నవంబర్‌లో భారత్‌లోకి Denza ఎంట్రీ! ఈ లగ్జరీ కార్ల తయారీ సంస్థ, భారత్‌లో విడుదల చేయనున్న తొలి కారు గురించి పూర్తి వివరాలు!

ఈ ఏడాది భారత ఆటోమొబైల్ మార్కెట్లోకి కొత్త కార్ల తయారీ సంస్థలు ప్రవేశిస్తుండటంతో ఆసక్తి నెలకొంది. తాజాగా ఈ జాబితాలోకి డెన్జా చేరనుంది. ఈ బ్రాండ్ నవంబర్ మధ్యలో భారత్‌లో అడుగుపెట్టే అవకాశం ఉంది. BYDకి చెందిన లగ్జరీ విభాగపు బ్రాండ్ అయిన డెన్జా.. నేరుగా MG M9, Toyota Vellfire వంటి మోడళ్లకు పోటీగా తన కారును విడుదల చేయనుంది. అయితే, దీనికి సంబంధించిన అనేక వివరాలు ఇంకా వెల్లడించలేదు. ఈ నేపథ్యంలో డెన్జా సంస్థతో పాటు, భారత్‌లో ఈ బ్రాండ్ విడుదల చేయనున్న తొలి కారు గురించి తెలుసుకుందాం.

డెన్జా ఎవరు?

BYD భారత కార్ల మార్కెట్లో దాదాపు ఐదేళ్లుగా కార్యకలాపాలు నిర్వహిస్తోంది. మార్కెట్లో విస్తరించే క్రమంలో గతంలో కొన్ని అడ్డంకులు ఎదురైనా, Seal, Atto 3 వంటి కార్లతో పరిమిత సంఖ్యలోని వినియోగదారుల్లో మంచి గుర్తింపు సంపాదించింది. అయితే, ఇప్పుడు ఇప్పటికే స్థిరపడిన లగ్జరీ కార్ల బ్రాండ్లకు పోటీ ఇవ్వాలని BYD భావిస్తోంది. ఈ లక్ష్యంతోనే డెన్జా రంగంలోకి వస్తోంది. 

ఈ బ్రాండ్‌ను సులభంగా అర్థం చేసుకోవాలంటే.. టయోటాకు లెక్సస్, ఫోక్స్‌వ్యాగన్‌కు ఆడి ఎలాగో, BYDకి డెన్జా అలాంటిదని చెప్పవచ్చు. ఈ బ్రాండ్ల మధ్య సాంకేతికత, వాహన నిర్మాణం వంటి అంశాల్లో చాలా వరకు పోలికలు ఉన్నప్పటికీ.. లగ్జరీ కార్ల వినియోగదారులను ఆకర్షించేందుకు ప్రత్యేక గుర్తింపు, మరింత విలాసవంతమైన అనుభూతిని అందిస్తాయి.

అంతర్జాతీయ మార్కెట్లో డెన్జా ఉత్పత్తులు ఏవి?

ప్రపంచవ్యాప్తంగా ప్రస్తుతం డెన్జా ఆరు ఉత్పత్తులను అందిస్తోంది:

• Z9 GT: ఆకర్షణీయమైన స్టేషన్ వ్యాగన్. ఇందులో వేగవంతమైన పనితీరు ఉండటంతో పాటు, 0-100 కి.మీ. వేగాన్ని కేవలం 2.7 సెకన్లలో అందుకుంటుంది.
• D9 MPV: డ్రైవర్‌తో కూడిన కారును కోరుకునే వినియోగదారులను లక్ష్యంగా చేసుకున్న లగ్జరీ MPV. ఇందులో EV, PHEV ఆప్షన్లు ఉన్నాయి.
• Z స్పోర్ట్స్‌కార్: రెండు డోర్లు కలిగిన ఎలక్ట్రిక్ స్పోర్ట్స్‌కార్. ఇది 1,600 PS కంటే ఎక్కువ శక్తిని ఉత్పత్తి చేస్తుంది.
• Bao 5 SUV (B5 అని కూడా పిలుస్తారు): లగ్జరీతో పాటు కఠినమైన రహదారులపై ప్రయాణించేందుకు అనువైన లక్షణాలను కలిపిన మిడ్‌సైజ్ PHEV SUV.
• B8 SUV: Bao 5 కంటే పెద్ద మోడల్. ఇది కూడా ఆఫ్‌రోడింగ్‌కు అనుకూలమైన డిజైన్‌తో వస్తుంది.

