ரூ. 6 லட்சத்தில் கூட கிடைக்கும் 7-சீட்டர் கார்க… இந்த தீபாவளிக்குக் கையில் இருக்கும் 'டாப் 10' ஆப்ஷன்கள்!
காம்பேக்ட் MPV கார்கள் முதல் கரடுமுரடான பழைமையான SUV கார்கள் வரை இந்த 10 ஏழு இருக்கை கார்களும் இந்த தீபாவளி பண்டிகைக்கு உங்கள் குடும்பத்தினர் அனைவரையும் ஒன்றாக அழைத்துச் செல்லப் பல்வேறு சிறப்பான வழிகளை வழங்குகின்றன.
- ஒரு கருத்தை எழுதுக
இந்தியாவில் சாலைப் பயணங்கள் என்று வந்துவிட்டாலே 7-சீட்டர் கார்கள் வழங்கும் நடைமுறைப் பயன்பாட்டிற்கும் சௌகரியத்திற்கும் ஈடு இணையே இல்லை. வீட்டில் ஏழு பேர் இல்லை என்றாலும் கூட 3 வரிசை சீட்களைக் கொண்ட கார் வழங்கும் தாராளமான இடவசதி மற்றும் ஃப்ளெக்ஸிபிலிட்டி வேறு எந்த காரிலும் கிடைக்காது.
பொதுவாகக் கூடுதல் சீட்கள் கொண்ட பெரிய காரை வாங்க வேண்டுமென்றால் அதிக பணம் செலவழிக்க வேண்டும் என்ற எண்ணம் பலரிடம் உள்ளது. ஆனால் உண்மை அதுவல்ல சிறிய அளவிலான கார்களிலேயே 7 சீட்களை நேர்த்தியாகக் கொண்டு வந்த பல கார்களும் குறைந்த பட்ஜெட்டில் கிடைக்கும் பெரிய கார்களும் இன்று சந்தையில் உள்ளன. அந்த வகையில் இந்த தீபாவளிப் பண்டிகைக் காலத்தில் நீங்கள் வாங்கக்கூடிய இந்தியாவில் மிகவும் மலிவு விலையில் கிடைக்கும் 'டாப் 10' 7-சீட்டர் கார்களின் பட்டியலை இங்கு பார்ப்போம்.
நிஸான் கிராவிட்
விலை: ரூ. 5.73 லட்சம் முதல் 9.38 லட்சம் (எக்ஸ்-ஷோரூம்)
எரிபொருள் ஆப்ஷன்கள்: பெட்ரோல்
இந்தியாவிலேயே மிகக் குறைந்த விலையில் கிடைக்கும் 7-சீட்டர் கார் நிஸான் கிராவிட் ஆகும். இது உண்மையில் ரெனால்ட் டிரைபர் காரின் ரீ-பேட்ஜ் செய்யப்பட்ட மாடலாகும்.
டாடா நெக்ஸான் ஹூண்டாய் வென்யூ போன்ற 4 மீட்டருக்கும் குறைவான நீளம் கொண்ட கார்களின் அளவிலேயே, 7 சீட்களை இது மிகச் சிறப்பாகப் பேக் செய்துள்ளது. இதன் 3-வது வரிசை பெரியவர்களுக்குச் சற்றே நெருக்கடியாக இருந்தாலும், 2-வது வரிசை சீட்களை முன்னோக்கியும் பின்னோக்கியும் நகர்த்தும் வசதி இருப்பதால் ஓரளவிற்குச் சமாளிக்க முடியும். மேலும் 2 மற்றும் 3-வது வரிசை சீட்களை மடக்கி வைக்கும் வசதியும் உள்ளது.
