ரூ. 19.99 லட்சத்தில் மீண்டும் வந்தாச்சு… MG ஹெக்டரின் கெத்தான பிளாக்ஸ்டார்ம் & ஸ்னோஸ்டார்ம் மாடல்கள்
MG ஹெக்டர் காரில் இந்த ‘பிளாக் தீம்’ டிரெண்ட் தொடர்ந்து நீடிக்கிறது.
- ஒரு கருத்தை எழுதுக
JSW MG மோட்டார் இந்தியா நிறுவனம், தனது பிரபல ஹெக்டர் எஸ்யூவி காரில் 'ஸ்டார்ம் எடிஷன்' எனும் புதிய பேக்கேஜை அதிகாரப்பூர்வமாக விற்பனைக்குக் கொண்டுவந்துள்ளது. இதன் ஆரம்ப விலை ரூ.19.99 லட்சம் (எக்ஸ்-ஷோரூம்) என நிர்ணயிக்கப்பட்டுள்ளது. இந்த விலையை வைத்துப் பார்க்கும்போது, இது ஹெக்டரின் டாப்-எண்ட் மாடலான 'சாவ்வி' வேரியன்ட்டை அடிப்படையாகக் கொண்டு உருவாக்கப்பட்டுள்ளது என்பது தெளிவாகிறது. ஏற்கனவே 2024-ல் விற்பனையில் இருந்த இந்த ஸ்டார்ம் சீரிஸ் தற்போது 2026 மாடலாக மீண்டும் புதுப்பிக்கப்பட்டு சந்தைக்கு வந்துள்ளது.
இந்த புதிய ஸ்டைலிங் பேக்கில் என்னென்ன சிறப்பம்சங்கள் இடம்பெற்றுள்ளன என்பதை விரிவாகப் பார்ப்போம்.
என்னென்ன புதிய மாற்றங்கள்?
MG ஹெக்டர் ஸ்டார்ம் சீரிஸ் 'பிளாக்ஸ்டார்ம்' மற்றும் 'ஸ்னோஸ்டார்ம்' என இரண்டு வெர்ஷன்களில் கிடைக்கிறது. வழக்கம் போல பிளாக்ஸ்டார்ம் மாடல் முற்றிலும் கருப்பு நிற எக்ஸ்டீரியரிலும், ஸ்னோஸ்டார்ம் மாடல் முத்து போன்ற வெள்ளை நிற எக்ஸ்டீரியரிலும் மட்டுமே கிடைக்கும்.
மீண்டும் களமிறங்கியுள்ள இந்த டிசைன் பேக்குகளில் 'பிளாக் ரூஃப்' ஸ்டாண்டர்டாகக் கொடுக்கப்பட்டுள்ளது. காரின் வெளிப்புறத்தில் சிவப்பு நிற அக்ஸென்ட்கள் சேர்க்கப்பட்டிருப்பது இதன் தோற்றத்தை மேலும் மேம்படுத்துகிறது. குறிப்பாக ரெட் பிரேக் காலிப்பர்கள், டெயில்கேட் அக்ஸென்ட்கள், ORVM மற்றும் ஹெட்லேம்ப் புரொடெக்டர்கள் ஆகியவற்றில் இந்த சிவப்பு நிற விவரங்களைக் காண முடிகிறது.
காரின் உட்புறத்தைப் பொறுத்தவரை முழுமையான கருப்பு நிற தீம் கொடுக்கப்பட்டுள்ளது. மேலும் காரின் ஹெட்ரெஸ்ட்களில் 'Storm' என்ற எடிஷன் பெயர் பொறிக்கப்பட்டு கெத்தாக காட்சியளிக்கிறது.
MG ஹெக்டர்: ஒரு பார்வை
சாலையில் செல்லும்போதே கம்பீரமான தோற்றத்தையும், பிரம்மாண்டமான லுக்கையும் விரும்பும் வாடிக்கையாளர்களுக்கு ஹெக்டர் எப்போதுமே ஒரு சிறந்த சாய்ஸ். முகப்பில் கொடுக்கப்பட்டுள்ள பிரம்மாண்டமான க்ரோம் கிரில் மற்றும் உயரமான போனெட் அமைப்பு இந்த காருக்குத் தனி கெத்தை தருகிறது. பம்பர் பகுதியிலேயே பொருத்தப்பட்டுள்ள ஹெட்லேம்ப்கள் மற்றும் ஃபாக் லேம்ப்களுடன் கூடிய ஃபேஷியா டிசைன் அசத்தல். டைனமிக் இண்டிகேட்டர்களுடன் கூடிய எல்இடி டிஆர்எல்-கள் வழங்கப்பட்டிருந்தாலும், தற்போதைய ட்ரெண்டில் உள்ள கனெக்டட் எல்இடி அமைப்பு இதில் இல்லை.