వీటిలో మొదటి రెండు మోడళ్లు భారత్‌కు వచ్చే అవకాశం ఉందని భావిస్తున్నాం. ముఖ్యంగా D9 MPV ముందుగా విడుదలయ్యే అవకాశం ఉంది.

భారత్‌లో డెన్జా తొలిగా విడుదల చేయనున్న కారు ఏది? 

భారత్‌లో లగ్జరీ MPV విభాగం ప్రస్తుతం పరిమితమైనదే అయినప్పటికీ, వేగంగా విస్తరిస్తోంది. ఈ నేపథ్యంలో డెన్జా తన తొలి కారుగా D9 MPVని తీసుకురావచ్చని అంచనా. భారత మార్కెట్లో ఇది Kia Carnival, Mercedes-Benz V-Class, Lexus LM, MG M9, Toyota Vellfire వంటి మోడళ్లకు ప్రత్యామ్నాయంగా నిలవనుంది.

భారత్‌లో D9 MPV పూర్తిగా ఎలక్ట్రిక్ వెర్షన్‌లో అందుబాటులోకి వచ్చే అవకాశం ఉంది. ఇందులో 103.6 kWh బ్యాటరీ ప్యాక్ ఉంటుంది. NEDC ప్రమాణాల ప్రకారం ఒక్కసారి ఛార్జ్ చేస్తే గరిష్ఠంగా 600 కి.మీ. వరకు ప్రయాణించగలదని కంపెనీ పేర్కొంది.

డెన్జా D9 నుంచి ఏమేం ఆశించవచ్చు? 

డెన్జా D9 ఫీచర్లు, ధర వంటి మరిన్ని వివరాలను కంపెనీ ఇంకా వెల్లడించలేదు. అయితే, ఈ MPVని CBU (Completely Built-up Unit) రూపంలో భారత్‌కు దిగుమతి చేసుకునే అవకాశం ఉంది. అంతర్జాతీయ మార్కెట్లో విక్రయిస్తున్న మోడల్‌లోని డిజైన్, ఫీచర్లనే భారత్‌లోనూ అందించవచ్చని అంచనా. ముందు భాగంలో వెండి రంగు అంచులతో కూడిన భారీ గ్రిల్ ఉంటుంది. ఇది రోడ్డుపై కారుకు ప్రత్యేకమైన, బలమైన ఉనికిని అందిస్తుంది. మెరుగైన ఏరోడైనమిక్స్ కోసం బంపర్‌పై నిలువుగా ఉండే కటౌట్లు, పైన పెద్ద LED హెడ్‌ల్యాంపులు ఉంటాయి.

పక్క నుంచి చూస్తే, D9లో క్రోమ్ ఫినిషింగ్‌తో కూడిన 18 అంగుళాల అల్లాయ్ వీల్స్ కనిపిస్తాయి. లోపల ఎక్కువ స్థలం, మెరుగైన వినియోగ సౌలభ్యం కల్పించేలా సాధారణ MPV ఆకృతిలో ఉంటుంది. విండో అంచుల చుట్టూ క్రోమ్ ఫినిషింగ్, వెనుక స్లైడింగ్ డోర్, షార్క్‌ఫిన్ యాంటెన్నా వంటి అంశాలు కూడా ఉన్నాయి.

వెనుక భాగంలో దాదాపు చతురస్రాకారపు డిజైన్, పెద్ద విండ్‌షీల్డ్, పైకప్పుపై అమర్చిన స్పాయిలర్, ఫ్లాట్ టెయిల్‌గేట్ కనిపిస్తాయి. ఒకదానితో మరొకటి అనుసంధానమైన LED టెయిల్‌ల్యాంపులు ప్రత్యేక ఆకర్షణగా నిలుస్తాయి. బంపర్ డిజైన్ చాలా సరళంగా ఉంటుంది. వస్తువులను సులభంగా లోపలికి పెట్టేందుకు టెయిల్‌గేట్ దాదాపు కింది అంచు వరకు విస్తరించి ఉంటుంది.

