ரூ. 10 லட்சத்துல ஹூண்டாய் பேயான்! புக் பண்றது எப்படி? எப்போ கைக்கு கிடைக்கும்?

ஹூண்டாய் நிறுவனம் தனது இரண்டாவது காம்பாக்ட் SUV மாடலான பேயான் காரை இந்தியாவில் அதிகாரப்பூர்வமாக விற்பனைக்குக் கொண்டுவந்துள்ளது. இதன் ஆரம்ப எக்ஸ்-ஷோரூம் விலை ரூ.10 லட்சம் என நிர்ணயிக்கப்பட்டுள்ளது. அதே பிரிவில் களமிறங்கும் தனது மூத்த மாடலான கிரெட்டாவை விட இந்த புதிய கார் சற்றே சிறியதாக இருந்தாலும், தொழில்நுட்ப வசதிகளில் ஒரு படி மேலே போய் மிரட்டுகிறது. இதில் வழங்கப்பட்டுள்ள பெரிய டிஸ்பிளே திரைகள், ஜெனரேட்டிவ் AI வசதிகள், அதிநவீன NVIDIA ஆர்க்கிடெக்சர் மற்றும் தாராளமான பாதுகாப்பு அம்சங்கள் காரை அடுத்த கட்டத்திற்கு எடுத்துச் செல்கின்றன. கிரெட்டாவுக்குப் பதிலாக ஒரு சிறந்த மாற்று காராக இது உங்களுக்குத் தோன்றினால், இந்த காரை எப்படி முன்பதிவு செய்வது மற்றும் டெலிவரி எப்போது தொடங்கும் என்பது குறித்த முழு விவரங்களையும் இந்தச் செய்தித் தொகுப்பில் பார்க்கலாம்.

2026 ஹூண்டாய் பேயான்: காரை புக் செய்வது எப்படி?

பேயான் கார் முறைப்படி அறிமுகம் செய்யப்பட்டதைத் தொடர்ந்து, அதற்கான முன்பதிவுகளையும் ஹூண்டாய் நிறுவனம் அதிகாரப்பூர்வமாகத் தொடங்கியுள்ளது. காரை வாங்க விரும்பும் வாடிக்கையாளர்கள் தங்களுக்கு அருகிலுள்ள டீலர்ஷிப் மூலமாகவோ அல்லது நிறுவனத்தின் அதிகாரப்பூர்வ இணையதளம் வழியாகவோ தங்கள் முன்பதிவை மேற்கொள்ளலாம். இந்த புதிய பேயான் மாடல் HX2, HX3, HX3 Plus, HX5, HX6, HX8 மற்றும் HX10 என மொத்தம் 7 வேரியண்ட்டுகளில் கிடைக்கிறது. இந்த காரில் 115 PS பவரையும் 144 Nm டார்க்கையும் வெளிப்படுத்தக்கூடிய ஒரேயொரு 1.5 லிட்டர் நேச்சுரலி அஸ்பிரேட்டட் பெட்ரோல் இன்ஜின் மட்டுமே கொடுக்கப்பட்டுள்ளது. வாடிக்கையாளர்கள் தங்கள் விருப்பத்திற்கு ஏற்ப 6 ஸ்பீடு மேனுவல் அல்லது CVT ஆட்டோமேட்டிக் டிரான்ஸ்மிஷனைத் தேர்வு செய்து கொள்ளலாம்.

இணையதளம் வழியாக காரை புக் செய்யும் வழிமுறைகள்

காரை நேரில் செல்லாமல் ஆன்லைனிலேயே புக் செய்ய திட்டமிட்டிருந்தால் ஹூண்டாய் இணையதளத்திற்குச் சென்று காரின் லுக்குகளைப் பார்த்துவிட்டு, உங்கள் தேவைக்கு ஏற்ற வேரியண்ட் மற்றும் கலர் ஆப்ஷனை கஸ்டமைஸ் செய்து கொள்ளலாம். இணையவழியில் மிக எளிதாக காரை முன்பதிவு செய்வதற்கான விரிவான வழிமுறைகள் இதோ:

• ஹூண்டாய் நிறுவனத்தின் அதிகாரப்பூர்வ இணையதளத்தில் பேயான் மாடலுக்கான பிரத்யேக பக்கத்திற்குச் செல்லவும். அங்கு நீங்கள் காரைப் பற்றிய புரோஷரை டவுன்லோட் செய்யலாம், டெஸ்ட் டிரைவ் புக் செய்யலாம் அல்லது அருகிலுள்ள டீலர்ஷிப்களைக் கண்டறியலாம்.