பக்கவாட்டு தோற்றத்தில் நிமிர்ந்த கம்பீரமான ஸ்டான்ஸ் மற்றும் 17-இன்ச் டூயல்-டோன் வீல்களுடன் நீண்ட உயரமான எஸ்யூவி லுக்கை இது பூர்த்தி செய்கிறது. காரின் பின்புறத்தில் கிளாம்ஷெல் ரக பூட்லிட் கொடுக்கப்பட்டுள்ளது. இதில் அகலமான எல்இடி டெயில் லேம்ப்களும், காரின் பின்புறம் முழுவதும் செல்லும் வகையிலான பெரிய க்ரோம் பட்டைகளும் காரின் பிரீமியம் லுக்-ஐ மேலும் கூட்டுகின்றன.
காரின் கேபின் அமைப்பைப் பொறுத்தவரை வழக்கமான ஹெக்டர் மாடல்களில் பெய்ஜ் மற்றும் கருப்பு கலந்த கலவை பயன்படுத்தப்பட்டிருக்கும். ஆனால் இந்த ஸ்டார்ம் சீரிஸில் முழுமையான கருப்பு நிற தீம் வழங்கப்பட்டுள்ளது. இருப்பினும் லெதரெட் மெட்டீரியல் மற்றும் பியானோ பிளாக் ஃபினிஷிங் கொண்ட லேயர்டு டேஷ்போர்டு டிசைன் அப்படியே தொடர்கிறது. உட்புறத்தில் அனைவரின் கவனத்தையும் ஈர்க்கும் மையப்புள்ளியாக 14-இன்ச் வெர்டிகல் டச்ஸ்கிரீன் இன்ஃபோடெயின்மென்ட் சிஸ்டம் அமைகிறது. முன்பக்க சீட்களைப் போலவே பின்புற சீட்களிலும் தாராளமான இடவசதியும் பொருட்களை வைப்பதற்கான நடைமுறை வசதிகளும் நேர்த்தியாக செய்யப்பட்டுள்ளன.
தொழில்நுட்ப வசதிகளைப் பொறுத்தமட்டில் வயர்லெஸ் ஆண்ட்ராய்டு ஆட்டோ மற்றும் ஆப்பிள் கார்பிளே வசதியுடன் கூடிய 14-இன்ச் டச்ஸ்கிரீன், 8-ஸ்பீக்கர் இன்ஃபினிட்டி சவுண்ட் சிஸ்டம், ஓட்டுநருக்கு உதவ 7-இன்ச் டிஜிட்டல் இன்ஃபர்மேஷன் டிஸ்ப்ளே ஆகியவை உள்ளன. இதுதவிர பானரோமிக் சன்ரூஃப், கனெக்டட் கார் தொழில்நுட்பம், வென்டிலேட்டட் வசதி கொண்ட பவர்டு ஃபிரண்ட் சீட்கள், பவர்டு டெயில்கேட் மற்றும் வயர்லெஸ் சார்ஜர் என சொகுசு வசதிகளுக்கு பஞ்சமில்லை.
பாதுகாப்பு அம்சங்களைப் பொறுத்தவரை 6 ஏர்பேக்குகள், ஃபிரண்ட் மற்றும் ரியர் பார்க்கிங் சென்சார்கள், 360-டிகிரி கேமரா, ஹில்-ஹோல்டு கன்ட்ரோல் (HHC), ஏபிஎஸ் வித் இபிடி (ABS with EBD), லெவல்-2 ஏடாஸ் (Level-2 ADAS) தொழில்நுட்பம் நான்கு சக்கரங்களிலும் டிஸ்க் பிரேக்குகள், ஐசோஃபிக்ஸ் (ISOFIX) சைல்டு சீட் மவுண்ட்கள் மற்றும் டயர் பிரஷர் மானிட்டரிங் சிஸ்டம் (TPMS) எனப் பாதுகாப்பு வளையம் பலமாக அமைக்கப்பட்டுள்ளது.
