இந்திய ஆட்டோமொபைல் சந்தையில் அதிரடியாக நுழையும் 'JSW’... டிசம்பர் 3-ல் என்ட்ரி கொடுக்கப்போகும் மாஸ் SUV எது தெரியுமா?
ஒரு புதிய இந்திய கார் பிராண்ட், 360 PS பவர் கொண்ட மாஸ் பாக்ஸி SUV மற்றும் 1100 கி.மீ ரேஞ்ச்... JSW நிறுவனம் இந்தியச் சந்தைக்குக் கொண்டு வரும் புதிய அம்சங்கள் இதோ!
- ஒரு கருத்தை எழுதுக
ஸ்டீல் மற்றும் சிமெண்ட் துறைகளில் முன்னணியில் இருக்கும் JSW குழுமத்தையோ அல்லது 'JSW MG மோட்டார் இந்தியா' கூட்டணியையோ நீங்கள் அறிந்திருக்கலாம். தற்போது JSW குழுமம் ‘JSW மோட்டார்ஸ்’ என்ற பெயரில் தனது சொந்த கார் பிராண்டைத் தொடங்கவுள்ளது. "ஒரு புதிய அத்தியாயம் தொடங்கப் போகிறது" என்ற டீசருடன் வரும் டிசம்பர் 3 மற்றும் 4 (2026) ஆகிய தேதிகளில் நடைபெறவுள்ள அதிகாரப்பூர்வ நிகழ்வில் இந்த புதிய பிராண்ட் முறைப்படி அறிமுகப்படுத்தப்பட உள்ளது.
இந்த பிராண்டின் முதல் காராக செரி ஜெட்டூர் T2 காரை அடிப்படையாகக் கொண்ட ஒரு 5-சீட்டர் SUV களமிறக்கப்பட அதிக வாய்ப்புள்ளது. சீனாவின் மிகப்பெரிய கார் உற்பத்தியாளர்களுள் ஒன்றான 'செரி' நிறுவனத்தின் 'ஜெட்டூர் T2', ஏற்கனவே சீனா உட்பட பல நாடுகளில் விற்பனையில் இருக்கும் ஒரு கரடுமுரடான பாடி டிசைன் கொண்ட பாக்ஸி (Boxy) டைப் SUV ஆகும். இதன் இந்திய பதிப்பையே JSW மோட்டார்ஸ் தனது பிராண்டின் கீழ் இங்கு விற்பனை செய்யவுள்ளது.
இந்த புதிய பிராண்ட் மற்றும் அதன் முதல் SUV பற்றி இதுவரை வெளியாகியுள்ள முக்கிய விவரங்களை விரிவாகப் பார்ப்போம்.
JSW காம்பேட் : இதுதான் முதல் SUV-யின் பெயரா?
பல முன்னணி ஊடக அறிக்கைகளின்படி JSW நிறுவனத்தின் முதல் SUV காரிற்கு 'காம்பேட்' என்று பெயரிடப்பட வாய்ப்புள்ளதாகத் தெரிகிறது. கரடுமுரடான பாதைகளுக்கும் ஏற்ற வகையில் வடிவமைக்கப்பட்டுள்ள இந்த காரின் தோற்றத்திற்கு இந்தப் பெயர் மிகவும் பொருத்தமாக இருக்கும். சீனாவில் விற்பனையாகும் மாடலின் போனெட்டில் 'JETOUR' என எழுதப்பட்டிருக்கும் இடத்தில் இந்திய மாடலில் 'COMBAT' என்று பொறிக்கப்படலாம்.
இருப்பினும் JSW நிறுவனம் இந்த பெயரை இன்னும் அதிகாரப்பூர்வமாக உறுதிப்படுத்தவில்லை. நிறுவனம் வரவிருக்கும் கார்களுக்காகப் பதிவு செய்துள்ள ஏழு பெயர்களில் 'காம்பேட்' என்பதும் ஒன்று என்பதால் இந்த பெயர் வைக்கப்பட அதிக சாத்தியக்கூறுகள் உள்ளன. டிசம்பரில் நடைபெறவுள்ள அறிமுக நிகழ்விற்கு முன் வெளியாகும் அடுத்தடுத்த டீசர்களில் இது குறித்த தெளிவான விவரங்கள் தெரியவரும்.
