ഹോണ്ട സിവിക്

2006 ലാണ് ഹോണ്ട സിവിക്കിനെ ഇന്ത്യൻ കാർ വിപണിയിൽ ഇറക്കി വിട്ടത്. അന്ന് തന്നെ ഈ കാർ വലിയ ചലനം സൃഷ്ടിച്ചിരുന്നു. സിറ്റി കണ്ട് പരിചയിച്ചവർക്ക് സിവിക് ഒരു നല്ല അപ്ഗ്രേഡ് ആയി തോന്നി. കൊറോള വളരെ ബോറിങ് ആയി തോന്നിയവർക്ക് സിവിക്കിന്റെ രൂപം കൂടുതൽ ആകർഷകമായി തോന്നി. മനംമയക്കുന്ന രൂപവും കാലം ചെന്നാലും ഔട്ട് ഓഫ് ഫാഷൻ ആകാത്ത ഇന്റീരിയറും മികച്ച എൻജിനും സിവിക്കിനെ പലരുടെയും സ്വപ്നകാർ ആക്കി. 

13 വർഷങ്ങൾക്ക് ഇപ്പുറം നോക്കിയാൽ സിവിക്കിൽ വലിയ മാറ്റങ്ങൾ ഒന്നും വേണ്ടി വന്നിട്ടില്ല. എന്നാൽ കാലത്തിന് ചേരുന്ന ചില മാറ്റങ്ങൾ നൽകിയിട്ടുണ്ട്. എന്താണ് പുതിയ ജനറേഷൻ ആളുകളെ പോലും ഭ്രമിപ്പിക്കുന്ന ആ സവിശേഷതകൾ എന്ന് നോക്കാം.

പ്രതീക്ഷിച്ച പോലെ തന്നെ 17.7 ലക്ഷം മുതൽ 22.3 ലക്ഷം രൂപ വരെയാണ് ഹോണ്ട സിവിക്കിന്റെ വില. സത്യം പറഞ്ഞാൽ ഇത് മികച്ച ഒരു പ്രാക്ടിക്കൽ കാർ ആണെന്ന് പറയാൻ കഴിയില്ല. താഴ്ന്ന സീറ്റിങ് പൊസിഷൻ പ്രായമായവർക്ക് ഇഷ്ടപ്പെടില്ല. CVT അത്ര മികച്ചതല്ല. പിന്നിൽ യാത്ര ചെയ്യുന്നവർ സ്ഥലം കുറവാണെന്നും പരാതി പറഞ്ഞേക്കും . മെമ്മറി സീറ്റുകൾ,ഇലക്ട്രിക്ക് അഡ്ജസ്റ്റ് ചെയ്യാവുന്ന കോ-ഡ്രൈവർ സീറ്റ്,ഫ്രണ്ട് പാർക്കിങ് സെൻസറുകൾ എന്നിവ കൂടി വേണ്ടിയിരുന്നു എന്നും ചിലർ അഭിപ്രായപ്പെട്ടേക്കാം. 

പക്ഷെ ഇതാണ് സംഭവം. സിവിക്കിനെ ഒരു പ്രാവശ്യം നോക്കിയാൽ, അതിനോടൊപ്പം കുറച്ച് സമയം ചിലവിട്ടാൽ പിന്നെ ഈ കുറവുകളൊന്നും നമ്മളെ ബാധിക്കില്ല. ഭ്രമിപ്പിക്കുന്ന എക്സ്റ്റീരിയർ ഡിസൈൻ,നിങ്ങളുടെ പേരക്കുട്ടികൾ വരെ ഇഷ്ടപ്പെട്ട് പോകുന്ന ഇന്റീരിയർ ഫീൽ എന്നിവയുമുണ്ട്. കൂടുതൽ യാത്ര ചെയ്യുന്നവർക്കായി ഇപ്പോൾ ഡീസൽ എൻജിനും സ്മൂത്ത് ഡ്രൈവ് ഇഷ്ടപ്പെടുന്നവർക്കായി പെട്രോൾ വേരിയന്റും എത്തിക്കഴിഞ്ഞു.

