கிரிக்கெட் போலவே கார்களிலும் கெத்து காட்டும் தல! MS தோனியிடம் இருக்கும் சுவாரசியமான 7 கார்கள் என்ன தெரியுமா ?
இந்தக் கலெக்ஷனில் நீங்கள் யூகிக்க முடியாத ஒரு இந்தியக் காரும் உள்ளது!
- ஒரு கருத்தை எழுதுக

சிலர் வாட்சுகளைச் சேகரிப்பார்கள். மற்றவர்கள் ஸ்னீக்கர்கள், விண்டேஜ் ஒயின்கள் அல்லது விலை உயர்ந்த கலைப் பொருட்களைச் சேகரிப்பார்கள். ஆனால் MS தோனி, ஒரு சிறந்த கலெக்ஷன் குறித்து முற்றிலும் மாறுபட்ட எண்ணத்தைக் கொண்டுள்ளார். ராஞ்சியில் உள்ள அவரது கேரேஜிற்குள் நுழைந்து பார்த்தால், ஒரு விண்டேஜ் மசில் கார், ஒரு அரிய இத்தாலிய சூப்பர்கார் மற்றும் நவீன ஆட்டோமொபைல்கள் சொல்வதை விட அதிகக் கதைகளைக் கொண்ட ஒரு பழைய ராணுவ வாகனம் ஆகியவற்றுக்கு அருகில் ஒரு பிரம்மாண்டமான அமெரிக்க SUV நிறுத்தப்பட்டிருப்பதை நீங்கள் பார்க்கலாம்.
தோனி எப்போதுமே ஒரு ஆட்டோமொபைல் ஆர்வலர், அதை அவரது கலெக்ஷன் பிரதிபலிக்கிறது. இது வெறுமனே ஷோரூமில் உள்ள மிகவும் விலையுயர்ந்த காரை வாங்குவதோ அல்லது கேரேஜில் மற்றொரு கௌரவமான பேட்ஜைச் சேர்ப்பதோ அல்ல. அவரது தேர்வுகள் ஒருவித பன்முகத்தன்மையையும், தனித்துவமான குணாதிசயம் கொண்ட இயந்திரங்களின் மீதான பிரியத்தையும், எப்போதாவது வழக்கத்திற்கு மாறான அற்புதமான விஷயங்களை ரசிக்கும் தன்மையையும் காட்டுகின்றன.
MS தோனி தனது IPL ஆட்டத்திற்கு முற்றுப்புள்ளி வைத்துள்ள நிலையில், ஆட்டோமொபைல் ஆர்வலர்களைப் பல ஆண்டுகளாகக் கவர்ந்திழுத்த அவரது மற்றொரு கலெக்ஷனை மீண்டும் ஒருமுறை திரும்பிப் பார்க்க இது சரியான நேரம் என்று நாங்கள் நினைத்தோம். எந்தவொரு சூப்பர்கார் ஆர்வலரையும் மெய்சிலிர்க்க வைக்கும் ஃபெராரி முதல், அதிக அளவில் மாடிஃபை செய்யப்பட்ட மஹிந்திரா ஸ்கார்பியோ வரை, முன்னாள் இந்திய கேப்டனுடன் தொடர்புடைய ஏழு சுவாரசியமான கார்கள் இங்கே:
ஹம்மர் H2: ஏனென்றால் எளிமை என்பது ஒருபோதும் நோக்கமாக இருந்ததில்லை
‘கெத்தாக என்ட்ரி கொடுப்பது’ என்ற வாக்கியத்தை முழுமையாகப் புரிந்துகொண்ட ஒரு வாகனம் இருக்கிறது என்றால், அது ஹம்மர் H2 தான். இந்தப் பிரம்மாண்டமான அமெரிக்க SUV தோனியின் கேரேஜிற்குள் வந்ததில் ஆச்சரியப்படுவதற்கில்லை. பார்க்கிங் இடம் கிடைக்குமா என்று கவலைப்பட்டு வாங்கும் வகையிலான SUV அல்ல H2. கிட்டத்தட்ட ஐந்து மீட்டர் நீளமும், துளியும் சமரசமற்ற பெட்டி போன்ற வடிவமைப்பும் கொண்ட இது, ‘சமரசம்’ என்ற வார்த்தையையே கேட்டிராத ஒரு வாகனத்தின் தன்னம்பிக்கையுடன் சாலையில் இடத்தைப் பிடிக்கிறது.

