భారతదేశంలో అత్యంత అరుదైన ఎస్‌యూవీల్లో ఒకటైన Skoda Kodiaq RS Performance SUV విడుదల.. ధర రూ.66.99 లక్షలు

భారత మార్కెట్లో వరుసగా కొత్త మోడళ్లను, అప్‌డేటెడ్ వాహనాలను ప్రవేశపెడుతున్న స్కోడా తాజాగా Kodiaq RSను విడుదల చేసింది. పనితీరుపై దృష్టి పెట్టిన ఈ ప్రీమియం ఫ్యామిలీ ఎస్‌యూవీని పూర్తిగా దిగుమతి చేసుకుని విక్రయిస్తోంది. దీని ధరను రూ.66.99 లక్షలు (ఎక్స్‌షోరూమ్)గా నిర్ణయించింది. భారత్‌కు కేవలం 50 యూనిట్లు మాత్రమే కేటాయించగా, అవన్నీ ప్రీ-బుకింగ్ ద్వారానే అమ్ముడైనట్లు స్కోడా తెలిపింది. మరి ఈ ఎస్‌యూవీ ప్రత్యేకతలు ఏమిటో తెలుసుకుందాం.

డిజైన్

• సాధారణ స్కోడా కొడియాక్ పెద్దదిగా, ప్రీమియం లుక్‌తో కనిపిస్తే, RS వెర్షన్‌కు మరింత స్పోర్టీ లుక్ ఇచ్చేలా ప్రత్యేక కాస్మెటిక్ మార్పులు చేశారు.
• ముందు భాగంలో స్ప్లిట్ LED హెడ్‌ల్యాంప్స్, LED DRLs కొనసాగించినప్పటికీ, బంపర్‌ను మరింత షార్ప్‌గా తీర్చిదిద్దారు. బ్లాక్-అవుట్ గ్రిల్ ఈ ఎస్‌యూవీకి దూకుడు రూపాన్ని తీసుకొచ్చింది.

• సైడ్ ప్రొఫైల్‌లో 20 అంగుళాల అల్లాయ్ వీల్స్ స్పోర్టీ లుక్‌ను మరింత పెంచుతున్నాయి. వీల్ ఆర్చ్‌ల క్లాడింగ్‌ను తగ్గించడంతో మరింత స్లీక్‌గా కనిపిస్తుంది. బ్లాక్-అవుట్ విండో లైన్, ORVMలు కూడా ప్రత్యేక ఆకర్షణగా నిలుస్తాయి.

• వెనుక భాగంలో కనెక్టెడ్ LED టెయిల్ ల్యాంప్స్, రూఫ్ స్పాయిలర్, షార్క్ ఫిన్ యాంటెన్నా యథాతథంగా ఉన్నాయి. అయితే మధ్యలో మెష్ ఇన్‌సర్ట్‌తో కొత్త బంపర్, ఇరువైపులా రెండు ఎగ్జాస్ట్ టిప్స్‌ను అందించారు. 

• కొడియాక్ RS నాలుగు బాహ్య రంగుల్లో అందుబాటులో ఉంది. అవి మూన్ వైట్, మ్యాజిక్ బ్లాక్, వెల్వెట్ రెడ్, స్టీల్ గ్రే.

ఇంటీరియర్

• కొడియాక్ RS క్యాబిన్ లేఅవుట్ సాధారణ కొడియాక్‌ను పోలి ఉన్నప్పటికీ, బ్లాక్ థీమ్‌తో పాటు రెడ్ ఇన్‌సర్ట్స్ ఇవ్వడం ద్వారా స్పోర్టీ ఫీలింగ్‌ను తీసుకొచ్చారు.

• క్యాబిన్‌లో ప్రీమియం మెటీరియల్స్‌ను ఉపయోగించారు. సెంట్రల్ AC వెంట్స్ కింద ఉన్న రొటరీ డయల్స్ ద్వారా క్లైమేట్ కంట్రోల్, మీడియా ఫంక్షన్లను సులభంగా నియంత్రించవచ్చు.

• బ్లాక్ థీమ్, రెడ్ స్టిచింగ్‌తో పాటు ప్రత్యేక RS బ్యాడ్జింగ్ ఉన్న బకెట్ తరహా స్పోర్ట్స్ సీట్లను అందించారు. ఇవి పవర్ అడ్జస్టబుల్, మెమరీ ఫంక్షన్‌తో పాటు వెంటిలేషన్, హీటింగ్, మసాజ్ ఫీచర్లను కూడా కలిగి ఉన్నాయి.

• RS వెర్షన్‌లో కూడా ఇది మూడు వరుసలతో కూడిన 7-సీటర్ ఎస్‌యూవీగానే కొనసాగుతుంది. రెండో వరుసలో ప్రయాణికులకు విశాలమైన స్థలం, సౌకర్యాలు లభిస్తాయి.