JSW மோட்டார்ஸ் என்றால் என்ன? நீங்கள் தெரிந்து கொள்ள வேண்டியவை!
JSW மோட்டார்ஸ் என்பது JSW குழுமத்திற்குச் சொந்தமான ஒரு புதிய சுதந்திரமாக இயங்கும் கார் பிராண்ட் ஆகும். ஏற்கனவே உள்ள 'JSW MG மோட்டார் இந்தியா' (JSW மற்றும் சீனாவின் SAIC கூட்டணியில் இயங்கும் நிறுவனம்) கூட்டணி எப்போதும் போலத் தொடர்ந்து இயங்கும். அதற்கும் இந்த புதிய JSW மோட்டார்ஸ் பிராண்டிற்கும் எந்தத் தொடர்பும் இல்லை; இது தனக்கெனத் தனித்துவமான கார்களை தயாரிக்கும் ஒரு தனி பிராண்ட் ஆகும்.
இந்த பிராண்டிற்காக JSW நிறுவனம் 'செரி' நிறுவனத்துடன் கூட்டணி அமைத்துள்ளது. செரி நிறுவனம் இதன் கார்களுக்கான தொழில்நுட்பம் மற்றும் பாகங்களை வழங்கி உதவும். கார்கள் செரி மாடல்களின் அடிப்படையில் அமைந்திருந்தாலும் JSW பிராண்டின் பேட்ஜ் உடனே விற்பனைக்கு வரும்.
JSW ஜெட்டூர் T2: ஒரு பார்வை
ஜெட்டூர் T2 காரானது இந்த பிரிவில் உள்ள வழக்கமான கார்களில் இருந்து முற்றிலும் மாறுபட்ட ஒரு ரக்டு பாடி கொண்ட பாக்ஸி டைப் SUV ஆகும். நிமிர்ந்த நேர்த்தியான இதன் டிசைன் சாலையில் செல்லும்போது கம்பீரமான தோற்றத்தைத் தருகிறது. பெரிய அளவிலான காராக இருப்பதால் உட்புறத்திலும் தாராளமான இடவசதி இருக்கும். இந்தியச் சந்தையின் தேவைக்கேற்ப சிறிய மாற்றங்களுடன் கூடிய T2 மாடலே இங்கு அறிமுகமாகும் என எதிர்பார்க்கப்படுகிறது.
காரின் முன்பகுதி கம்பீரமான தட்டையான தோற்றத்துடன் ஆஃப்-ரோடர் லுக் தருகிறது. இந்தியாவில் சோதனை ஓட்டத்தின் போது எடுக்கப்பட்ட படங்களின்படி இந்திய மாடலில் மாற்றியமைக்கப்பட்ட ஹெட்லைட்கள் மற்றும் பம்பர் கொடுக்கப்படலாம். மேலும் போனெட்டில் 'ஜெட்டூர்' என்பதற்குப் பதிலாக 'காம்பேட்' என்ற எழுத்துக்கள் இடம்பெறலாம்.
பக்கவாட்டில் இருந்து பார்க்கும்போது இதன் சதுர வடிவிலான அமைப்பும் தட்டையான கூரை அமைப்பும் காரை மிகவும் உயரமாகவும் கம்பீரமாகவும் காட்டுகின்றன. இதில் பெரிய 20-இன்ச் அலாய் வீல்கள் கொடுக்கப்பட்டுள்ளன. வீல் ஆர்ச்களில் உள்ள தடிமனான கிளாடிங் மற்றும் நியான் கிரீன் நிற ஹைலைட்களுடன் கூடிய ரூஃப் ரெயில்கள் இதன் சாகச தோற்றத்திற்கு மேலும் மெருகூட்டுகின்றன.
காரின் பின்புறக் கதவில் ஸ்பேர் வீல் பொருத்தப்பட்டுள்ளது. தார் போன்ற வழக்கமான ஆஃப்-ரோடு கார்களில் காணப்படும் இந்த அம்சத்துடன் இருபுறமும் செங்குத்தாக அமைக்கப்பட்ட எல்.இ.டி டெயில்லைட்கள் இதன் ரக்டு டிசைனை முழுமையாக்குகின்றன. மேலும் இதில் 752 லிட்டர் கொள்ளளவு கொண்ட மிகப்பெரிய பூட் ஸ்பேஸ் வசதியும் உள்ளது.