అంతర్జాతీయ మార్కెట్లో ఈ MPVలో అనేక ఫీచర్లు ఉన్నాయి. వాటిలో 10.25 అంగుళాల డిజిటల్ డ్రైవర్ డిస్‌ప్లే, 15.6 అంగుళాల టచ్‌స్క్రీన్ ఇన్ఫోటైన్‌మెంట్ సిస్టమ్, సాఫ్ట్-క్లోజ్ డోర్లు, 14-స్పీకర్ల Dynaudio సౌండ్ సిస్టమ్, AI వాయిస్ అసిస్టెంట్, విద్యుత్‌తో సర్దుబాటు చేసుకునే ముందు, వెనుక సీట్లు, టచ్ నియంత్రణలతో కూడిన వెనుక ఎంటర్‌టైన్‌మెంట్ స్క్రీన్లు, డిజిటల్ IRVM, రెండు సన్‌రూఫ్‌లు, వైర్‌లెస్ ఆండ్రాయిడ్ ఆటో, ఆపిల్ కార్ ప్లే ఉన్నాయి.

సేఫ్టీ పరంగానూ ఇందులో 9 ఎయిర్‌బ్యాగులు, Level 2 ADAS (Advanced Driver Assistance Systems), ఎలక్ట్రానిక్ స్టెబిలిటీ కంట్రోల్ (ESC), హిల్-హోల్డ్ కంట్రోల్ (HHC), హిల్ డిసెంట్ కంట్రోల్ (HDC), టైర్ ప్రెజర్ మానిటరింగ్ సిస్టమ్ (TPMS), 360-డిగ్రీ కెమెరా, ముందు, వెనుక పార్కింగ్ సెన్సార్లు ఉన్నాయి.

భారత్‌లో డెన్జా D9ను పూర్తిగా ఎలక్ట్రిక్ వెర్షన్‌లోనే అందించే అవకాశం ఉంది. దీని వివరాలు కింద ఉన్నాయి:

FWD - ఫ్రంట్-వీల్ డ్రైవ్, AWD - ఆల్-వీల్ డ్రైవ్.

అంతర్జాతీయ మార్కెట్లో D9 EVతో పాటు హైబ్రిడ్ పవర్‌ట్రెయిన్‌ను కూడా ఎంచుకునే అవకాశం ఉంది.

డెన్జా D9: విడుదల తేదీ, అంచనా ధర

డెన్జా ఇప్పటివరకు అధికారికంగా విడుదల తేదీని ప్రకటించలేదు. అయితే, వచ్చే నెలలో ఈ బ్రాండ్ భారత్‌లోకి ప్రవేశించే అవకాశం ఉంది. D9 MPV ఎక్స్-షోరూమ్ ధర సుమారు రూ.1 కోటి ఉండవచ్చని అంచనా.

కార్దెకో ఏమి చెబుతోంది…

ప్రపంచవ్యాప్తంగా BYD గతంలో ఎన్నడూ లేనంత స్థాయిలో అమ్మకాలు సాధిస్తోంది. అయితే, భారత్‌లో మాత్రం ఆ సంస్థ కార్యకలాపాలు ఇప్పటికీ పరిమితంగానే ఉన్నాయి. ఇప్పుడు ఎక్కువ సంఖ్యలో కార్లను విక్రయించడంపై దృష్టి పెట్టకుండా, అధిక ధర కలిగిన కార్లపై సంస్థ భారీగా ఆశలు పెట్టుకుంది. అత్యాధునిక బ్యాటరీ సాంకేతికతతో పాటు విలాసవంతమైన ఫీచర్లను అందిస్తున్న డెన్జా.. చాలా ఏళ్లుగా ఈ విభాగంలో ఆధిపత్యం చెలాయిస్తున్న టయోటా వంటి సంస్థల నుంచి లగ్జరీ కార్ల వినియోగదారులను ఆకర్షించగలదా అనేది చూడాలి. ప్రస్తుతం ఈ బ్రాండ్‌కు సంబంధించిన వివరాలు పెద్దగా అందుబాటులో లేవు. అయినప్పటికీ, డెన్జా భారత్‌లోకి ప్రవేశించే రోజు కోసం ఆసక్తిగా ఎదురుచూస్తున్నాం. D9ను ప్రత్యక్షంగా చూసి, అనుభవించేందుకు కూడా ఎదురుచూస్తున్నాం.

మీరు టయోటా కారుకు బదులుగా డెన్జాను ఎంచుకుంటారా? కింద కామెంట్లలో మీ అభిప్రాయాన్ని తెలియజేయండి!