இனிமேல் ஸ்டீயரிங் இல்லாத சைபர்கேப் கார் மட்டும்தான்: சைபர்டிரக் உற்பத்தியை நிறுத்திய டெஸ்லா

முழு தானியங்கி வாகனங்களை உருவாக்குவதில் முன்னணி வகிக்க அனைவரும் தீவிரமாக முயற்சி செய்து வரும் வேளையில், டெஸ்லா ஏற்கனவே தனது தயாரிப்புகள் மூலம் பல படிகள் முன்னிலையில் இருந்தது. தனது முதல் மாடலான மாடல் எஸ் மூலம் ஆட்டத்தைத் தொடங்கிய டெஸ்லா, தற்போது ஸ்டீயரிங் வீலே தேவைப்படாத முழுமையான அட்டானமஸ் வாகனங்களை அறிமுகப்படுத்தும் பாதையில் வேகமாக முன்னேறி வருகிறது!

தற்போது டெஸ்லா உலகில் என்னென்ன நடந்து கொண்டிருக்கிறது என்பதை ஒரு பார்வை பார்த்துவிடலாம்:

குட்பை சைபர்டிரக்

கடந்த 2023-ஆம் ஆண்டு அறிமுகப்படுத்தப்பட்ட போது, மிகவும் வித்தியாசமான தோற்றத்தைக் கொண்ட சைபர்டிரக் எலக்ட்ரிக் பிக்கப் தான் ஆட்டோமொபைல் உலகில் அதிகம் பேசப்பட்ட டெஸ்லா தயாரிப்பாக இருந்தது. டெஸ்லாவின் முழுமையான அட்டானமஸ் தொலைநோக்குப் பார்வையை முன்னிட்டு, வரவிருக்கும் தனது பிற புதிய மாடல்களுக்காக சைபர்டிரக்கின் உற்பத்தியை அந்நிறுவனம் படிப்படியாகக் குறைத்து வருவதால், இந்த காரை வாங்க விரும்புவோர் உடனடியாக முடிவெடுக்க வேண்டிய கட்டாயம் ஏற்பட்டுள்ளது.

ஸ்டெயின்லெஸ் ஸ்டீல் பாடி அமைப்பைக் கொண்ட இந்த ஆல்-எலக்ட்ரிக் சைபர்டிரக், ட்ரை-மோட்டார் ஆல்-வீல் டிரைவ் பவர்டிரெய்ன் வசதியுடன் 340 மைல்கள் வரை கிளைம்டு ரேஞ்ச் வழங்கக்கூடியது. உட்புறத்தில் யோக் ஸ்டீயரிங் வசதியோடு, டெஸ்லாவுக்கே உரிய மினிமலிஸ்டிக் டிசைன் அமைப்பை இது பெற்றுள்ளது.

பார்த்தவுடனேயே பலதரப்பட்ட விவாதங்களை ஏற்படுத்திய இந்த பிக்கப் டிரக், ஏராளமான வாகனப் பிரியர்களின் கவனத்தை ஈர்த்தது. இதன் சில மாடல்கள் இந்திய சாலைகளிலும் வலம் வந்ததை நாம் பார்த்திருக்கிறோம். அவை பிற நாடுகளில் இருந்து தனிநபர்களால் பிரைவேட் இம்போர்ட் மூலம் கொண்டுவரப்பட்டவை என்பதால், சைபர்டிரக் அதிகாரப்பூர்வமாக இந்தியாவில் ஒருபோதும் விற்பனைக்கு அறிமுகமாகவில்லை.

ஆதிக்கம் செலுத்த வரும் சைபர்கேப்!

சைபர்டிரக்கின் உற்பத்தி முடிவுக்கு வந்து கொண்டிருக்கும் நிலையில் அது டெஸ்லாவின் ரைடு-ஹெய்லிங் சேவையான சைபர்கேப்புக்கு வழிவகுத்து வருகிறது. அமெரிக்காவில் உள்ள ஆஸ்டின், டல்லாஸ், ஃபோர்ட் வொர்த், ஹூஸ்டன், மியாமி, ஆர்லாண்டோ மற்றும் தம்பா உள்ளிட்ட பல நகரங்களில் சைபர்கேப் ஏற்கனவே பயன்பாட்டுப் பணிகளில் ஈடுபட்டுள்ளது; ஏராளமானோர் இதில் ஜாய்ரைடு சென்று வீடியோக்களை எடுத்து வலைதளங்களில் பகிர்ந்து வருகின்றனர்.

இந்த வாகனத்தில் ஸ்டீயரிங் வீல் கண்ணாடிகள் மற்றும் பெடல்கள் என எதுவுமே கிடையாது என்பதால் மனிதர்களின் தலையீடு துளியும் இன்றி முற்றிலும் தனது கம்ப்யூட்டர் மற்றும் செல்ஃப் டிரைவிங் சாஃப்ட்வேரை மட்டுமே நம்பி இது இயங்குகிறது. சாதாரண கார்களில் இருக்கும் ஸ்டீயரிங் வீல்கள், பெடல்கள் மற்றும் ORVMகள் போன்ற பாதுகாப்பு உபகரணங்களை பெரும்பாலான தானியங்கி கார்கள் தக்கவைத்துள்ள நிலையில் டெஸ்லாவின் இந்த முயற்சி மிகப்பெரிய பாய்ச்சலாகப் பார்க்கப்படுகிறது. பல ஆண்டுகளாக செல்ஃப்-டிரைவிங் கார்களில் இருந்து திரட்டப்பட்ட தகவல்கள் மற்றும் புள்ளிவிவரங்களின் அடிப்படையிலேயே இந்த ரோபோடாக்சி செயல்படுகிறது.

அட்டானமஸ் டிரைவிங்கிற்காகப் பெரிய அளவில் மாடிஃபை செய்யப்பட்ட ஜாகுவார் எலக்ட்ரிக் எஸ்யூவிகளைப் பயன்படுத்தி வரும் வேமோ போன்ற போட்டி நிறுவனங்களுடன் ஒப்பிடும்போது, டெஸ்லா சைபர்கேப் முற்றிலும் மாறுபட்ட ஒரு புதிய அணுகுமுறையைக் கொண்டுள்ளது.

கார்தேக்கோவின் பார்வை…

அளித்த வாக்குறுதிகளை நிறைவேற்றுவதில் சைபர்டிரக் ஆரம்பத்திலிருந்தே வெகுவாகப் பின்தங்கியிருந்தது. தற்போது அதன் உற்பத்தி நிறுத்தப்படும் நிலையில், ஆட்டோமொபைல் வரலாற்றிலேயே மிகக் குறுகிய காலத்தில் உற்பத்தியை முடித்துக் கொண்ட கார்களில் ஒன்றாக இது மாறியுள்ளது. கார் அறிமுகத்தின் போது உருவான எதிர்பார்ப்பு மற்றும் பில்டப் எதுவும் விற்பனை இலக்குகளோடு பொருந்தவில்லை என்பதே அதன் குறைவான விற்பனைக்கு முக்கிய காரணமாக இருக்கலாம்.

அதே நேரத்தில், டெஸ்லா நிறுவனத்திற்கு சைபர்கேப் ஒரு மிக முக்கியமான மைல்கல் அத்தியாயமாக மாறியுள்ளது. போட்டி நிறுவனங்களும் தானியங்கி கார்களை நோக்கி வேகமாக நகர்ந்து வரும் சூழலில், இந்த புதிய தொழில்நுட்பப் போட்டியில் யார் முதலிடத்தைப் பிடிப்பார்கள் என்பதைப் பொறுத்திருந்துதான் பார்க்க வேண்டும்.