BS7 விதிகளை அமல்படுத்த ஒன்றிய அரசு திட்டம்... பழைய கார்களுக்கு பாதிப்பு உண்டா ?
தற்போது கார் வைத்திருப்பவர்களுக்கு இதன் மூலம் எந்தப் பாதிப்பும் இல்லை என்றாலும் புதிதாக கார் வாங்குபவர்கள் கூடுதல் பணம் செலவழிக்க வேண்டியிருக்கும்.
- ஒரு கருத்தை எழுதுக
இந்தியாவில் காற்று மாசுபாட்டைக் குறைக்கும் நோக்கில் புதிய பாரத் ஸ்டேஜ் VII (BS7) உமிழ்வு விதிகளுக்கான வரைவு அறிக்கையை மத்திய அரசு இன்னும் ஓரிரு நாட்களில் வெளியிடவுள்ளதாகத் தகவல்கள் வெளியாகியுள்ளன. இந்த புதிய விதிமுறைகள் வரும் 2029-ஆம் ஆண்டு ஏப்ரல் மாதம் முதல் அமலுக்கு வரவுள்ளன. தற்போது நடைமுறையில் இருக்கும் BS 6.2 விதிகளுடன் ஒப்பிடும்போது வாகனங்கள் வெளியிடும் புகையைக் பெருமளவில் கட்டுப்படுத்த இதில் பல முக்கிய மாற்றங்கள் செய்யப்பட்டுள்ளன.
எதிர்வரும் BS7 விதிகள் குறித்து இதுவரை வெளியாகியுள்ள தகவல்கள் மற்றும் இதனால் வாகன உரிமையாளர்களுக்கு ஏற்படப்போகும் தாக்கம் என்ன என்பது குறித்து விரிவாக இதில் காண்போம். முதலில் இதில் என்னென்ன புதிய மாற்றங்கள் வரவுள்ளன என்பதைப் பார்ப்போம்.
BS7 - என்னென்ன புதிய மாற்றங்கள்?
நுண்ணிய மாசுபடுத்திகளைக் கணித்தல்: BS7 விதிகளில் பெரும்பாலான மாசுபடுத்திகளின் அளவு வரம்பில் மாற்றமில்லை என்றாலும் இதுவரை 23 நானோமீட்டர் வரை மட்டுமே அளவிடப்பட்ட துகள்களின் அளவு, இனி 10 நானோமீட்டர் வரை துல்லியமாகக் கணக்கிடப்படும். ஏனெனில் சைலன்சரில் இருந்து வெளிவரும் இந்த மிக நுண்ணிய நச்சுத் துகள்கள் மனிதர்கள் சுவாசிக்கும்போது நேரடியாக நுரையீரலுக்குச் சென்று உடலுக்குப் பெரும் பாதிப்பை ஏற்படுத்துகின்றன.
புகை அல்லாத பிற மாசுபாடுகள்: BS 6.2 வரை சைலன்சரில் இருந்து வரும் புகையில் உள்ள நச்சுக்கள் மட்டுமே கணக்கில் கொள்ளப்பட்டன. ஆனால் புதிய BS7 விதிகளின் மூலம் டயர் தேய்மானம் மற்றும் பிரேக் பேட் உராய்வினால் காற்றில் கலக்கும் நுண்ணிய தூசிகளும் மாசுபாடாகக் கருதப்பட்டு கட்டுப்படுத்தப்படும். இதன் காரணமாக வாகனத் தயாரிப்பாளர்கள் BS7 விதிகளுக்கு ஏற்ப உயர்தர டயர்கள் மற்றும் பிரேக் பேட்களைப் பயன்படுத்த வேண்டிய கட்டாயம் ஏற்படும்.
ஆய்வகங்களைத் தாண்டி நிஜச் சாலைகளில் சோதனை: BS7 விதிகளின் கீழ் மாசுபாட்டைக் கண்காணிப்பதை தீவிரப்படுத்த, நிஜச் சாலைகளில் வாகனங்களை இயக்கி உமிழ்வுச் சோதனைகளை நடத்த அரசு திட்டமிட்டுள்ளது. மேலும் வாகனத்தின் ஆயுட்காலம் முழுதும் அது வெளியிடும் புகையைக் கண்காணிக்கச் சிறப்பு சென்சார்கள் காரில் பொருத்தப்படலாம்.
சுயாதீன ஏஜென்சிகள் மூலம் சோதனைகள்: BS7 விதிகளைப் பின்பற்றும் வாகனங்கள் சாலைக்கு வந்த பிறகு அவற்றைச் சுயாதீன ஏஜென்சிகள் மூலம் தோராயமாகச் சோதனை செய்யத் திட்டமிடப்பட்டுள்ளது. ஆனால், இந்த நடைமுறை எவ்வாறு செயல்படுத்தப்படும் என்பது குறித்து இன்னும் தெளிவான அறிவிப்பு வரவில்லை.