സിവിക്കിന്  സംസാരിക്കാൻ കഴിയുമായിരുന്നെങ്കിൽ അത് പറയുന്ന ആദ്യ വാചകം ഇതാകും-എന്നെ നോക്കൂ! കാഴ്ച്ചയിൽ തന്നെ വിലയേറിയ കാറെന്ന,ഹോണ്ട അക്കോർഡിന്റെ പിൻഗാമി എന്നൊക്കെ പറയാവുന്ന ഒരു കാറാണ് സിവിക്. ക്രോമിൽ മുക്കിയ വലിയ ഗ്രിൽ,ഹണികോംബ് ഡീറ്റൈലുകൾ ഉള്ള വെന്റുകൾ,ശാന്തമായ രൂപം  എന്നിവയുള്ള സെഡാനാണ് സിവിക്.

നിൽക്കൂ! സിവിക്കിനെ സെഡാൻ എന്ന് വിളിക്കാമോ? വശങ്ങളിൽ നിന്ന് നോക്കിയാൽ ഒരു നോച്ച് ബാക് ആണെന്നേ പറയൂ. 3-ബോക്സ് സ്റ്റൈൽ ഉള്ള സെഡാനെക്കാൾ ഉയർന്ന് നിൽക്കുന്ന ഡിക്കിയുള്ള സെഡാൻ എന്ന പേരാണ് സിവിക്കിന് യോജിക്കുക. പഴയ മോഡൽ പോലെ തന്നെ തറയോട് താഴ്ന്ന ഡിസൈനിൽ,ഇപ്പോൾ പുറപ്പെടും പോലെ നിൽക്കുന്ന സ്‌പോർട്ടി ലുക്ക് സിവിക്കിനുണ്ട്. ഫുൾ LED ഹെഡ്‍ലാംപുകൾ,17-ഇഞ്ച് മെഷീൻ ഫിനിഷ് ഉള്ള അലോയ് വീലുകൾ എന്നിവ ആകർഷണീയത കൂട്ടുന്നു. 

ഇതേ സെഗ്‌മെന്റിലുള്ള മറ്റ് കാറുകളെ അപേക്ഷിച്ച് ഉയരം കൂടിയ കാർ അല്ല സിവിക്. എന്നാൽ വീതിയിൽ സിവിക് തന്നെയാണ് മുന്നിൽ. വലിയ സൈസിൽ ത്രികോണാകൃതിയിൽ ഉള്ള ടെയിൽ ലാമ്പുകൾ ബൂട്ടിലേക്ക് ഒഴുകി ഇറങ്ങിയ രീതിയിൽ കാണാം. രാത്രിയിൽ ഈ ലൈറ്റുകൾ കത്തിക്കിടക്കുന്നത് കാണുന്നത് തന്നെ ഒരനുഭവമാണ്.

മൊത്തത്തിൽ നോക്കിയാൽ പഴയ ജനറേഷൻ സിവിക് പോലെ തന്നെ ഡിസൈൻ ആണ് പുതിയ സിവിക്കിന്റെയും പ്രധാന ആകർഷണം. ഈ രൂപം  ഏറെ കാലം തനിമ ചോരാതെ നിലനിൽക്കുകയും ചെയ്യും.

എവിടെയോ കണ്ട് മറന്ന പോലെ! ഈ ഫീലിങ്ങാണ് ഡ്രൈവിംഗ് സീറ്റിൽ എത്തുമ്പോൾ തോന്നുക. സീറ്റിങ് [പൊസിഷൻ താഴ്ന്നതാണ്. ഡാഷ്‌ബോർഡും അതെ നിലയിൽ സജ്ജീകരിച്ചിരിക്കുന്നു. സ്‌പേസ്‌ ഷിപ്പ് പോലുള്ള ഫീലാണ് ഡ്രൈവിംഗ് സീറ്റിങ് അനുഭവപ്പെടുക. ബ്ലൂ-റെഡ് നിറത്തിലുള്ള ലൈറ്റിംഗ് ഇൻസ്ട്രുമെന്റ് ക്ലസ്റ്ററിൽ മോടി കൂട്ടുന്നു. സെന്റർ കൺസോൾ ഡ്രൈവർ സൈഡിലേക്ക് ടിൽറ്റ് ചെയ്യാൻ കഴിയും. എന്നാലും പഴയ സിവിക്കിലെ സ്പ്ലിറ്റ് ഡാഷ്ബോർഡ് നമ്മൾ മിസ് ചെയ്യും. അതിൽ മുകൾ ഭാഗത്ത് ഒരു ഡിജിറ്റൽ സ്പീഡോമീറ്റർ കൂടി ഘടിപ്പിച്ചിരുന്നു.