ரெனால்ட் டிரைபர்
விலை: ரூ. 5.81 லட்சம் முதல் 9.20 லட்சம் (எக்ஸ்-ஷோரூம்)
எரிபொருள் ஆப்ஷன்கள்: பெட்ரோல்
தனது ரீ-பேட்ஜ் சகோதரரான நிசான் கிராவிட் வருவதற்கு முன்பு வரை ரெனால்ட் டிரைபர் தான் இந்தியாவின் மலிவு விலை 7-சீட்டர் காராக இருந்தது. 2019-ல் அறிமுகமான இந்த கார் சமீபத்தில் ஃபேஸ்லிஃப்ட் அப்டேட்டைப் பெற்றது. இதில் சேர்க்கப்பட்ட டர்போ-பெட்ரோல் என்ஜின் இதன் செயல்திறனை மேலும் சிறப்பாக்கியுள்ளது.
குறைந்த பட்ஜெட்டில் பயன்பாடு சௌகரியம் மற்றும் தினசரி அத்தியாவசிய வசதிகளை எதிர்பார்க்கும் குடும்பங்களுக்கு டிரைபர் ஒரு மிகச்சிறந்த ஆப்ஷனாகும். இதில் விரைவில் சிஎன்ஜி (CNG) மாடலையும் ரெனால்ட் கொண்டுவரவுள்ளது.
மஹிந்திரா பொலேரோ
விலை: ரூ. 8.49 லட்சம் முதல் ரூ. 9.99 லட்சம் (எக்ஸ்-ஷோரூம்)
எரிபொருள் ஆப்ஷன்கள்: டீசல்
இந்திய ஆட்டோமொபைல் சந்தையில் பல தலைமுறைகளாகக் கொடிகட்டிப் பறக்கும் பெயர் மஹிந்திரா பொலேரோ. நகரத்துக் குடும்பங்களுக்கு இது முதல் தேர்வாக இருக்காது என்றாலும் கிராமப்புறங்களில் இதற்கு இணையான ஒரு உழைப்பாளி கார் எதுவுமில்லை. சமீபத்திய அப்டேட்களில் லெதரெட் சீட்கள் போன்ற சில வசதிகளைப் பெற்றிருந்தாலும் இது பயன்பாட்டிற்கு மட்டுமே முன்னுரிமை அளிக்கும் ஒரு ரக்டு லேடர்-பிரேம் SUV ஆகும்.
இதில் 7 சீட்கள் இருப்பதாகக் கூறப்பட்டாலும் இதன் 3-வது வரிசையில் பக்கவாட்டில் அமரும் 'ஜம்ப் சீட்கள்' மட்டுமே கொடுக்கப்பட்டுள்ளன. இவை நீண்ட பயணங்களுக்குச் சௌகரியமாக இருக்காது. மேலும் சீட்பெல்ட் வசதியும் இதில் இல்லாததால் பாதுகாப்பு குறைவே. இருந்தாலும் குறைந்த விலையில் 7 சீட் வசதி கொண்ட கார்களின் பட்டியலில் இதுவும் முக்கிய இடம் பிடிக்கிறது
மாருதி எர்டிகா
விலை: ரூ. 8.90 லட்சம் முதல் ரூ. 13.14 லட்சம் (எக்ஸ்-ஷோரூம்)
எரிபொருள் ஆப்ஷன்கள்: பெட்ரோல் மற்றும் சிஎன்ஜி
ஐந்து பேருக்கும் அதிகமானோருடன் கேப் பயணம் செய்திருந்தால், நிச்சயம் நீங்கள் மாருதி எர்டிகாவில் பயணித்திருப்பீர்கள். நியாயமான விலையில் 3 வரிசை சீட்களை வழங்கி, பல ஆண்டுகளாக இந்தியக் குடும்பங்களின் நம்பிக்கையைப் பெற்ற காராக இது திகழ்கிறது.
நவீன கார்களுடன் ஒப்பிடும்போது இதில் வசதிகள் சற்று குறைவாகத் தோன்றினாலும், ஒரு குடும்ப MPV காரிற்குத் தேவையான சௌகரியம், இடவசதி, என்ஜின் மென்மை மற்றும் மைலேஜ் ஆகியவற்றில் எர்டிகாவை அடித்துக் கொள்ள முடியாது. மாருதியின் பரவலான சர்வீஸ் நெட்வொர்க்கும் சேரும்போது, இது ஒரு பாதுகாப்பான மற்றும் நம்பகமான தேர்வாக மாறுகிறது.
