‘ இனி தரையில மட்டும் இல்ல... காத்துலயும் பறப்போம்!’- மாஸ் சம்பவத்தை செய்து காட்டிய எலான் மஸ்க் -கின் EV கார்

கடந்த இரு பத்தாண்டுகளில் ஆட்டோமொபைல் துறையே வியந்து பார்க்கும் ஒரு பிரம்மாண்டமான செய்தியை டெஸ்லா (Tesla) நிறுவனம் வெளியிட்டுள்ளது. அது வேறொன்றுமில்லை பறக்கும் திறன் கொண்ட புதிய ரோட்ஸ்டர் EV ஹைப்பர்கார் தான் அது! சுமார் 7 ஆண்டுகள் தாமதத்திற்குப் பிறகு களமிறங்குவதால் இதன் மீதான எதிர்பார்ப்புகள் மிக அதிகமாக இருந்தன. ஆனால் வாடிக்கையாளர்களின் எதிர்பார்ப்பையும் தாண்டி டெஸ்லா இதனை மிரட்டலாக உருவாக்கியுள்ளது. ஒலி வேகத்தில் மூன்றில் ஒரு பங்கு அளவுக்குச் செல்லும் இந்த ரோட்ஸ்டர் காரின் இந்திய விலை, விண்வெளி வாகனங்களுக்கு இணையான இதன் அபார செயல்திறன் உள்ளிட்ட அனைத்து விவரங்களையும் இங்கு விரிவாகப் பார்ப்போம்.

டெஸ்லா ரோட்ஸ்டர்: இந்தியாவில் இதன் விலை என்ன?

டெஸ்லா நிறுவனத்தின் அதிகாரப்பூர்வ இந்திய இணையதளத்தில் இந்த புதிய 'பறக்கும் கார்' ரோட்ஸ்டருக்கான முன்பதிவுகள் தற்போது தொடங்கப்பட்டுள்ளன. இதன் விலை விவரங்கள் இதோ:

TBA- பின்னர் அறிவிக்கப்படும்

• டெஸ்லாவின் அதிகாரப்பூர்வ இணையதளம் மூலம் ரூ.5.01 லட்சம் செலுத்தி இந்த ரோட்ஸ்டர் காரை முன்பதிவு செய்து கொள்ளலாம்.

• இந்த காரின் முழுமையான மற்றும் இறுதி விலைகள் இன்னும் ரகசியமாகவே வைக்கப்பட்டுள்ளன.

• இது பெர்ஃபாமன்ஸ், த்ரஸ்ட் மற்றும் பறக்கும் திறன் கொண்ட ராக்கெட் என 3 வேரியன்ட்களில் விற்பனைக்கு வருகிறது.

• இதில் ராக்கெட் வேரியன்ட் அழைப்பின் பேரில் மட்டுமே வழங்கப்படும் மாடலாகும். மேலும் பொதுச் சாலைகளில் இயக்குவதற்கு இதற்கு இன்னும் அனுமதி கிடைக்கவில்லை.

• 2028-ஆம் ஆண்டில் இதன் உற்பத்தி தொடங்கப்பட்ட பிறகு அடுத்த ஒரு ஆண்டில் இந்தியச் சாலைகளில் இந்த டெஸ்லா ரோட்ஸ்டர் காரைப் பார்க்க முடியும்.

விண்வெளி வாகன பாணியில் மிரட்டும் டிசைன்

பூமியை அதிர வைக்கும் வேகமும் திறனும் கொண்ட கார் என்பதால் அதற்கு ஏற்றார் போல் இதன் தோற்றமும் மிகவும் மிரட்டலாக வடிவமைக்கப்பட்டுள்ளது. கார் நிற்கும்போது மிகவும் எளிமையான டிசைனில், மறைக்கப்பட்ட ஹெட்லேம்ப்கள் மற்றும் இணைக்கப்பட்ட LED லைட் பாருடன் கூடிய வெட்ஜ் வடிவில் காட்சி அளிக்கிறது.

ஆனால் அருகில் சென்று கூர்ந்து கவனித்தால் தான் இதன் அசுரத்தனமான தோற்றம் தெரிகிறது. பிரம்மாண்டமான டெயில் ஸ்பாய்லர், கோல்ட்-காஸ் த்ரஸ்டர்கள் (த்ரஸ்ட் வேரியன்ட்டில் இருந்து கிடைக்கும்) மற்றும் மெக்லாரன் கார்களைப் போல மேல்நோக்கித் திறக்கும் கதவுகள் என இது ஒரு நிஜ அசுரனாகவே காட்சியளிக்கிறது.

டெஸ்லா கார் என்பதால் இதில் உள்ள வியப்பூட்டும் அம்சங்கள் இத்துடன் முடிந்துவிடவில்லை. மேக்னீசியம், டைட்டானியம் மற்றும் கார்பன் ஃஃபைபர் போன்ற வலுவான பொருட்களைக் கொண்டு இதன் பாடி கட்டமைக்கப்பட்டுள்ளது. காரின் எடையைக் குறைவாக வைத்திருக்க நிலையான இருக்கைகள் மற்றும் மேனுவல் கன்ட்ரோல்கள் பயன்படுத்தப்பட்டுள்ளன.

