போப் ஆண்டவருக்காகவே ஸ்பெஷலா ரெடியான டொயோட்டா ஹைலக்ஸ்... மிரள வைக்கும் சிறப்பம்சங்கள்!

இந்தியாவில் சமீபத்தில் அறிமுகமான புதிய தலைமுறை டொயோட்டா ஹைலக்ஸ் பிக்கப் டிரக், தற்போது வாடிகனின் புதிய போப்மொபைல் வாகனமாகத் தேர்ந்தெடுக்கப்பட்டுள்ளது. வாடிகன் நிர்வாகத்திற்காக பிரத்யேகமாக உருவாக்கப்படும் விசேஷ வாகனங்களின் வரிசையில் இந்த ஒன்-ஆஃப் பிக்கப் டிரக்கும் இப்போது இணைந்துள்ளது.

உலகளவில் பிரபல நபர்களுக்காக பல தனித்துவமான வாகனங்கள் தயாரிக்கப்பட்டாலும், போப் ஆண்டவரின் பயன்பாட்டுக்காக பிரத்யேகமாக வடிவமைக்கப்படும் போப்மொபைல் எப்போதும் தனி கவனம் பெறும் வாகனமாக விளங்குகிறது.

புதிய போப்மொபைலான டொயோட்டா ஹைலக்ஸ்!

பிரபல ஆட்டோமொபைல் நிறுவனங்கள் உலகப் புகழ்பெற்ற முக்கியப் பிரமுகர்களுக்காகப் பிரத்யேக தயாரிப்புகளை உருவாக்குவது வழக்கம். அந்த வகையில், வாடிகனின் தலைவரான போப் ஆண்டவர் பொதுவெளியில் மக்களைச் சந்திக்கும்போது பயணிப்பதற்காக உருவாக்கப்படும் வாகனங்கள் பொதுவாக போப்மொபைல் என்று அழைக்கப்படுகின்றன.

மெர்சிடிஸ்-பென்ஸ் ஜி-கிளாஸ் போன்ற பல எஸ்யூவி ரக வாகனங்கள் இதற்கு முன்பு போப்மொபைலாகப் பயன்படுத்தப்பட்டுள்ளன. இந்நிலையில், தற்போது கஸ்டமைஸ் செய்யப்பட்ட டொயோட்டா ஹைலக்ஸ் இந்த வரிசையில் லேட்டஸ்ட்டாக இணைந்துள்ளது. இதில் கவனிக்கப்பட வேண்டிய விஷயம் என்னவென்றால், அர்ஜென்டினாவில் இன்னும் விற்பனைக்கு வராத இந்த புதிய தலைமுறை மாடலை அந்நாட்டுச் சந்தைக்கு முன்பாகவே போப் ஆண்டவருக்காகக் கொண்டு வந்துள்ளனர். அங்கு இன்னும் இந்த மாடலின் உற்பத்தி தொடங்கப்படாத நிலையில், தற்போது இரண்டு ஹைலக்ஸ் போப்மொபைல் யூனிட்டுகள் மட்டுமே தயாரிக்கப்பட்டு, அவற்றை டொயோட்டா நிறுவனமே நேரடியாகப் பராமரிக்க உள்ளது.

இந்த வாகனத்தில் செய்யப்பட்டுள்ள விசேஷ மாற்றங்களை இனி பார்க்கலாம்:

சிறப்பு மாற்றங்கள் 

காரின் முன்பக்க ஃபெண்டரில் வாடிகன் கொடிகள் கம்பீரமாகப் பொருத்தப்பட்டுள்ளன. கிரில் மற்றும் எல்இடி ஹெட்லேம்ப்கள் ஸ்டாண்டர்ட் பிக்கப் மாடலில் இருப்பது போலவே இதிலும் தொடர்கின்றன. பொதுவாக போப்மொபைல் வாகனங்கள் அனைத்தும் வெள்ளை நிறத்திலேயே இருக்கும் என்பதால், இந்த ஹைலக்ஸ் மாடலும் முழு வெள்ளை நிறத்தில் மிளிர்கிறது. அதற்கேற்ப வீல் ஆர்ச்கள், ஓஆர்விஎம்கள், முன் மற்றும் பின் பம்பர்களும் அதே வெள்ளை நிறத்தில் ஃபினிஷ் செய்யப்பட்டுள்ளன.