மஹிந்திரா பொலேரோ நியோ
விலை: ரூ. 9.06 லட்சம் முதல் ரூ. 10.85 லட்சம் (எக்ஸ்-ஷோரூம்)எரிபொருள் ஆப்ஷன்கள்: டீசல்
வழக்கமான பொலேரோவின் நவீன மற்றும் மேம்படுத்தப்பட்ட பதிப்பாக மஹிந்திரா பொலேரோ நியோவைக் கருதலாம். ரியர்-வீல் டிரைவ் மற்றும் சக்திவாய்ந்த டீசல் இன்ஜினுடன் அதே அளவிலான கரடுமுரடான தன்மையைக் கொண்டிருந்தாலும் நவீன குடும்பங்கள் வாங்கும் வகையில் இதன் கேபின் டிசைன் செய்யப்பட்டுள்ளது.
இருப்பினும் இதன் 3-வது வரிசையிலும் வழக்கமான முன்பக்கம் பார்க்கும் இருக்கைகளுக்குப் பதிலாகச் சீட்பெல்ட் இல்லாத ஜம்ப் சீட்களே கொடுக்கப்பட்டுள்ளன. எனவே இதை முழுமையான 7-சீட்டராகக் கருத முடியாது. எப்போதாவது மட்டுமே 3-வது வரிசையைப் பயன்படுத்துபவர்களுக்கும் கரடுமுரடான பாதைகளில் செல்லக்கூடிய திறன்மிக்க கார் தேவைப்படுபவர்களுக்கும் மட்டுமே இது உகந்தது. மற்ற தேவைகளுக்குப் பட்டியலில் உள்ள பிற கார்களே சிறந்தது. (மேலும், 9 இருக்கைகள் கொண்ட 'பொலேரோ நியோ பிளஸ்' மாடலும் மஹிந்திராவிடம் உள்ளது).
டொயோட்டா ரூமியான்
விலை: ரூ. 9.79 லட்சம் முதல் ரூ. 14.21 லட்சம் (எக்ஸ்-ஷோரூம்)
எரிபொருள் ஆப்ஷன்கள்: பெட்ரோல் மற்றும் சிஎன்ஜி
நிசான்-ரெனால்ட் கூட்டணி போல, மாருதி-டொயோட்டா கூட்டணியில் உருவான ரீ-பேட்ஜ் மாடல்தான் டொயோட்டா ரூமியான். எர்டிகாவைப் போலவே தாராளமான இடவசதி, சௌகரியமான கேபின் மற்றும் மென்மையான என்ஜின் ஆகிய பலங்களைக் கொண்டுள்ளது. எர்டிகாவைப் போலவே இதன் டிசைனும் வசதிகளும் சற்றே பழைமையானதாகத் தோன்றலாம்.
இருப்பினும் டொயோட்டா பிராண்ட் மதிப்போடு, அத்தியாவசிய தேவைகளைப் பூர்த்தி செய்யும் எளிமையான மற்றும் நம்பகமான குடும்ப MPV காரை விரும்புபவர்களுக்கு டொயோட்டா ரூமியான் ஒரு அருமையான ஆப்ஷன்.
கியா கேரன்ஸ்
விலை: ரூ. 11.12 லட்சம் முதல் ரூ. 12.98 லட்சம் (எக்ஸ்-ஷோரூம்)
எரிபொருள் ஆப்ஷன்கள்: பெட்ரோல், சிஎன்ஜி மற்றும் டீசல்
2022-ல் அறிமுகப்படுத்தப்பட்ட கியா கேரன்ஸ், கொரிய நிறுவனத்தின் முதல் 7-சீட்டர் MPV மாடலாகும். தற்போது புதிய 'கேரன்ஸ் கிளாவிஸ்' அறிமுகமாகியுள்ள நிலையில் எர்டிகாவில் இருந்து அப்கிரேட் ஆக நினைக்கும், அதேசமயம் அதிக பணம் செலவழிக்க விரும்பாத வாடிக்கையாளர்களுக்காக இந்த பழைய மாடலும் தொடர்ந்து விற்பனையில் உள்ளது.