ആദ്യം അടിസ്ഥാന കാര്യങ്ങൾ പറയാം. ടിൽറ്റ് ആൻഡ് ടെലിസ്കോപിക് അഡ്ജസ്റ്റ് ചെയ്യാവുന്ന സ്റ്റിയറിങ് വീൽ,8 തരത്തിൽ അഡ്ജസ്റ്റ് ചെയ്യാവുന്ന ഡ്രൈവർ സീറ്റ് എന്നിവ കാണാം. താഴ്ന്ന ഡ്രൈവിംഗ് പൊസിഷൻ ശീലമാകാൻ കുറച്ച് സമയമെടുക്കും.  

മുൻപിലെ സീറ്റുകൾക്ക് വീതി കുറവാണ്. തടിയുള്ള ആളുകൾക്ക് ഷോൾഡർ സ്പേസ് കുറവായി അനുഭവപ്പെടും. തടിയുള്ളവർക്ക് തോളിന് സപ്പോർട്ട് കുറവായി തോന്നാം.  ഫ്ലാറ്റ് ആയ സീറ്റ് ബേസ് തുടകൾക്ക് കിട്ടേണ്ട സപ്പോർട്ട് കുറയ്ക്കും. മുട്ട് പൊക്കി വച്ച് ഇരിക്കുന്ന പോലെ അനുഭവപ്പെടും. ഡ്രൈവർക്ക് സീറ്റ് അഡ്ജസ്റ്റ് ചെയ്യാവുന്നതിനാൽ ഈ പ്രശ്നം കോ ഡ്രൈവർ സീറ്റിൽ മാത്രമേ ഉണ്ടാകൂ. കോ ഡ്രൈവർക്ക് ദീർഘദൂര യാത്ര പ്രയാസമായി തോന്നും. സീറ്റ് പിന്നിലേക്ക് നീക്കി വളച്ച് വച്ച് ചാരി കിടക്കുന്നതാണ് ഒരു പരിഹാരം.

പിന്നിലെ സീറ്റുകളിൽ ഈ പ്രശ്നം കൂടുതൽ ബുദ്ധിമുട്ടിലേക്ക് നയിക്കും. കാരണം പിന്നിലെ ഡോറുകൾ കൂടുതൽ വീതിയിൽ തുറക്കില്ല. മുട്ടിൽ കുറച്ച് സമ്മർദം ചെലുത്തി മാത്രമേ കയറാൻ സാധിക്കൂ. കാറിൽ നിന്ന് പുറത്തിറങ്ങാനും കുറച്ച് പ്രയാസപ്പെടേണ്ടി വരും. വീട്ടിൽ പ്രായമായവർ ഉള്ളവർ ഈ കുറവ് പ്രത്യേകം ശ്രദ്ധിക്കുക. 