பின்பகுதியில் போப் ஆண்டவர் நின்று மக்களைப் பார்க்கும் வகையில், எல்இடி விளக்குகள் பொருத்தப்பட்ட வளைந்த பாலிகார்பனேட் வெளிப்படையான டோம் அமைக்கப்பட்டுள்ளது. வாடிகனின் பாதுகாப்பு மற்றும் தேவைகளுக்கு ஏற்ப உருவாக்கப்பட்டுள்ள இந்த பின்பக்க பகுதிக்குச் செல்ல எலக்ட்ரிக் படிக்கட்டுகள் கொடுக்கப்பட்டுள்ளன. இதில் ஒரே நேரத்தில் 5 பேர் வரை பயணிக்க முடியும்.

இந்த ஹைலக்ஸ் போப்மொபைலில் போப் ஆண்டவருக்கான பிரத்யேக சென்ட்ரல் சீட், இரண்டு துணை சீட்கள் ஆகியவை ஒயிட் எகோ-லெதர் ஃபினிஷிங்கில் வழங்கப்பட்டுள்ளன. அத்துடன் தரையில் ரெட் கார்பெட் மற்றும் பாதுகாப்பு ரெயிலிங் அமைப்புகளும் இடம்பெற்றுள்ளன. இதன் பின்பக்கப் படிக்கட்டுகள் 200 கிலோ வரை செங்குத்தான எடையைத் தாங்கும் வகையில் பலமாக உருவாக்கப்பட்டுள்ளன.

டொயோட்டா ஹைலக்ஸ் போப்மொபைலின் முக்கிய சிறப்பம்சங்கள்:

டொயோட்டா ஹைலக்ஸ் பற்றி சுருக்கமாக

இந்தியாவில் சமீபத்தில் தலைமுறை மாற்றத்தைக் கண்டுள்ள டொயோட்டா ஹைலக்ஸ் உலகளவில் மிகவும் பிரபலமான ஒரு பிக்கப் டிரக் ஆகும்.

ஒன்பதாவது தலைமுறை ஹைலக்ஸ் மாடலின் முன்பக்கம் பாடி கலர் கிரில், ஹனிகோம்ப் பேட்டர்ன் மற்றும் பியானோ பிளாக் ஸ்ட்ரிப்பில் பதிக்கப்பட்ட டொயோட்டா லோகோவுடன் முரட்டுத்தனமான தோற்றத்தைப் பெற்றுள்ளது. பக்கவாட்டில் உள்ள பெரிய ஆஃப்-ரோட் வீல்கள் மற்றும் தடிமனான வீல் ஆர்ச் கிளாடிங் ஆகியவை இந்த வாகனத்திற்கு ஒரு கம்பீரமான லுக்கை அள்ளித் தருகின்றன.

பின்பக்க வடிவமைப்பைப் பொறுத்தவரை செங்குத்தான எல்இடி டெயில்லேம்ப்கள், தடிமனான பம்பர்கள் மற்றும் டெயில்கேட்டின் நடுவே பொறிக்கப்பட்டுள்ள டொயோட்டா லெட்டரிங் என எளிமையாகவும் நேர்த்தியாகவும் காட்சியளிக்கிறது.

