்லெஸ் ஆப்பிள் கார்பிளே

2025 மாடல் இயர்  அப்டேட்டில் வழங்கப்பட்ட அதே பெரிய 10.25-இன்ச் டச்ஸ்கிரீன் இன்ஃபோடெயின்மென்ட் சிஸ்டம்தான் 'தார் OG' மாடலிலும் உள்ளது. இந்த டிஸ்ப்ளே 'வயர்லெஸ் ஆண்ட்ராய்டு ஆட்டோ'வை மிகச் சிறப்பாக ஆதரவளிக்கும் அதே வேளையில் 'வயர்லெஸ் ஆப்பிள் கார்பிளே' வசதியை சப்போர்ட் செய்வதில்லை. இன்றைய காலத்தில் ஏராளமான ஐஃபோன் பயனர்கள் இருக்கும் நிலையில் இது ஒரு பெரிய குறையாகவே தெரிகிறது. ஏனெனில் கார்பிளே பயன்படுத்தும் நேரமெல்லாம் தொடர்ந்து கேபிள் வழியாகப் போனை கனெக்ட் செய்து சார்ஜிலேயே வைத்திருக்க வேண்டிய சூழல் ஏற்படுகிறது.

கார்தேக்கோவின் பார்வை...

'தார் OG' என்பது 3-டோர் தார் மாடலின் கூடுதல் வசதிகள் நிறைந்த ஒரு பதிப்பாக மாறியுள்ளது என்பதில் மாற்றுக் கருத்து இல்லை. இருப்பினும் சில முக்கிய அம்சங்கள் இன்னும் விடுபட்டுள்ளன. 360-டிகிரி கேமரா, வென்டிலேட்டட் சீட்கள் மற்றும் ஆட்டோமேட்டிக் கிளைமேட் கன்ட்ரோல் ஆகியவை அன்றாடப் பயன்பாட்டை மேலும் எளிதாக்கியிருக்கும். அதேபோல சாஃப்ட்-டாப் ஆப்ஷன் இதன் லைஃப்ஸ்டைல் ஈர்ப்பை மேலும் உயர்த்தியிருக்கும்.

இந்தக் குறைகள் எதுவும் இந்த வாகனத்தை வாங்கவே கூடாது என்பதற்கான பெரிய காரணங்கள் அல்ல. ஆனால் இவற்றில் சில வசதிகளைச் சேர்த்திருந்தால் கூட குறிப்பாக இதன் உயர் ரக விலைப் பிரிவில் 'தார் OG' இன்னும் ஒரு நிறைவான முழுமையான காராக மாறியிருக்கும்.