.പിന്നിലെ സീറ്റുകൾക്ക് നൽകിയ  സ്പേസിലും ഹോണ്ട പിശുക്ക് കാട്ടിയിട്ടുണ്ട്. ആറടി ഉയരമുള്ള എന്നെ പോലുള്ളവർക്ക് കൃത്യം ഇരിക്കാനുള്ള സ്ഥലം മാത്രമാണ് ഇവിടെയുള്ളത്. പുറമെ കാണുന്ന വീതി അകത്ത് അനുഭവപ്പെടുന്നില്ല. മൂന്ന് പേർക്ക് സൗകര്യപ്രദമായി ഇരിക്കാനുള്ള സ്പേസ് ഇല്ല. സെൻട്രൽ ടണൽ,പൊങ്ങിയ നടുഭാഗം എന്നിവ നടുവിൽ ഇരിക്കുന്ന യാത്രക്കാരനെ അലോസരപ്പെടുത്തും. നടുവിലെ യാത്രക്കാരന് ഹെഡ് റെസ്റ്റും നൽകിയിട്ടില്ല. ആറടിയിൽ കൂടുതൽ ഉയരമുണ്ടെങ്കിൽ മുകളിൽ തല മുട്ടുമെന്ന് തോന്നും. വിൻഡോയുടെ പ്രത്യേക ആകൃതിയും കൂടിയാകുമ്പോൾ അടഞ്ഞ ഇടങ്ങളിൽ ഭയമുള്ളവർക്ക് കഠിനമാകും ഈ പിൻസീറ്റ് യാത്ര.

 എന്നാൽ പ്രായോഗിക സൗകര്യങ്ങളിൽ സിവിക് ചില ബോണസ് പോയിന്റുകൾ നേടിയിട്ടുണ്ട്. മുൻപിൽ ആവശ്യത്തിന് സ്റ്റോറേജ് സ്പേസുകൾ ഉണ്ട്. ആംറെസ്റ്റിലും മറ്റും ആവശ്യത്തിലധികം സാധനങ്ങൾ വയ്ക്കാൻ സൗകര്യമുണ്ട്. ഇത് ഉപയോഗത്തിൽ വളരെ സഹായകമാണ്. പിന്നിലും ഡോർ ബിന്നുകളും സെൻട്രൽ ആം റെസ്റ്റിൽ ഒരു സെറ്റ് കപ്പ്‌ ഹോൾഡറുകളും നൽകിയിട്ടുണ്ട്. 430 ലിറ്റർ ബൂട്ട് സ്പേസ് വലുതാണെങ്കിലും സെഗ്മെന്റിലെ മറ്റ് കാറുകളെ അപേക്ഷിച്ച് കുറവാണ്.  പിൻ സീറ്റിൽ 60:40 സ്പ്ലിറ്റ് നൽകണമായിരുന്നു എന്ന് നമ്മൾ ആഗ്രഹിച്ച് പോകും.

ഗുണനിലവാരത്തിൽ സിവിക് കൂടുതൽ ശ്രദ്ധ കൊടുത്തിട്ടുണ്ട്. പഴയ മോഡലിൽ എല്ലാം ബോറിങ് പ്ലാസ്റ്റിക്കിൽ  നൽകിയപ്പോൾ പുതിയ സിവിക്ക് നമ്മളെ അത്ഭുതപ്പെടുത്തിയാണ് എത്തിയത്. ഡാഷ് ബോർഡ് മൊത്തമായി സോഫ്റ്റ്‌ ടച്ച്‌ മെറ്റീരിയൽ വച്ചാണ് ചെയ്തിരിക്കുന്നത്. ലെതർ അപ്ഹോൾസ്റ്ററി, ഡോർ പാഡിലെ ലെതർ ഇൻസേർട്ടുകൾ എന്നിവ പ്രീമിയം അനുഭവം നൽകുന്നു. പുതിയ യൂറോ കാറുകളിലെ പോലെ തൊട്ടാൽ പൊട്ടുന്ന സാമഗ്രികളല്ല ഹോണ്ട ഉപയോഗിച്ചിരിക്കുന്നത്.

6 എയർ ബാഗുകൾ സ്റ്റാൻഡേർഡ് ആയി നൽകുന്നുണ്ട് ഹോണ്ട. എബിഎസ് വിത്ത് ഇബിഡി,വെഹിക്കിൾ സ്റ്റെബിലിറ്റി മാനേജ്മെന്റ്(ESC),ഹിൽ സ്റ്റാർട്ട് അസിസ്റ്റ് എന്നിവയും നൽകിയിരിക്കുന്നു. ‘അജയ്ൽ ഹാൻഡ്ലിങ് അസിസ്റ്റ്’ എന്ന് ഹോണ്ട വിളിക്കുന്ന സിസ്റ്റം  കോർണറുകളിൽ ഉയർന്ന വേഗതയിലും ബുദ്ധിമുട്ടില്ലാതെ കാർ വളയ്ക്കാൻ സഹായിക്കുന്നു.