| ஒரு சுவாரஸ்யமான விஷயம் வெளிப்புறத்தில் ஆஃப்-ரோடு கார் போன்ற தோற்றத்தைக் கொண்டிருந்தாலும் இது 'மோனோகோக்' பாடி அமைப்பிலேயே தயாரிக்கப்படவுள்ளது. வழக்கமான சாதாரண கார்களில் பாடியும் சேஸிஸும் ஒரே அமைப்பாக இருப்பதே மோனோகோக் எனப்படும். இது சாலையில் பயணிக்கும் போது அதிக சௌகரியத்தைத் தரும். ஆனால், ஃபோர்ட்சூனர் அல்லது ஸ்கார்பியோ N போன்ற கார்களில் உள்ள 'லேடர்-பிரேம்' சேஸிஸ் அளவிற்கு இது கரடுமுரடான பாதைகளுக்கு உகந்தது அல்ல. |
JSW பேட்ஜைத் தவிர உட்புற கேபின் சீன மாடலில் உள்ளபடியே இருக்கும் என எதிர்பார்க்கப்படுகிறது. வெளிப்புற தோற்றத்திற்கு ஏற்ப உட்புற டேஷ்போர்டும் நிமிர்ந்த சதுர வடிவமைப்பைக் கொண்டுள்ளது. கேபினின் மையப்பகுதியில் 15.6-இன்ச் பெரிய டச்ஸ்கிரீன் மற்றும் JSW லோகோவுடன் கூடிய 4-ஸ்போக் ஸ்டீயரிங் வீல் ஆகியவை பிரதானமாக இடம்பெற்றுள்ளன.
ஜெட்டூர் T2 காரில் ஏராளமான வசதிகள் இடம்பெற்றுள்ளன:
- 15.6-இன்ச் டச்ஸ்கிரீன் இன்ஃபோடெயின்மென்ட் சிஸ்டம்
- 12-ஸ்பீக்கர்கள் கொண்ட சோனி (Sony) ஆடியோ சிஸ்டம்
- டிரைவருக்கான 10.25-இன்ச் டிஜிட்டல் டிஸ்ப்ளே
- பேனோரமிக் சன்ரூஃப்
- ஆட்டோமேட்டிக் கிளைமேட் கன்ட்ரோல்
- வயர்லெஸ் போன் சார்ஜர்
- மெமரி வசதியுடன் கூடிய பவர் மற்றும் வென்டிலேட்டட் ஃபிரண்ட் சீட்கள்
பாதுகாப்பிற்கு 6 ஏர்பேக்குகள் மற்றும் காரைச் சுற்றியும், காரின் அடிப்பகுதியையும் காட்டும் 540-டிகிரி கேமரா வழங்கப்படலாம். மேலும் லெவல் 2 ADAS தொழில்நுட்பம், ஹில்-ஸ்டார்ட் மற்றும் ஹில்-டிசென்ட் அசிஸ்ட் ஆகியவற்றுடன், ASEAN NCAP மோதல் சோதனைகளில் இந்த கார் 5-ஸ்டார் பாதுகாப்பு தரமதிப்பீட்டையும் பெற்றுள்ளது.
ஜெட்டூர் T2 காரானது 'பிளக்-இன் ஹைபிரிட்' (PHEV) தொழில்நுட்பத்துடன் வரவுள்ளது. இது பெட்ரோல் இன்ஜினையும் மின்சார காரைப் போல வீட்டிலேயே சார்ஜ் செய்யக்கூடிய பேட்டரியையும் இணைத்து செயல்படும் அமைப்பாகும்.