இன்ஜின் மற்றும் செயல்திறன்:
MG ஹெக்டர் மாடலில் 1.5-லிட்டர் டர்போ பெட்ரோல் இன்ஜின் வழங்கப்படுகிறது. இதில் 6-ஸ்பீடு மேனுவல் மற்றும் சிவிடி (CVT) ஆட்டோமேட்டிக் டிரான்ஸ்மிஷன் ஆப்ஷன்கள் உள்ளன.
| Engine |
1.5-litre turbo petrol |
| Power |
143 PS |
| Torque |
250 Nm |
| Transmission |
6-speed MT / CVT |
MT - Manual Transmission, CVT - Continuously Variable Transmission (automatic)
நகர்ப்புற நெரிசலிலும் நெடுஞ்சாலைப் பயணங்களிலும் இந்த எஞ்சின் சிறந்த செயல்திறனை வெளிப்படுத்துகிறது. மேனுவல் கியர்பாக்ஸ் ஆப்ஷன் இருந்தாலும், மென்மையான ஓட்டுதல் அனுபவத்திற்கு சிவிடி (CVT) ஆட்டோமேட்டிக் மாடலைத் தேர்ந்தெடுப்பதே சிறந்தது. இந்திய சாலைகளுக்கு ஏற்றவாறு மிகவும் நிதானமான சொகுசான டிரைவிங் அனுபவத்தை இந்த சிவிடி கியர்பாக்ஸ் வழங்குகிறது.
விலை மற்றும் போட்டியாளர்கள்:
MG ஹெக்டர் காரின் ஆரம்ப விலை ரூ. 14.94 லட்சம் (எக்ஸ்-ஷோரூம்) முதல் தொடங்குகிறது. பிரீமியம் எஸ்யூவி பிரிவில் விற்பனையாகும் டாடா ஹாரியர், மஹிந்திரா XUV 7XO, ஜீப் காம்பஸ் மற்றும் புதிதாக வரவிருக்கும் MG ஹெக்டர் டோமாஹாக் பிஹெச்இவி (PHEV) ஆகிய மாடல்களுக்கு இது நேரடி போட்டியாக அமைகிறது.
கார்தேக்கோ சொல்வது...
சிறிய ரக எஸ்யூவிகள் அல்லது செடான் கார்களைப் பயன்படுத்தியவர்கள் அதிக இடவசதியும், நீண்ட தூரப் பயணங்களுக்கு ஏற்ற சொகுசையும் தேடி அடுத்த கட்டத்திற்கு அப்கிரேட் ஆக நினைத்தால் அவர்களுக்கு ஹெக்டர் ஒரு நல்ல தேர்வு. ஹெக்டர் மாடலுக்கு முழுமையான அப்டேட் கொடுக்கப்பட வேண்டிய காலம் தாண்டிவிட்டாலும் காரிலுள்ள அம்சங்கள் மற்றும் தொழில்நுட்பங்களில் இது இன்னமும் போட்டியில் முன்னணியில் தான் உள்ளது.
குறிப்பாக, காரில் அதிக ஷோ ஆஃப் விரும்பும் வாடிக்கையாளர்களை ஹெக்டர் பெரிதும் கவர்கிறது. வெளிப்புற க்ரோம் ஃபினிஷிங் மற்றும் இன்ஃபோடெயின்மென்ட் சிஸ்டத்தில் உள்ள AI அசிஸ்டண்ட் போன்றவை பயனர்களுக்கு ஒரு பிரீமியம் உணர்வைத் தருகின்றன.
தற்போது அறிமுகமாகியுள்ள இந்த 'ஸ்டார்ம் எடிஷன்', ஹெக்டருக்கு ஒரு கம்பீரமான, ஆக்ரோஷமான தோற்றத்தைக் கொடுத்துள்ளது. சமீபகாலமாக கார் சந்தையில் பிரபலமாகி வரும் 'டார்க் எடிஷன்' ட்ரெண்டிற்கு ஏற்ப இது மிகக்கச்சிதமாக பொருந்துகிறது. சிவப்பு நிற ஆக்ஸென்ட்களுடன் கூடிய ஆல்-பிளாக் தீம், ஹெக்டருக்கு ஒரு ஸ்போர்ட்டியான இளமைத் துடிப்புமிக்க லுக்கைக் கொடுப்பதோடு சாலையில் இதன் மாஸ் பிரசன்ஸையும் கணிசமாக உயர்த்துகிறது.
MG ஹெக்டர் மற்றும் அதன் புதிய ஸ்டார்ம் சீரிஸ் பற்றிய உங்களின் கருத்துக்களை கீழே உள்ள கமெண்ட் பிரிவில் எங்களோடு பகிர்ந்துகொள்ளுங்கள்!