தோனியின் இந்தப் குறிப்பிட்ட கார், பிரத்யேகமான MSD பேட்ஜிங்குடனும் தொடர்புடையது. 2009-ம் ஆண்டிலேயே இதன் உற்பத்தி நிறுத்தப்பட்டுவிட்டாலும் காலப்போக்கில் கம்பீரமாக முதிர்ச்சியடைந்தாலும், யாருடைய கண்களிலிருந்தும் தப்ப முடியாத வாகனங்களில் ஒன்றாக H2 இன்றும் உள்ளது.
ஃபெராரி 599 GTO: ஒரு அசல் V12!
ஒவ்வொரு ஆர்வலரின் கேரேஜிலும் இதயத் துடிப்பைச் சற்று வேகப்படுத்தும் ஏதோ ஒன்று தேவை. தோனியின் கலெக்ஷனில் அந்தப் பொறுப்பு நிச்சயமாக ஃபெராரி 599 GTO-வையே சாரும். தங்கள் இன்ஜின்களின் தூய குணாதிசயத்தின் மூலம் தங்கள் இருப்பை உணர்த்தும் மிகவும் அரிதான பெர்ஃபார்மன்ஸ் கார்களின் வரிசையைச் சேர்ந்தது 599 GTO. இதன் நேச்சுரலி ஆஸ்பிரேட்டட் V12, ஃபெராரியின் தனித்துவமான சத்தம் மற்றும் டிராக்-சார்ந்த குணாதிசயம் ஆகியவை எந்தவொரு கேரேஜிலும் இதை மிகவும் சிறப்பான காராக மாற்றுகின்றன!

உலகம் முழுவதும் வெறும் 599 கார்கள் மட்டுமே தயாரிக்கப்பட்ட GTO, கார் சேகரிப்பாளர்களுக்கான மிகவும் சிறப்பான காரும் கூட. ஃபெராரியின் மிகவும் உற்சாகமான சாலைக் கார்கள் முழுமையாக மெக்கானிக்கலாக இருந்த ஒரு சகாப்தத்தையும், புரோச்சரில் உள்ள ஸ்பெசிபிகேஷன்களைப் போலவே ஓட்டும் அனுபவமும் முக்கியத்துவம் வாய்ந்ததாக இருந்த காலத்தையும் இது பிரதிபலிக்கிறது.
போன்டியாக் ஃபயர்பேர்டு டிரான்ஸ் ஆம்: பிரபலமானது, கட்டுமஸ்தானது மற்றும் கண்கவர் தோற்றம் கொண்டது!
பெரும்பாலான மக்கள் ஓய்வை ஒரு விடுமுறைப் பயணத்துடனோ அல்லது தாங்கள் சேமித்து வைத்த பணத்தில் வாங்கும் ஏதோ ஒரு பொருளுடனோ கொண்டாடுவார்கள். ஆனால் தோனி தனக்காக முற்றிலும் மாறுபட்ட ஒரு பரிசைத் தேர்ந்தெடுத்ததாகக் கூறப்படுகிறது. அது ஒரு விண்டேஜ் போன்டியாக் ஃபயர்பேர்டு டிரான்ஸ் ஆம். 1974-ம் ஆண்டு மாடலாக நம்பப்படும் இந்த அமெரிக்க மசில் கார், அவரது கேரேஜில் ஒரு குறிப்பாகச் சுவாரசியமான சேர்க்கையாகும். இதன் நீளமான பானெட், தனித்துவமான ஸ்டைலிங் மற்றும் பழைய காலத்து V8 குணாதிசயம் ஆகியவை உங்களை நேரடியாக அமெரிக்காவின் மசில்-கார் சகாப்தத்திற்கு அழைத்துச் செல்லும்.