தற்போது மிட்-ஸ்பெக் வேரியண்ட்களில் மட்டுமே கிடைக்கும் இந்த கார் நவீன வசதிகளுடன் இந்த பிரிவில் மற்ற கார்கள் வழங்காத டீசல் என்ஜின் ஆப்ஷனையும் வழங்குகிறது. (சிஎன்ஜி வசதி டீலர் மட்டத்தில் பொருத்தப்படுகிறது). எர்டிகா/ரூமியானை விட பிரீமியம் அனுபவத்தைத் தருவதால் டிராவல்ஸ் துறையிலும் இதற்கு நல்ல வரவேற்பு உள்ளது.
கியா கேரன்ஸ் கிளாவிஸ்
விலை: ரூ. 11.39 லட்சம் முதல் ரூ. 21.79 லட்சம் (எக்ஸ்-ஷோரூம்)
எரிபொருள் ஆப்ஷன்கள்: பெட்ரோல், சிஎன்ஜி மற்றும் டீசல்
இந்த பட்ஜெட்டில் கிடைக்கக்கூடிய மிகச்சிறந்த ஆல்-ரவுண்டர் 7-சீட்டர் MPV கார் கியா கேரன்ஸ் கிளாவிஸ் ஆகும். நவீன வெளிப்புற தோற்றம் மட்டுமின்றி இதன் கேபின் மிகவும் பிரீமியமாகவும் ஏராளமான சொகுசு வசதிகளுடனும் உருவாக்கப்பட்டுள்ளது. டர்போ பெட்ரோல் மற்றும் டீசல் உட்பட பலதரப்பட்ட என்ஜின் ஆப்ஷன்கள் உள்ளதால், செயல்திறன் மற்றும் மைலேஜில் எந்த சமரசமும் செய்ய வேண்டியதில்லை.
இதன் 3-வது வரிசை இருக்கை பெரியவர்களுக்கும் ஏற்றதாக உள்ளது. 7-சீட்டர் தவிர, நடுவரிசையில் கேப்டன் சீட்கள் கொண்ட 6-சீட்டர் விருப்பமும் உள்ளது. ஏராளமான வேரியண்ட்கள் உள்ளதால் உங்கள் பட்ஜெட்டிற்கு ஏற்ற கேரன்ஸ் கிளாவிஸ் காரை எளிதாகத் தேர்வு செய்ய முடியும்.
மஹிந்திரா ஸ்கார்பியோ கிளாசிக்
விலை: ரூ. 13.37 லட்சம் முதல் ரூ. 17.40 லட்சம் (எக்ஸ்-ஷோரூம்)
எரிபொருள் ஆப்ஷன்கள்: டீசல்
இந்தியாவின் மற்றொரு புகழ்பெற்ற பிராண்டான ஸ்கார்பியோவை மஹிந்திரா 'ஸ்கார்பியோ N' என நவீனப்படுத்தியிருந்தாலும், பழைய பாரம்பரிய தோற்றம் கொண்ட 'ஸ்கார்பியோ கிளாசிக்' மாடலும் தொடர்ந்து விற்பனையில் உள்ளது.
பாக்ஸி டிசைன் கரடுமுரடான பாதைகளைச் சமாளிக்கும் திறன் மற்றும் சக்திவாய்ந்த டீசல் என்ஜின் ஆகியவற்றைத் தாண்டி இதன் பேஸ் வேரியண்ட்டில் 9 இருக்கை ஆப்ஷன் வழங்கப்படுகிறது! பொலேரோவைப் போல 3-வது வரிசையில் நீளமான ஜம்ப் சீட்கள் இருப்பதால் அதில் 4 பேர் வரை அமர முடியும். சற்று நெருக்கடியாக இருந்தாலும், அதிக நபர்கள் பயணிக்க இது உதவுகிறது. டாப் வேரியண்ட்டில் 7 இருக்கைகள் மட்டுமே உள்ளன. நவீன வசதிகளை விட, முரட்டுத்தனமான SUV தோற்றத்தையும் இருக்கை வசதியையும் விரும்புபவர்களுக்கான கார் இது.