உட்புறத்தில் அழகை விட பயன்பாட்டிற்கே அதிக முக்கியத்துவம் கொடுக்கப்பட்டுள்ளது. இதன் சென்ட்ரல் டச்ஸ்கிரீன் தான் காரின் முதன்மை கன்ட்ரோல் பேனலாகச் செயல்படுகிறது. டிரைவருக்கு (இவரை 'பைலட்' என்று டெஸ்லா அழைக்கிறது) சிறந்த ஓட்டுதல் அனுபவத்தை வழங்க சாதாரண ஸ்டீயரிங் வீலுக்குப் பதிலாக யோக் வழங்கப்பட்டுள்ளது. மேலும், புவிஈர்ப்பு விசையையே சவாலுக்கு அழைக்கும் இதன் அதிவேகத்தில் பயணிக்கும் போது டிரைவரை கச்சிதமாகப் பிடித்து வைக்க சிறப்பு ஸ்போர்ட்ஸ் சீட்கள் அமைக்கப்பட்டுள்ளன.

இதுவரை கண்டிராத அபார செயல்திறன்

ஆம், இது முற்றிலும் உண்மை. டெஸ்லா ரோட்ஸ்டர் காரால் நிஜமாகவே பறக்க முடியும்! இதன் ராக்கெட் வேரியன்ட்டில் மல்டி-மோட் சக்ஷன் சிஸ்டம், கோல்ட்-காஸ் த்ரஸ்டர்கள் மற்றும் எலக்ட்ரிக் ஆக்சுவேட்டர்கள் கொடுக்கப்பட்டுள்ளன. இவை நொடியின் ஒரு பகுதிக்குள் நுட்பமான மாற்றங்களைச் செய்யும் திறன் கொண்டவை. இந்த சிஸ்டம் காரை முன்னோக்கி, மேல்நோக்கி மற்றும் பக்கவாட்டில் சுழல வைக்கும் இயக்கங்களுக்கு ஆதரவளிக்கிறது. இதனால் பறப்பது மட்டுமின்றி இந்த டெஸ்லா ரோட்ஸ்டர் காரால் காற்றில் பேக்ஃப்ளிப் கூட செய்ய முடியும்!

இவ்வளவு அம்சங்கள் இருக்கும் போது, இதன் சாதாரண சாலைச் செயல்திறனைப் பற்றிப் பெரு பெரிதாகப் பேசத் தேவையில்லை. ஆனால், அந்தப் பிரிவிலும் டெஸ்லா ரோட்ஸ்டர் அனைத்து எல்லைகளையும் உடைத்தெறிந்துள்ளது:

0-100 கி.மீ வேகத்தை ஒரே வினாடிக்குள் எட்டுவது இந்த ரோட்ஸ்டருக்கு மிகவும் சுலபமான விஷயம்! மேலும், மணிக்கு 370 கி.மீ என்ற உச்சபட்ச வேகத்தை எட்டும் இலக்குடன் உருவாகியுள்ள இந்த கார், பிரைவேட் ஜெட் விமானத் துறைக்கே நேரடியாக சவால் விடுகிறது.

இது நிஜம்தானா?

டெஸ்லா நிறுவனம் இந்த ஹைப்பர்காரை (அல்லது விண்வெளி வாகனம் என்று கூடச் சொல்லலாம்) ஒரு சிறப்பான காட்சிப் நிகழ்வின் மூலம் அறிமுகப்படுத்தியிருப்பதால், இது முற்றிலும் நிஜமான ஒன்றுதான். இருப்பினும், இதன் உற்பத்தி 2028-ல் தான் தொடங்கும் என்பதால், வாடிக்கையாளர்களுக்கு விநியோகம் செய்ய இன்னும் கூடுதல் காலம் ஆகும். டெஸ்லாவின் இந்திய இணையதளத்தில் இதற்கான முன்பதிவுகள் ஏற்றுக்கொள்ளப்பட்டாலும் இந்தியப் பிரிவிடம் இருந்து இன்னும் அதிகாரப்பூர்வ உறுதிப்படுத்தல் வரவில்லை என்பது சிறிய சந்தேகத்தை ஏற்படுத்துகிறது.

பொதுச் சாலைகளுக்கான போக்குவரத்து விதிமுறைகளைக் கருத்தில் கொண்டு பார்க்கும் போது இந்த நவீன தொழில்நுட்பங்கள் அனைத்தும் உற்பத்திக்கு வரும் காரில் இடம்பெறுமா என்பது இன்னும் தெளிவாகத் தெரியவில்லை. இருப்பினும், அனைத்துச் சந்தேகங்களுக்கும் மத்தியில், இந்த காரின் வருகைக்காகக் காத்திருப்பது கண்டிப்பாய் மதிப்புமிக்க ஒன்றாகவே இருக்கும்!

கார்தேக்கோவின் பார்வை...

இயற்பியலின் எல்லைகளைத் தாண்டி புதிய சாத்தியங்களை உருவாக்குவதில் டெஸ்லா எப்போதும் முன்னோடியாகவே இருந்துள்ளது. இந்த புதிய ரோட்ஸ்டர் மாடலும் அதற்கு விதிவிலக்கல்ல. பார்க்கும்போது அமைதியாகக் காட்சி அளித்தாலும், செயல்திறனைப் பற்றிய நமது பழைய எண்ணங்களை இது முற்றிலும் மாற்றியமைக்கிறது. மற்ற டெஸ்லா கார்கள் மாஸாகத் தோன்றினால் இது உண்மையிலேயே ஒரு ராக்கெட் வாகனம் என்பதில் சந்தேகமில்லை! இருப்பினும் இது விற்பனைக்கு வர இன்னும் கொஞ்ச காலம் ஆகும் என்பதால் இந்த அம்சங்கள் வெறும் விளம்பரத்திற்காக மட்டும் இருக்கப் போகின்றனவா அல்லது இன்னும் சில ஆண்டுகளில் நிஜமாகவே சாலைக்கு வரப்போகிறதா என்பதைப் பொறுத்திருந்துதான் பார்க்க வேண்டும்.