• திரையில் தோன்றும் 'ஆன்லைன் புக்கிங்' பிரிவுக்குச் சென்று முன்பதிவு செயல்முறையைத் தொடங்க பேயான் மாடலைத் தேர்ந்தெடுக்கவும்.

• முதலில் உங்கள் மொபைல் எண், இமெயில் முகவரி, CAPTCHA மற்றும் OTP உள்ளிட்டு போர்ட்டலில் லாக் இன் செய்ய வேண்டும் (புதிய கணக்கு உருவாக்குபவராக இருந்தால்).

• அடுத்ததாக உங்கள் பட்ஜெட் மற்றும் பயன்பாட்டுக்கு ஏற்ப மேனுவல் அல்லது CVT என விரும்பிய கியர்பாக்ஸ் ஆப்ஷனையும், தேவையான வேரியண்ட்டையும் தேர்வு செய்ய வேண்டும். ஒவ்வொரு வேரியண்ட்டின் அருகிலும் அதன் விலை விவரங்கள் தெளிவாகக் குறிப்பிடப்பட்டிருக்கும்.

• அடுத்த கட்டமாக உங்கள் வேரியண்ட்டுக்குப் பொருந்தக்கூடிய எக்ஸ்டீரியர் மற்றும் இன்டீரியர் கலர் ஆப்ஷன்களைத் தேர்வு செய்து கொள்ளலாம்.

• தொடர்ந்து நீங்கள் வசிக்கும் மாநிலம் மற்றும் ஊரைத் தேர்ந்தெடுக்க வேண்டும், அல்லது உங்கள் பகுதிக்கான பின்கோடை பதிவிடவும்.

• நீங்கள் குறிப்பிட்ட பகுதியில் உள்ள அனைத்து அதிகாரப்பூர்வ ஹூண்டாய் டீலர்களின் பட்டியலும் திரையில் தோன்றும்; அதில் உங்களுக்கு வசதியான டீலரைத் தேர்ந்தெடுக்கலாம்.

• டீலரைத் தேர்ந்தெடுத்தவுடன் அவர்களின் முழு விவரங்களும் திரையில் காட்டப்படும். தொடர்ந்து வரும் பேமெண்ட் போர்ட்டல் வழியாக ரூ. 11,000 முன்பதிவுத் தொகையை நீங்கள் செலுத்த வேண்டும்.

• பணம் வெற்றிகரமாகச் செலுத்தப்பட்டதும் ஹூண்டாய் நிறுவனத்தின் பிரதிநிதி உங்களைத் தொடர்புகொண்டு காரை டெலிவரி எடுப்பதற்கு முந்தைய வங்கி சார்ந்த ஆவணங்கள் மற்றும் பிற முறையான நடைமுறைகளை அடுத்த கட்டத்திற்கு எடுத்துச் செல்வார்.

டீலர்ஷிப் வழியாக (ஆஃப்லைன்) நேரில் முன்பதிவு செய்தல்

அருகிலுள்ள ஷோரூமிற்கு நேரடியாகச் சென்று காரை புக் செய்வதே பெரும்பாலான வாடிக்கையாளர்களின் பாரம்பரிய வழக்கமாக இருந்து வருகிறது. பேயான் காருக்கும் நீங்கள் இதே நடைமுறையைப் பின்பற்றலாம். உங்கள் அருகிலுள்ள டீலர்ஷிப்பிற்குச் சென்று காரை புக் செய்வதற்கான எளிய வழிமுறைகள் இதோ:

• ஷோரூமில் உள்ள விற்பனைப் பிரதிநிதியிடம் உங்களின் தேவைகள் மற்றும் எதிர்பார்ப்புகளைத் தெளிவாக எடுத்துரையுங்கள்.

• உங்கள் பட்ஜெட் மற்றும் ரசனைக்கு ஏற்ற வேரியண்ட்டைத் தேர்ந்தெடுங்கள்.

• காரை நேரில் முழுமையாகப் பார்த்து அதன் கேபின் வடிவமைப்பு மற்றும் நவீன வசதிகளை உணர்ந்து அறிவதோடு, கிடைக்கக்கூடிய கூடுதல் ஆக்ஸஸரீஸ் மற்றும் கஸ்டமைசேஷன் விவரங்களையும் கேட்டறியுங்கள்.

• முடிந்தால் பேயான் காரை ஒருமுறை நேரில் டெஸ்ட் டிரைவ் செய்து பாருங்கள். ஷோரூமில் வாய்ப்பு அமையாவிட்டால், உங்கள் வீடு அல்லது அலுவலகத்திற்கே காரைக் கொண்டு வந்து காண்பிக்குமாறு டீலரிடம் தாராளமாகக் கோரிக்கை வைக்கலாம்.