அமல்படுத்தப்படும் காலவரிசை
முந்தைய BS6 முறையைப் போலவே, BS7 விதிகளும் ஒரே அடியாக இல்லாமல் மூன்று கட்டங்களாகப் பிரிக்கப்பட்டு அமல்படுத்தப்படவுள்ளன.
முதல் கட்டம் - ஏப்ரல் 2029: முதற்கட்டமாக, 2029 ஏப்ரல் மாதம் முதல் தயாரித்து விற்பனைக்கு வரும் அனைத்துப் பயணிகள் கார்களும் புதிய BS7 விதிகளுக்கு உட்பட்டதாக இருக்க வேண்டும்.
இரண்டாம் கட்டம் - 2030: 2030-ஆம் ஆண்டிற்குள் நாடு முழுவதும் சரக்குகளை ஏற்றிச் செல்லப் பயன்படும் சிறிய வணிக வாகனங்களுக்கும் இந்த விதிகள் விரிவுபடுத்தப்படும்.
மூன்றாம் கட்டம் - ஏப்ரல் 2035: இறுதிப் கட்டமாக 2035 ஏப்ரல் முதல் லாரிகள் பேருந்துகள், கட்டுமான வாகனங்கள் மற்றும் அனைத்து வகையான கனரக வாகனங்களும் கட்டாயமாக BS7 விதிகளுக்கு மாற வேண்டும்.
தற்போது வரை இருசக்கர வாகனங்களுக்கான காலக்கெடு எதுவும் அறிவிக்கப்படவில்லை. எனினும் வாகன மாசுபாட்டில் இருசக்கர வாகனங்களின் பங்கே அதிகமாக இருப்பதால் இதற்கான அறிவிப்பு விரைவில் வெளியாகும் என எதிர்பார்க்கப்படுகிறது.
நிறைகள் & குறைகள்
இந்த புதிய உமிழ்வு விதிகள் நடைமுறைக்கு வருவதால் வாகனக் கொள்முதல் செய்வோருக்கும் தயாரிப்பாளர்களுக்கும் சில சாதக, பாதகங்கள் ஏற்படக்கூடும்.
நிறைகள்
எரிபொருளில் மாற்றமில்லை: BS4-ல் இருந்து BS6-க்கு மாறும்போது (நடுவில் BS5 தவிர்க்கப்பட்டது) எண்ணெய் சுத்திகரிப்பு நிலையங்கள் பில்லியன் கணக்கில் செலவு செய்து எரிபொருள் தரத்தை மாற்ற வேண்டியிருந்தது. ஆனால் BS7 விதிகளுக்கு எரிபொருள் தரத்தில் எந்த மாற்றமும் தேவையில்லை.
பழைய வாகன உரிமையாளர்களுக்குப் பாதிப்பில்லை: ஏற்கனவே கார்களை வைத்திருப்பவர்கள் தங்கள் வாகனங்களில் எந்த மாற்றமும் செய்யத் தேவையில்லை. அவர்களின் அனுமதித்த ஆயுட்காலம் முடியும் வரை எந்த இடையூறும் இன்றி காரைப் பயன்படுத்தலாம்
தூய்மையான காற்று: மிக நுண்ணிய துகள்கள் மற்றும் டயர், பிரேக் தூசிகளையும் கட்டுப்படுத்துவதால் காற்றில் உள்ள மாசுபாட்டின் அளவு கணிசமாகக் குறையும்
குறைகள்
விலை உயர்வு: புதிய BS7 விதிகளுக்கு ஏற்ப புதிய உதிரிபாகங்களை தயாரிக்க வாகன நிறுவனங்கள் பெருமளவில் முதலீடு செய்ய வேண்டும். இந்தச் செலவின் ஒரு பகுதி வாடிக்கையாளர்கள் மீது சுமத்தப்படுவதால், புதிய கார்களின் ஆரம்ப விலை அதிகரிக்கும்.
கனரக வாகனங்களுக்குப் பெரிய பாதிப்பு: லாரிகள் மற்றும் பேருந்துகள் தங்களின் மாசுபாட்டை 50 சதவீதம் வரை குறைக்க வேண்டும் என்பதால் BS7 விதிகளால் கனரக வாகனப் பிரிவே அதிகளவில் பாதிக்கப்படும். எனவே அவற்றின் விலையிலும் பெரிய அளவில் மாற்றம் இருக்கும்.