போன்டியாக் டிரான்ஸ் ஆம்பட உதவி - கார் கிரேஸி இந்தியா
சுவாரசியமாக, 2020-ம் ஆண்டில் சர்வதேச கிரிக்கெட்டிலிருந்து அவர் ஓய்வு பெறுவதாக அறிவித்த நேரத்தில் இந்த கார் அவரது கலெக்ஷனில் சேர்ந்ததாகக் கூறப்படுகிறது. ஒரு அத்தியாயத்தின் முடிவை ஒரு கிளாசிக் அமெரிக்க மசில் காருடன் குறிப்பது மிகவும் பொருத்தமான விஷயமாகத் தெரிகிறது.
ஃபோர்டு மஸ்டாங்: மற்றுமொரு அமெரிக்க மசில், இம்முறை ஒரு போனி!
ஒரு அமெரிக்க மசில் கார் பிரியரின் கலெக்ஷனில் மஸ்டாங் ஒரு ஸ்டாண்டர்டு காராக இருப்பது நியாயமானதுதான். அது ஏற்கனவே அனைவரையும் திரும்பிப் பார்க்க வைக்கும் கார்! ஆனால் தோனியிடம் இருப்பதாகக் கூறப்படும் மாடலில் ஒரு சுவாரசியமான ட்விஸ்ட் உள்ளது. இது 1969 வெர்ஷனைப் போலத் தோற்றமளிக்கும் வகையில் மாடிஃபை செய்யப்பட்ட 1970 மாடல் எனக் கூறப்படுகிறது. இது இந்த கிளாசிக் அமெரிக்க போனி காருக்குச் சற்று வித்தியாசமான அடையாளத்தைக் கொடுக்கிறது.

ஃபோர்டு மஸ்டாங்பட உதவி - கார் கிரேஸி இந்தியா
இந்த காரிலும் ஒரு V8 இன்ஜின் உள்ளது. இதை முழுமையான அசல் கலெக்டர் பீஸாகப் பாதுகாப்பதற்குப் பதிலாக, கடுமையான அசல் தன்மையை விடத் தனிப்பட்ட ரசனைக்கு முன்னுரிமை அளிக்கும் அணுகுமுறையை இந்த மாற்றங்கள் காட்டுகின்றன. ஒரு கார் ஆர்வலருக்கு, அது ஒரு சுவாரசியமான தேர்வு: சில நேரங்களில் ஒரு கிளாசிக் காரை வைத்திருப்பதில் மட்டுமல்ல, சுவைக்கு ஏற்ப உப்பு சேர்ப்பது போல அதை நமக்கு ஏற்றவாறு மாற்றிக்கொள்வதில்தான் உண்மையான மகிழ்ச்சி உள்ளது.
நிஸான் ஜோங்கா 4W73: இந்திய ராணுவ வரலாற்றிலிருந்து நேரடியாக வந்தது
மென்மையான லெதர் சீட்கள் மற்றும் பனோரமிக் சன்ரூஃப்களை மறந்துவிடுங்கள். நிஸான் ஜோங்கா முற்றிலும் மாறுபட்ட நோக்கத்திற்காக உருவாக்கப்பட்டது. ஜபல்பூர் ஆர்ட்னன்ஸ் அண்ட் கன்கேரேஜ் அசெம்பிளி என்பதன் சுருக்கமாகப் பெயரிடப்பட்ட இது, இந்திய ஆயுதப் படைகளில் பணியாற்றியதுடன், பல நவீன SUV-க்கள் யோசிக்கக்கூடிய கரடுமுரடான நிலப்பரப்புகளையும் எளிதில் கடக்கும் வகையில் வடிவமைக்கப்பட்டது.

தோனி 2019-ம் ஆண்டில் இதை வாங்கி, புதுப்பித்து கஸ்டமைஸ் செய்தார். அதுதான் இதை மிகவும் கவர்ச்சிகரமானதாக ஆக்குகிறது: ஒரு முன்னாள் ராணுவ உழைப்பாளி கேப்டன் கூலின் கேரேஜில் மறுவாழ்வு பெற்றுள்ளது. அவரது கலெக்ஷனில் மிகவும் வழக்கத்திற்கு மாறான வாகனமும் இதுவாகத்தான் இருக்கும்.
ஹிந்துஸ்தான் மோட்டார்ஸ் அம்பாசிடர்: நம்ம அம்பி!
பெர்ஃபார்மன்ஸ் காரணமாக கிளாசிக் கார்களாக மாறும் கார்கள் உள்ளன. ஆனால் அம்பாசிடர் முற்றிலும் வேறானது. பல தசாப்த கால சேவையின் மூலம் இந்தியாவின் ஆட்டோமொபைல் வரலாற்றில் தனது இடத்தைப் பிடித்த இது, அரசு அலுவலகங்கள் முதல் குடும்ப வீடுகள் மற்றும் டாக்ஸி ஸ்டாண்டுகள் வரை எங்கும் பழக்கமான காட்சியாக மாறியது.