• காரை இறுதி செய்து முன்பதிவு செய்வதற்கு முன் ஒருமுறை டெஸ்ட் டிரைவ் எடுத்து முழு திருப்தி அடைந்து கொள்வதே சிறந்த முடிவாக இருக்கும்.

• காரை இறுதி செய்த பிறகு ரூ. 11,000 தொகையை முன்பதிவுக் கட்டணமாக ரொக்கமாகவோ, ஆன்லைன் பரிவர்த்தனை, UPI அல்லது காசோலை மூலமாகவோ செலுத்தி உங்கள் காரை புக் செய்து கொள்ளலாம்.

2026 ஹூண்டாய் பேயான்: டெலிவரி எப்போது தொடங்கும்?

ஹூண்டாய் தனது இரண்டாவது காம்பாக்ட் SUV மாடலை நாட்டில் களமிறக்கியுள்ள நிலையில், பேயான் காருக்கான முன்பதிவுகள் ஏற்கனவே விறுவிறுப்பாக நடைபெற்று வருகின்றன. இதற்கான கார்களின் டெலிவரி அடுத்த மாத தொடக்கத்தில் தொடங்கும் என்று எதிர்பார்க்கப்படுகிறது.

பண்டிகைக் காலக் கூட்ட நெரிசல் காரணமாக இந்த காருக்கு ஆரம்பத்தில் சற்றே வெயிட்டிங் பீரியட் இருக்கக்கூடும் என்று கருதப்படுகிறது. ஆனால் நீங்கள் தேர்வு செய்யும் வேரியண்ட் மற்றும் கலர் ஆப்ஷனைப் பொறுத்து இந்த காத்திருப்பு காலம் மாறுபடலாம். மேலும், ஒவ்வொரு ஊருக்கும் ஏற்பவும் இது வேறுபடும் என்பதால், இதுகுறித்த துல்லியமான விவரங்களுக்கு அருகிலுள்ள டீலரைத் தொடர்புகொள்ளுமாறு கேட்டுக் கொள்கிறோம். நாங்கள் விரைவில் பேயான் காரை ஓட்டிப் பார்க்கவிருக்கிறோம்; இதன் விரிவான டிரைவ் ரிவ்யூ வீடியோ மற்றும் தகவல்களுக்கு கார் தேக்கோ இணையதளம் மற்றும் யூடியூப் சேனலுடன் இணைந்திருங்கள்.

2026 ஹூண்டாய் பேயான் காரைப் பற்றி...

ஏற்கனவே குறிப்பிட்டது போல கிரெட்டாவைத் தொடர்ந்து ஹூண்டாய் கொண்டுவந்துள்ள இரண்டாவது காம்பாக்ட் SUV கார்தான் இந்த பேயான். இது கிரெட்டாவை விட அளவில் சற்றே சிறியதாக இருந்தாலும் ஹூண்டாய் பிராண்டின் எதிர்கால டிசைன் தாத்பரியத்தை அப்படியே பிரதிபலிக்கிறது. முன்பக்கத்தில் மேலே DRLs மற்றும் அதற்குக் கீழே மெயின் ஹெட்லேம்ப்கள் என ஸ்பிளிட் ஹெட்லேம்ப் அமைப்பைக் கொண்டுள்ளது. மேலும் காருக்கு ஒரு கம்பீரமான தோற்றத்தைக் கொடுக்கும் வகையில் முன்பக்க பம்பரில் சில்வர் ஸ்கிட் பிளேட் நேர்த்தியாகப் பொருத்தப்பட்டுள்ளது.

பக்கவாட்டுத் தோற்றத்தில் காரின் அழகைக் கூட்டும் செதுக்கப்பட்ட பாடி லைன்கள் இடம்பெற்றுள்ளன. அத்துடன் பிளாக் ரூஃப் ரெயில்கள், ORVMs-ல் ஒருங்கிணைக்கப்பட்ட டர்ன் இண்டிகேட்டர்கள், பாடி கலர் டோர் ஹேண்டில்கள் மற்றும் பிளாக் நிற B-பில்லர் ஆகியவை காரின் ஸ்டைலை மேலும் மெருகேற்றுகின்றன. பின்பக்கத்தைப் பொறுத்தவரை முன்பக்க DRLs வடிவமைப்பை ஒத்த எல்இடி டெயில் லைட் அமைப்பு, நேர்த்தியான டெயில்கேட் மற்றும் ஸ்பாய்லர் ஆகியவை கொடுக்கப்பட்டுள்ளன. டிக்கி பகுதியில் ஹூண்டாய் பேட்ஜ் மற்றும் பேயான் எழுத்துக்கள் கம்பீரமாகப் பொறிக்கப்பட்டுள்ளன. முன்பக்கத்தைப் போலவே பின்பக்க பம்பரிலும் சில்வர் ஸ்கிட் பிளேட் மற்றும் முரட்டுத்தனமான மஸ்குலர் டிசைன் இடம்பெற்றுள்ளது.