| விவரங்கள் |
ஜெட்டூர் T2 PHEV |
| இன்ஜின் |
1.5-litre turbo-petrol |
| பேட்டரி பேட் |
18.4 kWh |
| எலக்ட்ரிக் மோட்டார்களின் எண்ணிக்கை |
2 |
| ஒருங்கிணைந்த பவர் |
360 PS |
| ஒருங்கிணைந்த டார்க் |
610 Nm |
| டிரான்ஸ்மிஷன் |
3-ஸ்பீடு DHT* |
| டிரைவ்டிரெயின் |
FWD |
| கிளைம்டு ரேஞ்ச் (NEDC) |
90 கிமீ |
| கிளைம்டு டோட்டல் ரேஞ்ச் |
Up to 1100 km |
*DHT - டெடிகேட்டட் ஹைபிரிட் டிரான்ஸ்மிஷன்
எளிமையாகச் சொல்வதானால் பெட்ரோல் எதுவும் செலவழிக்காமல் வெறும் மின்சார ஆற்றலில் மட்டுமே இந்த காரால் சுமார் 90 கி.மீ தூரம் பயணிக்க முடியும். இது தினசரி நகரப் பயன்பாட்டிற்குப் போதுமானது. நீண்ட தூரப் பயணங்களின் போது பெட்ரோல் என்ஜின் இயங்கத் தொடங்கும். முழு பெட்ரோல் டேங்க் மற்றும் முழு சார்ஜுடன் இந்த கார் மொத்தம் 1100 கி.மீ தூரம் வரை பயணிக்கும் எனத் தெரிவிக்கப்பட்டுள்ளது.
| 1100 கி.மீ ரேஞ்ச் என்பது: எரிபொருள் நிரப்ப எந்த இடத்திலும் நிற்காமல் மும்பையிலிருந்து பெங்களூரு வரை செல்லும் தூரத்திற்குச் சமமானதாகும். |
இந்த கார் ரூ. 25 லட்சம் முதல் ரூ. 35 லட்சம் வரையிலான (எக்ஸ்-ஷோரூம்) விலையில் அறிமுகம் செய்யப்படும் என எதிர்பார்க்கப்படுகிறது. இது சந்தையில் MG ஹெக்டர் டோமாஹாக் PHEV, கியா சோரென்டோ, போக்ஸ்வேகன் டைகுவான் R-லைன், டைரன் மற்றும் ஸ்கோடா கோடியாக் ஆகிய கார்களுக்குப் போட்டியாக அமையும்.
கார்தேக்கோவின் கருத்து...
JSW மோட்டார்ஸ் நிறுவனம் ஒரு புத்தம் புதிய அணுகுமுறையுடன் இந்த பிரிவில் நுழைகிறது. இந்த பிரிவில் உள்ள பெரும்பாலான கார்கள் டீசல் அல்லது பெட்ரோலில் மட்டுமே இயங்கும் நிலையில் இதன் முதல் மாடலே கம்பீரமான பாக்ஸி டிசைனுடன் பிளக்-இன் ஹைபிரிட் தொழில்நுட்பத்தைக் கொண்டு வருகிறது. தினசரி பயன்பாட்டிற்கு எலக்ட்ரிக் டிரைவிங்கும், நீண்ட தூரப் பயணங்களுக்குப் பெட்ரோல் என்ஜினின் நம்பிக்கையும் இதில் கிடைக்கிறது. இந்த விலைப் பிரிவில் இத்தகைய காம்பினேஷன் மிகவும் அபூர்வமானது. அத்துடன் தாராளமான வசதிகளும் சேரும்போது செயல்திறன், சிக்கனம் மற்றும் பிரீமியம் அம்சங்களின் கலவையாக இந்த கார் காகித அளவில் மிக வலுவான மாடலாகத் தெரிகிறது.
இருப்பினும் இதன் வெற்றி சில முக்கிய காரணிகளைப் பொறுத்தே அமையும். புதிய பிராண்ட் என்பதால், வாடிக்கையாளர்களின் நம்பிக்கையைப் பெற JSW மோட்டார்ஸ் ஒரு நம்பகமான விற்பனை மற்றும் சேவை நெட்வொர்க்கை உருவாக்க வேண்டும். சரியான வில நிர்ணயமும் மிக முக்கியம். இவற்றை JSW நிறுவனம் சரியாகச் செய்துவிட்டால் கடும் போட்டி நிறைந்த இந்த பிரிவில் இந்த முதல் SUV ஒரு தவிர்க்க முடியாத சிறந்த தேர்வாக மாறும். வரும் டிசம்பர் மாதம் JSW மோட்டார்ஸ் காரை அதிகாரப்பூர்வமாக வெளியிடும் போது இது பற்றிய முழுமையான விவரங்கள் நமக்குத் தெரியவரும்.
JSW மோட்டார்ஸ் மற்றும் புதிய ஜெட்டூர் T2 பற்றி நீங்கள் என்ன நினைக்கிறீர்கள்? உங்கள் கருத்துக்களை கீழே உள்ள கமெண்ட் பகுதியில் தெரிவியுங்கள்!