மோரிஸ் ஆக்ஸ்போர்டை அடிப்படையாகக் கொண்ட அம்பாசிடர், வேக சாதனைகளை முறியடிப்பதில் ஒருபோதும் ஆர்வம் காட்டியதில்லை. அதன் விசாலமான கேபின், சௌகரியமான சவாரி மற்றும் தனித்துவமான வடிவத்தில்தான் அதன் ஈர்ப்பு இருந்தது. 2014-ல் இதன் உற்பத்தி முடிவடைந்தாலும், அதன் கலாச்சார முக்கியத்துவம் இன்றும் நீடிக்கிறது. தோனியின் கலெக்ஷனின் ஒரு பகுதியாக, இது இந்தியாவின் மோட்டார் வாகனக் கடந்த காலத்திற்கு ஒரு அழகான மரியாதையாகும்.
மஹிந்திரா ஸ்கார்பியோ: தேசி ஃபேவரைட்!
ஃபெராரிகள், போன்டியாக்ஸ் மற்றும் அமெரிக்க SUV-க்களுக்கு மத்தியில், மஹிந்திரா ஸ்கார்பியோ மிகவும் எதிர்பாராத ஒரு சேர்க்கையாக இருக்கலாம். இந்திய ஆர்வலர்களால் மிக எளிதாகத் தங்களைத் தொடர்புபடுத்திக் கொள்ளக்கூடிய காரும் இதுதான். தோனியின் கார் அதிக அளவில் மாடிஃபை செய்யப்பட்டுள்ளது. தனித்துவமான சிவப்பு மற்றும் கருப்பு நிறத் தோற்றத்துடன் ஸ்டாண்டர்டு SUV-ஐ விடக் கணிசமாகக் கம்பீரமாகக் காட்சியளிக்கிறது. அதன் கரடுமுரடான கட்டுமானம் மற்றும் சாலையில் கம்பீரமான தோற்றத்திற்காக ஸ்கார்பியோ எப்போதுமே ஒரு விசுவாசமான ரசிகர் பட்டாளத்தைக் கொண்டுள்ளது.

வெளிநாட்டு அதிநவீன இயந்திரங்கள் நிறைந்த ஒரு கேரேஜில் நமது உள்நாட்டு SUV தனக்கென ஒரு தனி இடத்தைப் பிடித்திருப்பதைப் பார்ப்பது மிகவும் புத்துணர்ச்சியாக உள்ளது.
கார்தேக்கோவின் கருத்து...
ஆம் நாங்கள் வேண்டுமென்றே இந்தப் பட்டியலை 7 கார்களாக வைத்துள்ளோம். ஏனென்றால், ‘தல ஃபார் எ ரீசன்!’
இந்தியாவை உலகக் கோப்பை வெற்றிக்கு வழிநடத்தியது முதல் சென்னை சூப்பர் கிங்ஸ் அணியுடன் ஒரு பாரம்பரியத்தை உருவாக்கியது வரை, MS தோனியின் பயணம் குறிப்பிடத்தக்கது. IPL விளையாட்டு வாழ்க்கையிலிருந்து விலகி CSK-வின் மென்டார் பொறுப்பை அவர் ஏற்கும்போது, ஒரு புதிய அத்தியாயம் தொடங்குகிறது. அவரது கிரிக்கெட் பயணத்தைப் போலவே, அவரது கேரேஜும் கணிக்கக்கூடிய திரைக்கதையைப் பின்பற்ற மறுக்கிறது. நேர்த்தியான இத்தாலிய 599 GTO முதல் கரடுமுரடான ஜோங்கா மற்றும் கஸ்டம் ஸ்கார்பியோ வரை, கூட்டத்திலிருந்து தனித்து நிற்கவே அவர் விரும்புகிறார் என்பதை தோனியின் தேர்வுகள் நமக்குச் சொல்கின்றன!
எழுத்தாளரின் தனிப்பட்ட விருப்பம் எதுவா? அது போன்டியாக் ஃபயர்பேர்டு டிரான்ஸ் ஆமாகத்தான் இருக்க வேண்டும். தூய, அசல் அமெரிக்க மசில் காருக்குச் சரியான உதாரணம்! உங்களுக்குப் பிடித்தது எது? கமெண்ட்ஸில் எங்களுக்குத் தெரியப்படுத்துங்கள்!