உட்புற கேபினைப் பொறுத்தவரை இந்தியாவில் உள்ள மற்ற எந்த ஹூண்டாய் கார்களிலும் பார்க்க முடியாத முற்றிலும் மாறுபட்ட வடிவமைப்பை பேயான் பெற்றுள்ளது. இதில் டூயல்-டோன் கேபின் தீம் மற்றும் இரண்டு டிஸ்பிளேக்களை உள்ளடக்கிய வளைந்த ஸ்கிரீன் செட்டப் பிரதான ஈர்ப்பாக உள்ளது. கிளைமேட் கன்ட்ரோல் பேனலின் இருபுறமும் மெல்லிய செங்குத்தான ஏசி வென்ட்கள் நேர்த்தியாக அமைக்கப்பட்டுள்ளன. காரின் ஸ்டீயரிங் வீல் புதிய வென்யூ மற்றும் வெர்னா மாடல்களில் இருப்பதைப் போன்றே தோற்றமளிக்கிறது.

வசதிகளைப் பொறுத்தவரை 12.3 இன்ச் இன்ஃபோடெயின்மெண்ட் டச் ஸ்கிரீன் மற்றும் டிரைவருக்கான 12.3 இன்ச் டிஸ்பிளே ஆகியவை வழங்கப்பட்டுள்ளன. இவை தவிர ஜெனரேட்டிவ் AI வசதி, Level-2 ADAS பாதுகாப்புத் தொகுப்பு, 360 டிகிரி கேமரா, பிளைண்ட் ஸ்பாட் மானிட்டரிங், 6 ஏர்பேக்குகள் எனப் பல உயர்தர அம்சங்கள் இதில் நிரம்பியுள்ளன. ஒவ்வொரு வேரியண்ட்டிலும் என்னென்ன வசதிகள் கிடைக்கின்றன என்பதை விரிவாகத் தெரிந்துகொள்ள எங்கள் பிரத்யேக வேரியண்ட் செய்தித் தொகுப்பைப் படிக்கலாம்.

புதிய பேயான் காரைப் பற்றிய கூடுதல் விவரங்களை மேலோட்டமாக அறிய விரும்பினால், எங்களின் அறிமுகச் செய்தித் தொகுப்பைப் பார்வையிடலாம்.

பவர்டிரெயின்

ஏற்கனவே வெர்னா மற்றும் கிரெட்டாவில் வெற்றிகரமாக இயங்கி வரும் அதே 1.5 லிட்டர் நேச்சுரலி அஸ்பிரேட்டட் பெட்ரோல் இன்ஜின்தான் பேயான் காரிலும் பொருத்தப்பட்டுள்ளது. இதில் 6 ஸ்பீடு மேனுவல் அல்லது CVT டிரான்ஸ்மிஷன் ஆப்ஷன்கள் கிடைக்கின்றன. இதன் முக்கிய விவரங்கள் கீழே கொடுக்கப்பட்டுள்ளன:

MT - மேனுவல் டிரான்ஸ்மிஷன், CVT - கன்டினியூவஸ்லி வேரியபிள் ஆட்டோமேட்டிக் டிரான்ஸ்மிஷன்

விலை மற்றும் போட்டியாளர்கள்

ஹூண்டாய் பேயான் காரின் ஆரம்ப வேரியண்ட் எக்ஸ்-ஷோரூம் விலையில் ரூ.10 லட்சம் முதல் தொடங்கி டாப் வேரியண்ட் ரூ.18 லட்சம் வரை விற்பனை செய்யப்படுகிறது. இந்திய ஆட்டோமொபைல் சந்தையில் ஹூண்டாய் கிரெட்டா, கியா செல்டோஸ், ரெனால்ட் டஸ்டர், நிஸான் டெக்டான், ஃபோக்ஸ்வேகன் டைகுன், ஸ்கோடா குஷாக், மாருதி சுஸூகி கிராண்ட் விட்டாரா, மாருதி சுஸூகி விக்டோரிஸ், டொயோட்டா அர்பன் க்ரூஸர் ஹைரைடர், டாடா சியரா, சிட்ரோன் ஏர்கிராஸ் மற்றும் ஹோண்டா எலிவேட் ஆகிய முன்னணி கார்களுடன் இது நேருக்கு நேர் களத்தில் மோதுகிறது.