രണ്ട് ഡ്രൈവ് ട്രെയിൻ ഓപ്ഷനാണ് ഹോണ്ട നൽകുന്നത്-1.8-ലിറ്റർ പെട്രോളും(CVT), 1.6-ലിറ്റർ ഡീസൽ മോഡലും(6-സ്പീഡ് മാനുവൽ ഗിയർബോക്സ്) രസകരമായ പെട്രോൾ മോഡലിന് മാനുവലോ ഇന്ധന ക്ഷമത ഏറെയുള്ള ഡീസൽ മോഡലിന് ഓട്ടോമാറ്റിക്കോ ഓപ്ഷൻ നൽകാത്തത് അതിശയകരമാണ്!

ഹോണ്ട സിവിക് ഡീസൽ 

സിവിക്കിൽ ആദ്യമായാണ് ഡീസൽ വേർഷൻ എത്തുന്നത്. CR-V യിൽ ഈ എൻജിൻ നമ്മൾ കണ്ടിട്ടുണ്ട്. പക്ഷെ 9-സ്പീഡ് ഓട്ടോമാറ്റിക്കിന് പകരം മാനുവൽ ഗിയർ ബോക്സിലാണ് ഡീസൽ സിവിക് എത്തുന്നത്.ആദ്യം ശ്രദ്ധിക്കുക എൻജിന്റെ ശബ്ദവും വൈബ്രേഷനുമാണ്. 1.6-ലിറ്റർ മോട്ടോർ ഓൺ ചെയ്താൽ തന്നെ ശബ്ദം നമ്മളെ ശല്യം ചെയ്ത് തുടങ്ങും. എന്നാൽ പുറത്ത് നിന്ന് അകത്ത് എത്തുമ്പോൾ ഈ ശബമെല്ലാം എവിടെ പോയി എന്ന് നമ്മൾ അതിശയിക്കും. അകത്ത് ചെറിയ ഒരു ഇരമ്പൽ മാത്രമേ കേൾക്കൂ. ആക്സിലറേഷൻ കൂട്ടുമ്പോൾ ചെറിയ വൈബ്രേഷൻ പെഡലുകളിൽ അനുഭവപ്പെടും. എന്നാലും അത് ഒരു കുറവായി കണക്കാക്കാൻ പറ്റില്ല.

സിവിക്കിന്റെ മുന്നോട്ടുള്ള യാത്ര താരതമ്യേന എളുപ്പമാണ്. ഹോണ്ടയുടെ സ്ഥിരം സവിശേഷതയായ ലൈറ്റ് ക്ലച്ചാണ് അതിന് കാരണം. ട്രാഫിക്കിൽ നിർത്തി നിർത്തി പോകുമ്പോഴും ഇതൊരു തടസം ആകില്ല. നഗരത്തിരക്കിലുള്ള സവാരി എളുപ്പമായിരിക്കും. കൂടുതലായും രണ്ട് അല്ലെങ്കിൽ മൂന്ന് ഗിയറിലായിരിക്കും നമ്മൾ. 1800 rpm കഴിയുമ്പോൾ ഉർജ്ജസ്വലതയുള്ള ആക്സിലറേഷൻ ആണ് സിവിക് കാഴ്ച വയ്ക്കുന്നത്. ടർബോയിൽ ആയി കഴിയുമ്പോൾ റെസ്പോൺസ് പെട്ടെന്ന് തന്നെ ഉണ്ടാകുന്നുണ്ട്. സിറ്റി ഡ്രൈവ് മികച്ചതാക്കാൻ സിവിക്കിന് കഴിയുന്നുണ്ട്.