டாடா சஃபாரி
விலை: ரூ. 13.40 லட்சம் முதல் ரூ. 26.91 லட்சம் (எக்ஸ்-ஷோரூம்)
எரிபொருள் ஆப்ஷன்கள்: பெட்ரோல் மற்றும் டீசல்
இந்த பட்டியலில் உள்ள கார்களிலேயே மிகப்பெரிய மற்றும் அதிக விலையுள்ள 7-சீட்டர் கார் டாடா சஃபாரி ஆகும். நியாயமாகச் சொன்னால் இதன் ஆரம்ப மற்றும் மிட் வேரியண்ட்கள் சிறந்த கம்பீரமான தோற்றம், தாராளமான இடவசதி மற்றும் தினசரி தேவைக்கான அனைத்து நவீன வசதிகளுடன் கூடிய நல்ல மதிப்பைக் கொண்டுள்ளன.
கேரன்ஸ் கிளாவிஸ் போல இதன் டாப் வேரியண்ட்களிலும் நடுவரிசையில் கேப்டன் சீட்கள் கொண்ட 6-சீட்டர் ஆப்ஷன் கிடைக்கிறது. குறைந்த பட்ஜெட்டில் பெரிய கார் மற்றும் அதன் கம்பீரமான அனுபவத்தை விரும்புபவர்களுக்கு டாடா சஃபாரியின் ஆரம்பக்கட்ட வேரியண்ட்கள் சிறந்த தேர்வாகும்.
கார்தேக்கோ சொல்வது...
குடும்பத்துடன் அடிக்கடி பயணம் செய்பவர்களுக்கும், கூடுதல் இருக்கைகள் தேவைப்படுபவர்களுக்கும் 7-சீட்டர் கார் ஒரு சிறந்த தேர்வாகும். தற்போதைய சூழலில் இவற்றை வாங்க அதிக பணம் செலவழிக்க வேண்டியதில்லை. குறைந்த விலைக்கு நிசான் கிராவிட் மற்றும் ரெனால்ட் ட்ரைபர் காரையும், நடைமுறைப் பயன்பாட்டிற்கு மாருதி எர்டிகா மற்றும் டொயோட்டா ரூமியானையும் தேர்வு செய்யலாம். கரடுமுரடான பயன்பாட்டிற்கு மஹிந்திரா பொலேரோ மற்றும் பொலேரோ நியோவும், பிரீமியம் அனுபவத்திற்கு கியா கேரன்ஸ், கேரன்ஸ் கிளாவிஸ் மற்றும் டாடா சஃபாரியும் சிறந்த தேர்வுகளாக இருக்கும்.
இருப்பினும், வெறும் விலை மற்றும் இருக்கைகளின் எண்ணிக்கையை மட்டும் வைத்து காரைத் தேர்வு செய்ய வேண்டாம். 3 வரிசைகளையும் தொடர்ந்து பயன்படுத்தப் போகிறீர்கள் என்றால் கடைசி வரிசையில் போதுமான இடவசதி, சரியான சீட்பெல்ட் பாதுகாப்பு மற்றும் ஏறி இறங்குவதற்கு எளிதான அமைப்பு உள்ளதா என்பதை உறுதிப்படுத்திக் கொள்ளுங்கள். மேலும் அனைத்து இருக்கைகளும் நிரம்பியிருக்கும் போது பொருட்களுக்கான இடவசதி எவ்வளவு உள்ளது என்பதையும் கவனிக்க வேண்டும்.
உங்கள் குடும்பத்தின் வழக்கமான பயணத் தேவைகளுக்கு எந்த கார் சரியாக இருக்குமோ அதை இந்த தீபாவளிக்குத் தேர்வு செய்து மகிழுங்கள்! இதில் உங்கள் தேர்வு எது என்பதை கீழே உள்ள கமெண்ட் பகுதியில் பதிவிடுங்கள்.