அடிக்கடி கேட்கப்படும் கேள்விகள்
1. BS7 உமிழ்வு விதிகள் எப்போது அமலுக்கு வரும்?
இந்திய அரசு BS7 விதிகளை மூன்று கட்டங்களாக நடைமுறைப்படுத்த உள்ளது. முதற்கட்டமாக ஏப்ரல் 2029-ல் பயணிகள் வாகனங்களுக்கும் 2030-ல் சிறிய வணிக வாகனங்களுக்கும், 2035-ல் கனரக வாகனங்களுக்கும் இந்த விதிகள் அமலாகும்.
2. எனது தற்போதைய அல்லது புதிய காருக்கு என்ன ஆகும்?
இந்த புதிய விதிகள் 2029 ஏப்ரல் மாதத்திற்குப் பிறகு உற்பத்தியாகும் வாகனங்களுக்கு மட்டுமே பொருந்தும். அதற்கு முன் தயாரிக்கப்பட்ட கார்களுக்கு எந்தப் பாதிப்பும் இருக்காது, அவற்றின் ஆயுட்காலமும் குறையாது.
3. BS6 விதிகளில் இருந்து BS7 எப்படி வேறுபடுகிறது?
BS7 விதியானது நுரையீரலுக்குப் பாதிப்பை ஏற்படுத்தும் 10 நானோமீட்டர் வரையிலான மிக நுண்ணிய நச்சுத் துகள்களையும் டயர் மற்றும் பிரேக் தேய்மானத்தால் வரும் புகையற்ற மாசுபாட்டையும் கணக்கில் கொள்கிறது. ஆனால் BS6 விதிகள் சைலன்சர் புகையை மட்டுமே, அதுவும் 23 நானோமீட்டர் வரை மட்டுமே கணக்கிட்டன.
4. புதிய BS7 விதிகளால் கார்களின் விலை உயருமா?
ஆம், புதிய விதிகளுக்கு ஏற்ப வாகனங்களை மேம்படுத்த நிறுவனங்கள் செய்யும் ஆராய்ச்சி மற்றும் மேம்பாட்டுச் செலவுகள் வாடிக்கையாளர்கள் தலையிலேயே விழும் என்பதால் கார்களின் விலை உயரும்.
5. எனது தற்போதைய அல்லது புதிய காருக்கு புதிய வகை எரிபொருள் தேவையா?
இல்லை, தற்போதைய எரிபொருளின் தரம் மற்றும் கலவையில் எந்த மாற்றமும் செய்யப்படவில்லை என்பதால் இதுகுறித்து கவலைப்படத் தேவையில்லை.
6. நான் புதிய கார் வாங்குவதைத் தள்ளிப்போட வேண்டுமா?
நிச்சயமாகத் தேவையில்லை. தற்போது விற்பனையில் உள்ள அனைத்து கார்களும் முழு தகுதியுடன் உள்ளன. மேலும் டெல்லியில் டீசலுக்கு 10 ஆண்டுகள் மற்றும் பெட்ரோலுக்கு 15 ஆண்டுகள் வரை வழக்கமான ஆயுட்காலம் கிடைக்கும். எனவே கார் வாங்கும் திட்டம் இருந்தால் தாராளமாக வாங்கலாம். BS7 வருவது உங்களுக்கான காரை விட சிறந்ததாக மாற்றிவிடாது.
7. டீசல் கார்களுக்கு இதனால் ஏதேனும் பாதிப்பு ஏற்படுமா?
தற்போதைக்கு டீசல் கார்களுக்கு என்று தனியாக எந்த அறிவிப்பும் வெளியாகவில்லை. எஞ்சின் கொண்ட அனைத்து ICE மாடல்களுக்கும் பொதுவாகவே இந்த மாற்றங்கள் பொருந்தும்.
கார்தேக்கோவின் கருத்து...
புதிய BS7 உமிழ்வு விதிகளின் வருகையால் புதிய கார் வாங்குபவர்களுக்கு சுற்றுச்சூழல் மாசுபாட்டைக் குறைக்கும் பசுமையான கார்கள் கிடைக்கப் போகின்றன. புகையைத் தாண்டி பிற மாசுபாடுகளையும் கண்காணிக்க அரசு எடுத்திருக்கும் முடிவு பாராட்டுக்குரியது.
இருப்பினும் இந்தச் சுற்றுச்சூழலுக்கு உகந்த கார்களைப் பெற வாடிக்கையாளர்கள் கூடுதல் பணத்தைச் செலவிட வேண்டியிருக்கும். ஏனெனில் தயாரிப்புச் செலவு நேரடியாக வாடிக்கையாளர்களிடமிருந்தே வசூலிக்கப்படும். தற்போதைய சூழலில் எரிபொருளில் மாற்றம் எதுவும் இல்லாததால், இப்போது கார் வாங்கும் திட்டம் இருந்தால் தாமதிக்காமல் உடனடியாக வாங்கலாம்!