இன்டீரியரில் வயர்லெஸ் ஆண்ட்ராய்டு ஆட்டோ மற்றும் ஆப்பிள் கார்பிளே வசதியுடன் கூடிய 12.3-இன்ச் டச்ஸ்கிரீன் இன்ஃபோடெயின்மென்ட் சிஸ்டம், 7-இன்ச் டிஜிட்டல் டிரைவர் டிஸ்ப்ளே, உயரத்தை அட்ஜஸ்ட் செய்யும் டிரைவர் சீட், வயர்லெஸ் போன் சார்ஜர் மற்றும் மேனுவல் ஏசி போன்ற அம்சங்கள் இடம்பெற்றுள்ளன.

பாதுகாப்பிலும் அசத்தும் இந்த மாடலில் 7 ஏர்பேக்குகள், ESC, HHC, 360-டிகிரி கேமரா மற்றும் முன்பின் பார்க்கிங் சென்சார்கள் போன்ற அத்தியாவசிய பாதுகாப்பு அம்சங்கள் முழுமையாகக் கொடுக்கப்பட்டுள்ளன.

ஃபார்ச்சூனரில் பயன்படுத்தப்படும் அதே 2.8-லிட்டர் டீசல் பவர்டிரெய்ன் தான் இதன் பானெட்டிற்கு அடியிலும் துடிக்கிறது. அதன் விவரங்கள்:

AT- ஆட்டோமெட்டிக் டிரான்ஸ்மிஷன் (டார்க் கன்வெர்டர்), 4WD- ஃபோர்-வீல் டிரைவ், RWD- ரியர் வீல் டிரைவ்

விலை மற்றும் போட்டியாளர்கள்

இந்தியாவில் டொயோட்டா ஹைலக்ஸ் மாடலின் எக்ஸ்-ஷோரூம் விலை ரூ.31.99 லட்சம் முதல் ரூ.36.69 லட்சம் வரை நிர்ணயிக்கப்பட்டுள்ளது.

இந்திய சந்தையில் இந்த காருக்கு நேரடிப் போட்டியாக இசுஸு வி-கிராஸ் மட்டுமே களத்தில் உள்ளது. எனினும், டொயோட்டா ஃபார்ச்சூனர், எம்ஜி மெஜஸ்டர் மற்றும் இசுஸு எம்யூ-எக்ஸ் போன்ற பாடி-ஆன்-பிரேம் எஸ்யூவி மாடல்களுக்கு இணையான மாற்றாகவும் ஹைலக்ஸ் பார்க்கப்படுகிறது.

கார்தேக்கோவின் கருத்து ...

போப்மொபைல் என்றாலே ஆடம்பரத்தை விட அதன் பயன்பாட்டிற்கே எப்போதும் முக்கியத்துவம் கொடுக்கப்படும்; அந்த வகைக்கு ஹைலக்ஸ் மிகச் சரியான தேர்வு. கூட்ட நெரிசல், நீண்ட தூரப் பயணங்கள் மற்றும் கரடுமுரடான சாலைகளைச் சமாளிக்கத் தேவையான முரட்டுத்தனம், நம்பகத்தன்மை மற்றும் 4x4 ஹார்டுவேர் இதில் கச்சிதமாகப் பொருந்தியிருக்கிறது. மேலும், உலகளவில் ஹைலக்ஸ் மாடலுக்கு இருக்கும் அசாத்திய வரவேற்பை உணர்த்தும் விதமாக வாடிகன் இந்த புதிய தலைமுறை மாடலைத் தேர்வு செய்திருப்பது டொயோட்டா நிறுவனத்திற்கு கிடைத்த மிகப்பெரிய பெருமை.

சமீப காலத்தில் களமிறங்கிய போப்மொபைல்களிலேயே மிகவும் அட்டகாசமான ஒன்றாக இது அமைந்திருக்கிறது. ஒருவேளை உங்களிடம் இந்த சாய்ஸ் கொடுக்கப்பட்டிருந்தால், போப் ஆண்டவரின் பயணத்திற்கு ஹைலக்ஸ் காரைத் தேர்ந்தெடுத்திருப்பீர்களா? உங்கள் கருத்துக்களை கீழே பதிவிடுங்கள்!