ഇന്ധന ക്ഷമത കൂട്ടാനുള്ള ചില വിദ്യകളും ഡീസൽ സിവിക്കിൽ പ്രയോഗിച്ചിട്ടുണ്ട്. 80 kmph സ്പീഡിൽ ആറാം ഗിയറിൽ നിൽക്കുമ്പോൾ പെട്ടെന്ന് ഓവർ ടേക്ക് ചെയ്യണമെങ്കിൽ ആക്സിലറേറ്റർ അമർത്തിയിട്ട് കാര്യമില്ല. അഞ്ചാം ഗിയറിലേക്ക് കൊണ്ട് വന്നാലെ ഓവർ ടേക്കിങ് പറ്റൂ. 100-120 kmph സ്പീഡിൽ പോകണം എന്നുണ്ടെങ്കിലും ദിവസം മുഴുവൻ ഓടാൻ പര്യാപ്‌തമാണ് ഈ സിവിക്.

എന്തൊക്കെ പറഞ്ഞാലും ഡീസൽ എൻജിൻ നൽകുന്ന മൈലേജ് എടുത്ത് പറയേണ്ട സവിശേഷത തന്നെയാണ്. ARAI അംഗീകരിച്ച 26.82 kmpl മൈലേജാണ് സിവിക് ഡീസൽ മോഡൽ അവകാശപ്പെടുന്നത്. ഞങ്ങളുടെ ടെസ്റ്റ് ഡ്രൈവിലും സിറ്റിയിൽ 16.81kmpl മൈലേജും ഹൈവേയിൽ 20.07 kmpl മൈലേജും സിവിക് നൽകി. 

ഹോണ്ട സിവിക് പെട്രോൾ 

ഹോണ്ടയുടെ R 18 മോട്ടോർ പഴയ പോലെ തന്നെ നിശബ്ദമാണ്. ഒരു പതിറ്റാണ്ട് മുൻപ് വന്ന സിവിക്കിന്റെ എൻജിനിൽ ചില മാറ്റങ്ങൾ വരുത്തിയാണ് ഈ പുതിയ മോഡലിൽ നൽകിയിരിക്കുന്നത്. ഇന്നും അത് ഔട്ട് ഓഫ് ഡേറ്റ് ആയിട്ടില്ല. 141PS/174Nm ശക്തിയുമായി എത്തുന്ന സിവിക് പെട്രോൾ മോഡൽ ദൈനംദിന യാത്രകൾക്കും വീക്കെൻഡ് ട്രിപ്പുകൾക്കും അനുയോജ്യമാണ്. 

ഡെയിലി ഉപയോഗത്തിന് ചേർന്ന രീതിയിൽ CVT എൻജിൻ മാറ്റിയെടുത്തിട്ടുണ്ട്. മോട്ടോർ വളരെ നിശബ്ദമാണ്. ഡ്രൈവിംഗ് വളരെ അനായാസമായിരിക്കും ഈ പെട്രോൾ മോഡലിൽ. മറ്റേതൊരു CVT മോഡലിനെ പോലെയും ഇത് നല്ല റെസ്പോൺസീവ് ആണ്. എന്നാൽ തിടുക്കം കാണിക്കുന്നില്ല. സ്പോർട്സ് മോഡിൽ എന്നാൽ വലിയ ഫൺ ഫാക്ടർ ഇല്ല. പാഡിൽ ഷിഫ്റ്റർ ഉപയോഗിച്ച് ഗിയറിന്റെ കണ്ട്രോൾ എടുക്കാമെങ്കിലും അത് വലിയ ഡ്രൈവിംഗ് ആവേശം നൽകുന്നില്ല.

ഓഫീസ് യാത്രക്കായി സിവിക് വാങ്ങാൻ ആഗ്രഹിക്കുന്നവർക്ക് ഇത് ഒരു കുറവായി തോന്നില്ല. എന്നാൽ ഡ്രൈവിംഗ് പ്രേമികൾക്ക് ഇതൊരു തിരിച്ചടിയായി അനുഭവപ്പെടും. പെട്രോൾ മോഡലിൽ മാനുവൽ ഗിയർ ബോക്സ് ഓപ്ഷൻ കൂടി ഉണ്ടായിരുന്നെങ്കിൽ കൂടുതൽ ആവേശകരമായേനെ ഹോണ്ട സിവിക്.