• ప్రాక్టికాలిటీ విషయంలో కూడా కొడియాక్ RS ఆకట్టుకుంటుంది. క్యాబిన్‌లో మల్టిపుల్ కప్ హోల్డర్లు, రెండో వరుస ప్రయాణికుల కోసం రిమూవబుల్ ట్రే, రెండు గ్లోవ్ బాక్స్‌లు, పెద్ద డోర్ పాకెట్లు, రీయూజబుల్ డస్ట్‌బిన్‌లను అందించారు.

ఫీచర్లు, సేఫ్టీ

• సాధారణ కొడియాక్‌లో లభించే దాదాపు అన్ని ఫీచర్లు కొడియాక్ RSలో కూడా ఉన్నాయి.
• కీలెస్ ఎంట్రీ, పుష్ బటన్ స్టార్ట్/స్టాప్, త్రీ-జోన్ ఆటోమేటిక్ క్లైమేట్ కంట్రోల్, ఎలక్ట్రిక్ ఆటో ఫోల్డింగ్ ORVMలు వంటి ఫీచర్లు ఇందులో ఉన్నాయి.
• టెక్నాలజీ పరంగా 12.9 అంగుళాల టచ్‌స్క్రీన్ ఇన్ఫోటైన్‌మెంట్ సిస్టమ్, వైర్‌లెస్ ఆండ్రాయిడ్ ఆటో, ఆపిల్ కార్‌ప్లే, 10.25 అంగుళాల డిజిటల్ డ్రైవర్ డిస్‌ప్లే అందించారు.

• ఆంబియంట్ లైటింగ్, పవర్డ్ టెయిల్‌గేట్, 725W అవుట్‌పుట్‌తో 13-స్పీకర్ కాంటన్ సౌండ్ సిస్టమ్ కూడా ఉన్నాయి.
• సేఫ్టీ కోసం 9 ఎయిర్‌బ్యాగ్‌లు, ABSతో పాటు EBD, హిల్ హోల్డ్ కంట్రోల్, 360-డిగ్రీ కెమెరా, ముందు-వెనుక పార్కింగ్ సెన్సార్లు అందించారు.
• అలాగే లెవల్-2 అడ్వాన్స్‌డ్ డ్రైవర్ అసిస్టెన్స్ సిస్టమ్ (ADAS) ఫీచర్లు కూడా ఉన్నాయి. అయితే ప్రతి సారి వాహనంలోకి ఎక్కిన తర్వాత వాటిని మళ్లీ యాక్టివేట్ చేయాల్సి ఉంటుంది.

పెర్ఫార్మెన్స్ 

స్కోడా RS మోడళ్లు ఎప్పుడూ రూపురేఖల కంటే డ్రైవింగ్ అనుభవానికే ఎక్కువ ప్రాధాన్యం ఇస్తాయి. అదే సంప్రదాయాన్ని కొనసాగిస్తూ కొడియాక్ RSలో 2.0 లీటర్ టర్బో పెట్రోల్ ఇంజిన్‌ను అందించారు. అయితే ఆక్టావియా RSతో పోలిస్తే అదనపు బరువును దృష్టిలో ఉంచుకుని టార్క్‌ను పెంచారు. అంతేకాకుండా ముందు వీల్స్ కు మాత్రమే కాకుండా నాలుగు వీల్స్ కు శక్తిని పంపే ఆల్ వీల్ డ్రైవ్ (AWD) వ్యవస్థను ఇందులో అందించారు.

దీనితో పాటు డైనమిక్ ఛాసిస్ కంట్రోల్ (DCC) సిస్టమ్‌ను కూడా అమర్చారు. ఇందులో వివిధ సస్పెన్షన్ సెట్టింగ్‌లు ఉండటంతో అవసరానికి అనుగుణంగా వాహనం రైడ్ క్వాలిటీని మార్చుకోవచ్చు. ఇది కేవలం ప్రచారానికే పరిమితమైన ఫీచర్ కాకుండా, డ్రైవింగ్ అనుభవాన్ని గణనీయంగా మెరుగుపరుస్తుంది. 

ప్రత్యర్థులు

భారత మార్కెట్లో స్కోడా కొడియాక్ RSకు ప్రత్యక్ష ప్రత్యర్థులు లేరు. ప్రస్తుతం Volkswagen Tayron R-Line మాత్రమే దీనికి సమీప పోటీదారుగా ఉంది. కేవలం 50 యూనిట్లు మాత్రమే భారత్‌కు తీసుకురావడంతో ఈ ఎస్‌యూవీ నిజంగానే అత్యంత అరుదైన మోడల్‌గా నిలిచింది.